ءۇش مىڭعا جۋىق تۇرعىنى بار اقجايىق اۋىلىندا سالىنعان بۇل جاڭا كەشەن زاماناۋي ستاندارتقا ساي بوي كوتەرگەن. مۇندا اۋىل جاستارىنا, بارشا تۇرعىندارعا سپورتپەن اينالىسۋعا, ۋاقىتىن ءتيىمدى وتكىزۋگە, دەنساۋلىعىن نىعايتۋعا بارلىق مۇمكىندىك بار.
«مەملەكەت باسشىسى قاسىم-جومارت توقاەۆ ءار جولداۋىندا سپورت سالاسىن دامىتۋ – ستراتەگيالىق مىندەت ەكەنىن اتاپ ءوتىپ كەلەدى. ەل پرەزيدەنتىنىڭ «جاستاردىڭ بوس ۋاقىتىن ءتيىمدى وتكىزۋىنە جاعداي جاساپ, سپورت ينفراقۇرىلىمىن اۋىلداردا قولجەتىمدى ەتۋ – مەملەكەتتىڭ باسىم باعىتى. سپورت سەكتسيالارىن, ۇيىرمەلەردى, اۋىلدىق سپورت نىساندارىن كوبەيتۋ – دەنى ساۋ ۇلت قالىپتاستىرۋدىڭ نەگىزگى شارتى», دەگەن ناقتى تاپسىرماسى بار. بۇگىنگى اشىلىپ وتىرعان جاڭا سپورت كەشەنى مەملەكەتتىك ساياساتتىڭ ناقتى جۇزەگە اسقان جارقىن ۇلگىسى», دەدى نىساننىڭ اشىلۋ سالتاناتىنا قاتىسقان باتىس قازاقستان وبلىسىنىڭ اكىمى ناريمان تورەعاليەۆ.
جاڭا كەشەندە سپورتپەن شۇعىلدانۋشىلارعا قاجەتتى ينفراقۇرىلىم تولىق قاراستىرىلعان. اتاپ ايتقاندا, بوكسقا ارنالعان ارنايى سپورتزال, كەرەك-جاراق ساقتايتىن بولمەلەر, نۇسقاۋشىلار بولمەسى, مەديتسينالىق كومەك كورسەتەتىن كابينەت, جاتتىقتىرۋشىلار مەن قىزمەتكەرلەرگە ارنالعان جەكە كابينەتتەر, كيىم ىلەتىن ورىندار, ينجەنەرلىك-تەحنيكالىق بولمەلەردىڭ ءبارى ساقاداي ساي تۇر. بارلىق سپورتزال وقۋ-جاتتىعۋ ساباقتارىن وتكىزۋگە قاجەتتى زاماناۋي جابدىقپەن تولىق قامتاماسىز ەتىلگەن.
سپورت كەشەنىنىڭ ەسىگىنە كەرىلگەن لەنتانى وبلىس اكىمى ناريمان تورەعاليەۆ پەن اۋىل تۇرعىنى, ارداگەر سپورتشى, تەرەكتى اۋدانىنىڭ بالالار جانە جاسوسپىرىمدەر سپورت مەكتەبىنىڭ جاتتىقتىرۋشىسى, 2016 جىلعى ارداگەرلەر اراسىنداعى الەم چەمپيوناتىنىڭ كۇمىس جۇلدەگەرى, 2025 جىلعى ارداگەرلەر اراسىنداعى ەل بىرىنشىلىگىنىڭ جەڭىمپازى سۇڭعات بەكقاليەۆ سالتاناتپەن قيدى. ءوڭىر باسشىسىنىڭ ايتۋىنشا, اقجايىق اۋىلىنداعى سپورت كەشەنى جالپى وبلىستا اتقارىلىپ جاتقان جۇيەلى جۇمىستىڭ ءبىر پاراسى عانا. بيىل وبلىستا وسىنداي 14 كەشەن قولعا الىنعان بولسا, سونىڭ تورتەۋى پايدالانۋعا بەرىلگەن, قالعان 10-ى جاڭا جىلعا دەيىن تاپسىرىلادى. «بۇنىڭ ءبارى اۋىل حالقى ءۇشىن جاسالىپ جاتقان يگى شارالار. اقجايىقتىقتارعا قۇتتى بولسىن ايتا كەلدىك», دەدى ايماق باسشىسى.
باتىس قازاقستان وبلىسى
