فوتو: اشىق دەرەككوز
ەكونوميكانىڭ تسيفرلانۋعا باعىت الۋى مەن كەيبىر سالالار مەن ايماقتاردا تابىستىڭ ارتۋىنا قاراماستان, ەل ىشىندە قىمبات گادجەتتەردىڭ قولجەتىمدىلىگى اراسىنداعى ايىرماشىلىق ءالى دە ايقىن بولىپ وتىر.
ۇلتتىق بانكتىڭ مالىمەتىنشە, قازاقستاندىقتار ءتۇرلى تاۋار مەن قىزمەتتى, سونىڭ ىشىندە سمارتفون سياقتى قىمبات تەحنيكانى نەسيەگە الۋعا ءجيى جۇگىنەدى. 2025 جىلدىڭ تامىزىنداعى جاعداي بويىنشا, ەكىنشى دەڭگەيلى بانكتەردىڭ ەكونوميكاعا بەرگەن نەسيە كولەمى 38 ترلن تەڭگەدەن اسادى, ونىڭ 62%-ى حالىقتىڭ جەكە تۇتىنۋ ماقساتتارىنا جۇمسالعان. بۇل جاعداي بانك جۇيەسى مەن جالپى ەكونوميكانى بەلگىلى ءبىر دەڭگەيدە تاۋەكەلگە يتەرمەلەيدى.
ۇلتتىق ستاتيستيكا بيۋروسىنىڭ دەرەكتەرى بويىنشا, 2024 جىلى قازاقستانداعى ورتاشا ايلىق جالاقى – 384 266 تەڭگە. دەمەك, ورتاشا قازاقستاندىقتىڭ جاڭا iPhone 17 Pro ساتىپ الۋ ءۇشىن ەشقانداي باسقا شىعىنسىز 2,24 ايلىق جالاقىسىن جيناۋى قاجەت.
تەك IT, قارجى جانە مۇناي-گاز سالاسىندا جۇمىس ىستەيتىندەر ايفوندى نەسيەسىز الا الادى. قالعان كوپشىلىك ءۇشىن بۇل – 2-3 ايلىق تابىس كولەمىنە تەڭ.
ەڭ جوعارى جالاقى اتىراۋ, ماڭعىستاۋ جانە ۇلىتاۋ وبلىستارىندا, مۇندا iPhone شامامەن 1,5 ايلىق تابىسقا تەڭ. الماتى مەن استانا تۇرعىندارىنىڭ جاعدايى دامىعان ەلدەر دەڭگەيىنە جاقىن, سمارتفون شامامەن 1,8 ايلىق جالاقى كولەمىندە. ال وڭتۇستىك جانە سولتۇستىك وڭىرلەردە (جەتىسۋ, تۇركىستان, سولتۇستىك قازاقستان) iPhone الۋ ءۇشىن 3 ايدان استام جۇمىس ىستەۋ قاجەت.
iPhone 17 Pro-نىڭ قولجەتىمدىلىگى قازاقستانداعى ەكونوميكالىق تەڭسىزدىكتىڭ ايناسى ىسپەتتى:
- IT, قارجى جانە مۇناي-گاز سەكتورى, سونداي-اق استانالىقتار مەن الماتىلىقتار – ايفوندى ءبىر-ەكى ايدا الا الادى;
- اۋىلدىق جانە تومەن تابىستى وڭىرلەر ءۇشىن تەك ءبولىپ تولەۋ نەمەسە نەسيە ارقىلى;
- ال ورتاشا قازاقستاندىققا جاڭا سمارتفون الۋ ءۇشىن 2-2,5 اي جۇمىس ىستەۋگە تۋرا كەلەدى.
