سولتۇستىك قازاقستاندا جۋرناليستەر سپارتاكياداسى ءوتتى

پەتروپاۆل. 24 ماۋسىم. قازاقستان جۋرناليستەر وداعىنىڭ جەرگىلىكتى فيليالى باق قىزمەتكەرلەرى مەرەكەسى قارساڭىندا اۋداندىق, وبلىستىق, رەسپۋبليكالىق قالام يەلەرى اراسىندا سپورتتىڭ فۋتبول, شاحمات, ۇستەل تەننيسى, جەڭىل اتلەتيكا, ۆولەيبول, دارتس جانە توعىزقۇمالاق تۇرلەرىنەن سپارتاكيادا ۇيىمداستىردى. بۇل تۋرالى egemen ءتىلشىسى حابارلادى. اققايىڭ اۋدانىنىڭ «وقجەتپەس» لاگەرىندە وتكەن شارادا وبلىستىق ىشكى ساياسات باسقارماسىنىڭ باسشىسى جانات سادۋاقاسوۆ, وبلىستىق «سولتۇستىك قازاقستان» گازەتىنىڭ باس رەداكتورى جاراسباي سۇلەيمەنوۆ, اۋدان اكىمى داۋرەن بايتولەشەۆ ءسوز سويلەپ, جىلى تىلەكتەرىن ارنادى. قۇرامىندا 160 جۋرناليست بار 10 كوماندا ءبىرىنشى كۇنى فۋتبول, شاحمات, ۇستەل تەننيسى جانە جەڭىل اتلەتيكادان باسەكەلەستى. ەكىنشى كۇنى ۆولەيبول, دارتس, توعىزقۇمالاق بويىنشا جۇلدەلەر ساراپقا سالىندى. جالپىكوماندالىق ەسەپتە ەڭ كوپ ۇپاي جيناعان «پەرۆىي سەۆەرنىي» تەلەكانالى ءبىرىنشى ورىندى يەلەندى. ەكىنشى ورىنعا اۋداندىق گازەتتەردىڭ, ءۇشىنشى ورىنعا مەنشىكتى تىلشىلەردىڭ كوماندالارى جايعاستى. سپارتاكيادانىڭ وتۋىنە «قىزىلجار سۋ», «شاعالا-اگرو», «اكس», «نەپتۋن» سەكىلدى فيرمالار مەن سەرىكتەستىكتەر مۇرىندىق بولىپ, دەمەۋشىلىك كورسەتتى. ءومىر ەسقالي. دەرەك, سۋرەت: egemen.kz