فوتو: ria.ru
سونداي-اق بۇۇ باس اسسامبلەياسى رەسەيدەن بالالاردى كۇشتەپ كوشىرۋ, دەپورتاتسيالاۋ, ولاردى وتباسىنان جانە زاڭدى قامقورشىلارىنان اجىراتۋ, جەكە مارتەبەسىن وزگەرتۋ (ازاماتتىق بەرۋ, اسىراپ الۋ نەمەسە قامقورلىققا بەرۋ) ارقىلى يدەولوگيالىق ناسيحات جۇرگىزۋ ءىسىن دەرەۋ توقتاتۋىن تالاپ ەتىپ وتىر.
اتالعان قۇجات ۇيىمنىڭ باس حاتشىسىن ءوزىنىڭ وكىلەتتىكتەرىن پايدالانا وتىرىپ, ماسەلەنى ارنايى وكىلىنىڭ كومەگىمەن شەشۋگە ۇندەيدى.
باس اسسامبلەيا وكىلى اننالەنا بەربوك وسى ماسەلەنى تياناقتاۋعا ارنالعان جيىندا جوعارىدا اتالعان جاعدايلاردى باسىنان وتكەرگەن ۋكراين بالاسىنىڭ وقيعاسىن ايتىپ بەردى.
«كوز الدىڭىزعا ەلەستەتىپ كورىڭىزشى... ءسىزدىڭ جاسىڭىز 16 شاماسىندا. ءبىر كۇنى ۇيىڭىزگە بەتپەردە كيىپ, قارۋ اسىنعان ساربازدار باسىپ كىرىپ, ءسىزدى كۇشتەپ وزىڭىزگە بەلگىسىز ايماققا الىپ كەتەدى. ودان كەيىن بىرنەشە ايدى قورقىنىشتى جاعدايدا وتكىزىپ, ءتىپتى اتىڭىزدى اۋىستىرىپ جىبەرەدى. بۇل – رەسەيگە كۇشتەپ دەپورتاتسيالانىپ, اسكەري دايىندىققا جىبەرىلگەن مىڭداعان ۋكراين بالاسىنا ورتاق وقيعا. وسىنداي جاعدايعا تاپ بولعان بالالار بۇۇ اتقاراتىن مىندەتتەردەن بەيحابار بولۋى مۇمكىن. سوندىقتان ءبىز قوعامنىڭ ەڭ وسال وكىلدەرى, بالالاردىڭ ۇنىنە قۇلاق اسۋىمىز قاجەت», دەدى اننالەنا بەربوك.
جەنەۆا كونۆەنتسياسىنىڭ 49-بابىندا باسىپ الىنعان اۋماقتان بالالاردى كۇشتەپ كوشىرۋ نەمەسە دەپورتاتسيالاۋعا تىيىم سالىنعان. اننالەنا بەربوك وسى تىيىم ورىندالماي وتىرعانىنا دا نازار اۋداردى.
جيىندا ءسوز العان ۋكراينا سىرتقى ىستەر ءمينيسترىنىڭ ورىنباسارى ماريانا بەتسانىڭ ايتۋىنشا, بۇگىنگى كۇنگە دەيىن رەسەي فەدەراتسياسى كەمىندە 20 مىڭ ۋكراينالىق بالانى ءوز ەلىنەن ءماجبۇرلى تۇردە الىپ كەتكەن. ولاردىڭ كەيبىرى قايتارىلسا, باسىم بولىگىنىڭ قازىرگى ءحالى, تاعدىرى بەلگىسىز.
ال بۇۇ جيىنىنا قاتىسقان رەسەيدىڭ بۇۇ جانىنداعى تۇراقتى وكىلىنىڭ ورىنباسارى ماريا زابولوتسكايا قارار بالالاردى قورعاۋعا ەمەس, رەسەيدىڭ بالالاردى دەپورتاتسيالاۋ ءىسىن قازبالاۋدى كوزدەيتىنىن اتاپ ءوتتى.
ونىڭ سوزىنشە, رەسەيدىڭ 20 مىڭ ۋكراين بالاسىن ءماجبۇرلى كوشىرگەنى تۋرالى دەرەك بىرنەشە جىلدان بەرى وزگەرىسسىز ايتىلىپ كەلەدى.
«باستاماشى تاراپتىڭ ناقتى ءتىزىمىن نەمەسە اتا-انالارىنىڭ ءوتىنىشىن الدىمىزعا تارتقانىن كورگەن جوقپىز. حالىقارالىق قىزىل كرەست كوميتەتى, قاسيەتتى تاق جانە قاتار مەملەكەتى بۇل ماسەلەدە دەلدال بولىپ وتىر. رەسەي باسشىلىعى دا اقش-تىڭ ءبىرىنشى حانىمى مەلانيا ترامپتىڭ اسكەري ارەكەتتەردەن زارداپ شەككەن بالالاردىڭ تاعدىرىن شەشۋ جونىندەگى باستاماسىن قولدايدى. وسىعان دەيىن 122 – ۋكراينالىق, 39 – رەسەيلىك بالا ءوز ەلىنە قايتارىلدى», دەدى ماريا زابولوتسكايا.
سونداي-اق زابولوتسكايا رەسەيدىڭ حالىقارالىق گۋمانيتارلىق قۇقىقتى بۇزىپ, ۋكراينالىق بالالاردى كۇشتەپ اسىراپ العانى تۋرالى اقپاراتتى دا جوققا شىعاردى.
