فوتو: سينحۋا
يناۋگۋراتسيا ءراسىمى لا-پاس قالاسىنىڭ ورتالىعىنداعى كوپۇلتتى زاڭ شىعارۋ اسسامبلەياسىنىڭ سارايىندا ءوتتى.
«بۇگىن حالىققا قىزمەت ەتۋدىڭ جاڭا تاۋەلسىز ءداۋىرى باستالدى. بۇل — ءوزىن الەمگە اشىپ جاتقان جاڭا بوليۆيا», دەدى پاس يناۋگۋراتسيالىق سوزىندە.
سالتاناتتى شاراعا الەمنىڭ 70-تەن استام ەلىنەن دەلەگاتسيالار قاتىستى. اتاپ ايتقاندا, بوليۆياعا ارگەنتينا, پاراگۆاي, ۋرۋگۆاي, چيلي جانە ەكۆادور پرەزيدەنتتەرى — حاۆەر ميلەي, سانتياگو پەنيا, ياماندۋ ورسي, گابريەل بوريچ جانە دانيەل نوبوا كەلدى. سونىمەن قاتار, ۆيتسە-پرەزيدەنت ەدماند لارا دا انت بەردى.
ءوز سوزىندە رودريگو پاس ەلدە «بارىنە ارنالعان كاپيتاليزم» ساياساتىن جۇرگىزۋگە ۋادە بەردى. ول نارىقتىق ەكونوميكاعا بىرتىندەپ كوشۋ, سۋبسيديالاردى ماقساتتى تۇردە ازايتۋ جانە حالىقارالىق قاتىناستاردى جاقسارتۋ جوسپارىن تانىستىردى. سونداي-اق, بۇرىنعى سولشىل ۇكىمەتتەر كەزەڭىندەگى سالقىنداۋدان كەيىن اقش-پەن قارىم-قاتىناستى ساقتىقپەن قايتا جاقسارتۋعا نيەتتى ەكەنىن ايتتى.
حريستيان-دەموكراتيالىق Partido Demócrata Cristiano پارتياسىنىڭ وكىلى رودريگو پاس 19 قازاندا وتكەن پرەزيدەنتتىك سايلاۋدىڭ ەكىنشى ساتىسىندا پرەزيدەنت بولىپ سايلانعان ەدى. بۇل سايلاۋ ناتيجەسى شامامەن 20 جىل بويى بيلىكتە بولعان سولشىل Movimiento al Socialismo پارتياسىنىڭ (ونىڭ وكىلدەرى ەۆو مورالەس پەن لۋيس ارسە) ءداۋىرىنىڭ اياقتالعانىن كورسەتتى.
