زاۋىتتا الەمدىك جەتەكشى كومپانيالاردىڭ زاماناۋي جابدىقتارى ورناتىلعان, بارلىق تەحنولوگيالىق ۇدەرىستەر حالىقارالىق ستاندارتتارعا ساي جۇرگىزىلەدى. بۇل ءونىم ساپاسىن تۇراقتى باقىلاۋعا جانە وندىرىستىك قاۋىپسىزدىكتىڭ جوعارى دەڭگەيىن قامتاماسىز ەتۋگە مۇمكىندىك بەرەدى.
«الەل اگرو» اق-نىڭ جامبىل فيليالى – قۇس شارۋاشىلىعى سالاسىنداعى جەتەكشى كاسىپورىنداردىڭ ءبىرى. نەگىزگى باعىتى – برويلەر تۇقىمدى قۇستاردىڭ ەتىن ءوندىرۋ جانە قايتا وڭدەۋ. كومپانيا تولىق وندىرىستىك تسيكلدى جۇزەگە اسىرادى: بالاپانداردى ينكۋباتسيالاۋدان باستاپ, قۇستى ءوسىرۋ, ەت ءوندىرۋ جانە دايىن ءونىمدى نارىققا شىعارۋ كەزەڭدەرىنىڭ بارلىعىن قامتيدى.
كاسىپورىننىڭ قازىرگى قۋاتى – جىلىنا 10 مىڭ توننا قۇس ەتى. قازىرگى تاڭدا زاۋىت باسشىلىعى ءوندىرىس كولەمىن ۇلعايتۋ جانە تيىمدىلىكتى ارتتىرۋ ماقساتىندا زاماناۋي تەحنولوگيالاردى, وندىرىستىك ينفراقۇرىلىمدى ەنگىزىپ وتىر.
«الەل اگرو» اق-نىڭ جامبىل فيليالى 2019 جىلى جۇمىسىن باستادى. 2020 جىلى جىلىنا 10 مىڭ توننا ءونىم وندىرەتىن ەت وڭدەۋ كەشەنى اشىلدى. 2021 جىلى قۋاتى 10 مىڭ توننا بولاتىن ەكى برويلەر قۇس فابريكاسى, ال 2022 جىلى جىلىنا 84 مىڭ توننا قۇراماجەم وندىرەتىن زاۋىت ىسكە قوسىلدى. 2023 جىلى جىلىنا 13,5 ملن تاۋلىكتىك بالاپان شىعاراتىن زاماناۋي ينكۋباتور پايدالانۋعا بەرىلدى.
بيىل جىل سوڭىنا دەيىن قۋاتى 4 600 توننا بولاتىن ءۇشىنشى برويلەر فابريكاسىنىڭ ىسكە قوسىلۋى جوسپارلانعان. سونداي-اق جالپى قۋاتى 26 مىڭ توننا بولاتىن ەكى جاڭا فابريكانىڭ قۇرىلىسى باستالادى. 2028 جىلى تاعى ەكى فابريكانىڭ قۇرىلىسى قولعا الىنىپ, سول جىلدىڭ سوڭىنا قاراي كاسىپورىننىڭ جالپى جىلدىق قۋاتى 69 مىڭ توننا قۇس ەتىن وندىرۋگە جەتەدى. بۇل وبلىستاعى قۇس ەتى ءوندىرىسىن ەكى ەسەگە ارتتىرۋعا جول اشادى.
وڭىردە قۇس شارۋاشىلىعى باعىتىندا ءۇش ءىرى كاسىپورىن جۇمىس ىستەيدى. ونىڭ ەكەۋى – قۇس ەتىن ءوندىرۋ («اۋليە-اتا فەنيكس» جشس, «الەل-اگرو» اق جامبىل فيليالى), بىرەۋى – جۇمىرتقا ءوندىرۋ («اسا-دامۋ» جشس).
2025 جىلدىڭ 9 ايىندا وبلىستا 3 327,4 توننا ەت جانە 421 توننا شۇجىق ونىمدەرى ەكسپورتتالدى. ونىڭ ىشىندە قۇس ەتى – 1 721,5 توننا, سيىر ەتى – 675,1 توننا, قوي ەتى – 1 188,7 توننا, جىلقى ەتى – 0,3 توننا, مالدىڭ ىشكى ونىمدەرى – 760,9 توننا. ءونىم قىرعىزستان, قاتار, كۋۆەيت, ءباا, رەسەي, ساۋد ارابياسى, يران جانە گەرمانيا ەلدەرىنە شىعارىلدى.
