پۋتين نەمتسوۆتىڭ ولىمىنە كىنالى ادام تۋرالى پىكىرىن ءبىلدىردى

استانا. 21 ناۋرىز. رەسەي پرەزيدەنتى ۆلاديمير پۋتين بوريس نەمتسوۆتىڭ ولىمىنە كىنالى ادامنىڭ تابىلاتىنىنا ۇمىتپەن قارايدى. بۇل تۋرالى rosbalt.ru حابارلادى. ول رەسەيدەگى ءوندىرىس يەلەرى مەن كاسىپكەرلەردىڭ كونفەرەنتسياسىندا «نەمتسوۆتى ولتىرۋگە تاپسىرىس بەرگەن ادام تابىلا ما؟», دەگەن سۇراققا «مەن بۇعان ۇمىتپەن قارايمىن», دەپ جاۋاپ بەردى. وسىعان دەيىن پۋتين رەسەي ىشكى ىستەر مينيسترلىگىنىڭ القا ماجىلىسىندە ساياساتكەردىڭ ولىمىنە قاتىستى ءوز پىكىرىن بىلدىرگەن ەدى. «بىزگە رەسەيدى وسىنداي شەكتەن شىققان قىلمىستاردان تازارتۋ كەرەك», دەگەن پرەزيدەنت قۇقىق قورعاۋ ورگاندارىن مۇنداي قىلمىستاردى اشۋ ءۇشىن جۇمىس ساپاسىن ارتتىرۋعا شاقىردى. ۆلاديمير پۋتين قىلمىسكەردىڭ تابىلاتىنىنا ۇمىتپەن قاراعانىمەن, رەسەيلىكتەردىڭ باسىم بولىگى نەمتسوۆتى ولتىرتكەن ادامنىڭ ۇستالاتىنىنا سەنبەيدى. «لەۆادا» ورتالىعى جۇرگىزگەن ساۋالنامادا جاۋاپ بەرۋشىلەردىڭ 33 پايىزى سەنىممەن قاراسا, 44 پايىزى قاراما-قايشى پىكىر بىلدىرگەن. ءتىپتى 48 پايىزى تابىلعان كۇننىڭ وزىندە قىلمىستىڭ ناقتى سەبەبىنىڭ انىقتالاتىنىنا سەنبەيدى. ەلامان قوڭىر. دەرەك: rosbalt.ru. سۋرەت: tsn.ua.