ەلىمىزدىڭ شىعارماشىل جانە ەڭبەك ۇجىمدارى بارشا قازاقستاندىقتاردى پرەزيدەنتتىك سايلاۋعا قاتىسۋعا شاقىرادى
جەرگىلىكتى جولدارعا – باسىم نازار
مەملەكەتتىڭ داعدارىسقا قارسى ساياساتىن تالقىلاۋ ورتالىق كوممۋنيكاتسيالار قىزمەتىندە ءماجىلىس دەپۋتاتتارى سەرىكباي نۇرعيساەۆ پەن ساكەن جىلقايداروۆتىڭ قاتىسۋىمەن ءوتتى. دەپۋتاتتار بۇقارالىق اقپارات قۇرالدارى وكىلدەرىنىڭ الدىندا ۇستىمىزدەگى جىل بيۋدجەتى شىعىستارىن وڭتايلاندىرۋ جانە اۆتوجولداردى دامىتۋ بارىسىن ءسوز ەتتى.
الدىمەن ءسوز العان قارجى جانە بيۋدجەت كوميتەتىنىڭ مۇشەسى ساكەن جىلقايداروۆ ۇشجىلدىق رەسپۋبليكالىق بيۋدجەتكە تۇزەتۋ ەنگىزىلگەن بولجامدا 2015-2017 جىلدارى بازالىق ستسەناري كەزىندە مۇناي باعاسىنىڭ باررەلى 80 اقش دوللارىنان 50 اقش دوللارىنا دەيىن تومەندەۋى بولجانعاندىعىن العا تارتتى. دەپۋتات بۇل ورايدا ۇلتتىق قورعا مۇناي سەكتورى ۇيىمدارىنان تۇسەتىن تۇسىمدەردىڭ 2015 جىلعا ارنالعان ناقتىلانعان بولجامى 80,5 ملن. توننا مۇناي ءوندىرۋ كولەمىن, مۇنايدىڭ الەمدىك باعاسى 50 دولل/باررەلدى جانە تەڭگەنىڭ اقش دوللارىنا باعامى 185 تەڭگەنى نەگىزگە الا وتىرىپ, 1 801,5 ملرد. تەڭگەنى قۇرايتىندىعىن اتادى.
سونىمەن, ىشكى جالپى ءونىمنىڭ ءوسىمى 2015 جىلى – 1,5 %, 2016 جىلى – 2,3 % جانە 2017 جىلى 3,4% دەڭگەيىندە باعالانعان. ال ينفلياتسيا دەڭگەيىن بۇرىنعىداي 6-8% دالىزىندە ساقتاۋ جوسپارلانىپ وتىر ەكەن. سونداي-اق, دەپۋتات 2015 جىلى رەسپۋبليكالىق بيۋدجەت تۇسىمدەرى 5 988,0 ملرد. تەڭگە كولەمىندە نەمەسە بەكىتىلگەن بيۋدجەتپەن (6 858 ملرد. تەڭگە) سالىستىرعاندا 870,0 ملرد. تەڭگەگە ازايتىلا وتىرىپ ايقىندالعانىن قاپەرگە سالدى. شىعىستاردى وڭتايلاندىرۋدىڭ نەگىزگى باعىتتارىن سانامالاپ وتكەن س.جىلقايداروۆ مەملەكەت باسشىسىنىڭ اعىمداعى جىلعى 11 اقپاندا ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىنا سايكەس «نۇرلى جول» مەملەكەتتىك باعدارلاماسىنىڭ داعدارىسقا قارسى جاڭا شارالارىن ىسكە اسىرۋ ءۇشىن ۇلتتىق قوردان نىسانالى ترانسفەرتتەر ۇلعايتىلعاندىعىنا نازار اۋداردى.
