ەكاتەرينا ايدوۆا الەم كۋبوگىندا ولجا سالدى

استانا. 22 ناۋرىز. گەرمانيانىڭ ەرفۋرت قالاسىندا ءوتىپ جاتقان كونكي سپورتىنان الەم كۋبوگىنىڭ فينالىندا قازاقستاندىق اتلەت ەكاتەرينا ايدوۆا قولا جۇلدەگە قول جەتكىزدى. 500 مەترگە سوزىلعان جارىس جولىن ول 38.15 سەكۋندتا ءجۇرىپ ءوتتى. بۇل تۋرالى egemen.kz حابارلادى. جارىس كەزىندە وتانداسىمىز ناو كاداري, كيشي لي, كارولينا ەربانوۆا, مارگو بوەر سىندى تاجىريبەلى سپورتشىلاردى ارتتا قالدىردى. ءبىزدىڭ قىزدىڭ الدىڭ ەكى امەريكالىق كونكيشى وراپ كەتى. ايدوۆا چەمپيون اتانعان حيزەر ريچاردسوننان 0.35 سەكۋند قالىپ قويسا, كۇمىس جۇلدەگەر بريتتاني بوۋدىڭ كورسەتكىشىنەن مارەگە 0.22 سەكۋند كەشىگىپ جەتتى. وسى جۇلدەسىنىڭ ارقاسىندا قازاقستاندىق سپورتشى 106 ۇپايعا يە بولىپ, 500 مەترلىك سايىس بويىنشا الەم كۋبوگىنىڭ جالپى ەسەبىندە 12-ساتىعا تابان تىرەدى. بۇگىن سپورتشىلار 500 مەترلىك قاشىقتىقتا ەكىنشى جارىستارىن وتكىزەدى. وكىنىشكە قاراي, اتالعان دوداعا ەلىمىزدىڭ بەلگىلى كونكيشىسى, الەم چەمپيونى (سوچي, 2013 ج.) دەنيس كۋزين دەنساۋلىعىنا بايلانىستى قاتىسا المادى. ايتا كەتەيىك, قازاقستاندىق كونكيشىلەر ءۇشىن بۇل – بيىلعى ماۋسىمداعى العاشقى جۇلدە. تاياۋدا استانادا وتكەن الەم چەمپيوناتىندا كاتيا ءۇش مارتە ءتورتىنشى ورىن الىپ, جالپى ناتيجە بويىنشا دا جارىستى 4-ءشى بولىپ اياقتادى. جالپى, كونكي سپورتىن سەرىك ەتكەن وتاندىق اتلەتتەر الەم كۋبوگىندا جەڭىس تۇعىرىنا سوڭعى رەت 2000-2001 جىلعى ماۋسىمدا كوتەرىلدى. تاۋەلسىزدىك العالى تەك ءۇش سپورتشىمىز عانا اتالعان دودادا ولجا سالدى. ولار: ۆاديم شاكشاكباەۆ (2 التىن جانە ءبىر قولا مەدال), سەرگەي تسىبەنكو ء(بىر قولا مەدال) جانە ليۋدميلا پروكاشەۆا (5 كۇمىس جانە 3 قولا مەدال). ەلامان قوڭىر. دەرەك: egemen.kz. سۋرەت: gazetasporta.com.