دەپۋتات بۇل ورايدا مەملەكەتتىڭ بۇدان بۇرىن العان بارلىق الەۋمەتتىك مىندەتتەمەلەرىن ورىنداۋ ماقساتىندا بيۋدجەت تاپشىلىعىنىڭ كولەمى دە 259,4 ملرد. تەڭگەگە ۇلعايتىلعاندىعىن, ول 1 256,5 ملرد. تەڭگەنى نەمەسە ىشكى جالپى ونىمگە شاققاندا 3 پايىزدى قۇرايتىندىعىن العا تارتتى. س.جىلقايداروۆ جاقىندا ءوتكەن «نۇر وتان» پارتياسىنىڭ XVI سەزىندە مەملەكەت باسشىسى ن.نازارباەۆ بەس حالىقتىق رەفورمانى اتاپ كەتكەندىگىنە, ولار مەملەكەتتىلىگىمىزدى نىعايتىپ, ەلىمىزدىڭ مەملەكەتتىك باسقارۋى مەن ەكونوميكالىق دامۋىن جاڭا, ساپالى دەڭگەيگە شىعارارىن دا اۋىزعا الدى. «ءبىز ەلباسىمىزدىڭ سەنىمدى تۇراقتىلىققا جانە مەملەكەتىمىزدىڭ دامۋىنا الىپ كەلەتىن بارلىق يدەيالارىن جۇزەگە اسىرۋ بويىنشا بار كۇش-جىگەرىمىزدى سالۋعا ءتيىسپىز», دەدى ول ءوز سوزىندە.
بۇدان كەيىن ءسوز العان ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى سەرىكباي نۇرعيساەۆ «نۇرلى جول» باعدارلاماسىنا بيۋدجەتتەن 2,4 تريلليون تەڭگە بولىنگەندىگىن, وڭىرلەردەگى كەزدەسۋلەردە حالىقتىڭ وسى باعدارلامانىڭ ورىندالۋىنان ءۇمىتتى ەكەندىگىن العا تارتتى. 1956 جىلى اقش-تا باستالعان ۇلى دەپرەسسيا كەزىندە وسىنداي باعدارلاما قابىلدانعانىن ايتقان دەپۋتات, سول كەزدىڭ وزىندە 6 مىڭ شاقىرىم جول سالىنعانىنا نازار اۋداردى. سول جولدارعا قويىلاتىن ەڭ باستى تالاپ ەلدىڭ باتىسى مەن شىعىسىنا نەمەسە سولتۇستىگى مەن وڭتۇستىگىنە جەتكىزەتىن جولداردا جىلدامدىقتى ساعاتىنا 120 كيلومەترگە دەيىن جەتكىزە الۋ بولعان ەكەن. باسىندا جول سالۋعا كەتۋى ءتيىس شىعىن 27 ميلليارد دوللار دەپ جوسپارلانسا, ارتىنان ونىڭ مولشەرى 129 ميللياردقا دەيىن جەتىپتى. الايدا, ودان تۇسكەن پايدا 20 ەسە بولعاندىعىن س.نۇرعيساەۆ ەرەكشە اتادى.
دەپۋتاتتىڭ مالىمەتىنە قاراعاندا, بۇگىنگى تاڭدا اقش-تا جالپى جولداردىڭ ۇزىندىعى 6 ميلليون 600 مىڭ شاقىرىمعا جەتىپتى. جانە دە بۇل جولدار جوعارى دەڭگەيدە جۇمىس ىستەپ جاتىر. ال قازاقستان «نۇرلى جول» باعدارلاماسى بويىنشا 7,5 مىڭ شاقىرىم جولدى رەتتەپ الۋدى كوزدەپ وتىر, بىراق جەرگىلىكتى جولداردىڭ جاعدايى قالاي بولارى تۋرالى الانداۋشىلىق تا جوق ەمەس, دەگەن سەرىكباي ورىكباي ۇلىنىڭ ءسوزى اسەرلى شىقتى. دەپۋتات وسى ماسەلەنىڭ شەشىمى بولۋى ءۇشىن پرەمەر-ءمينيستردىڭ اتىنا ساۋال دا جولداپتى. مىسالى, ەلىمىزدەگى رەسپۋبليكالىق جولداردىڭ ۇزىندىعى 23 مىڭ شاقىرىم بولسا, جەرگىلىكتى جولدار 86 مىڭ شاقىرىمعا جەتەدى ەكەن. جىل سايىن 2,5 مىڭ كيلومەتر جولدى كۇردەلى جانە وزگە دە جوندەۋدەن وتكىزگەننىڭ وزىندە ەلىمىز جولدارىن رەتكە كەلتىرۋ ءۇشىن دە كوپتەگەن جىلدار كەرەكتىگىن (باس جاعى جوندەلىپ بىتكەنشە, سوڭعى جاعى قايتا بۇزىلىپ ۇلگەرەدى) جەتكىزگەن دەپۋتات, بۇعان جەكە سەكتوردى دا تارتۋ جايىن ءوز ساۋالىندا كەلتىرگەندىگى بەلگىلى بولدى.
اسقار تۇراپباي ۇلى,
«ەگەمەن قازاقستان».
جاستىق جىگەر
قوستاناي مەملەكەتتىك پەداگوگيكالىق ينستيتۋتىندا قازاقستان ستۋدەنتتەرى اليانسىنىڭ جاستار فورۋمى ءوتتى. جاستار ەلدىڭ بىرىكتىرۋشى كۇشى, ەشقاشان سارقىلمايتىن قۋات كوزى ءححى عاسىرداعى قازاقستان مەملەكەتىنىڭ مىزعىماس يدەيالارىنىڭ تۇعىرى. فورۋمعا قاتىسۋشىلار جاستاردىڭ پاتريوتتىق بەلسەندىلىگىنىڭ جوعارىلاۋى, وتانعا, ەلگە, جەرگە دەگەن سۇيىسپەنشىلىگىنىڭ نىعايۋى قازاقستاننىڭ العا قاراي قارىشتاپ دامۋىنىڭ العىشارتى بولىپ تابىلاتىنىن ايتتى. فورۋمدا بەلسەندى جاستار ءسوز الدى. قوستاناي مەملەكەتتىك پەداگوگيكالىق ينستيتۋتى قازاق جانە ورىس فيلولوگياسى فاكۋلتەتى جاستار ءىسى جونىندەگى كوميتەتىنىڭ ءتورايىمى اسەل عازەز جاستار ءۇشىن جاڭا مەملەكەتتىك باعدارلامالاردىڭ ماڭىزى زور ەكەنىن ەسكە سالدى. جاستاردى «ديپلوممەن – اۋىلعا!» باعدارلاماسىنا قاتىسۋعا شاقىردى. ءوزى دە ءبىلىم ورداسىن بىتىرگەن سوڭ اۋىلعا باراتىندىعىن مالىمدەدى. مىنبەرگە قازاقستان حالقى قوستاناي مەملەكەتتىك پەداگوگيكا ينستيتۋتى ستۋدەنتتەر اسسامبلەياسىنىڭ توراعاسى دامەر باتىرعوجين كوتەرىلدى. – ءار ەلدىڭ ءوز تاريحى, ءداستۇرى بار. ءبىزدىڭ ەلىمىزدە ۇلتتار دوستىعىنىڭ كەرەمەت ۇلگىسى – قازاقستان حالقى اسسامبلەياسى ءومىر ءسۇرىپ كەلەدى. ونىڭ قۇرىلعانىنا 20 جىل بولدى. ءبىزدىڭ اكەلەرىمىز كوپتەگەن قيىندىقتى بىرگە كوردى, بىرگە جەڭدى. ءبىز, جاستار, اكەلەر ءداستۇرىن جالعاستىرۋىمىز كەرەك. جۇدىرىقتاي جۇمىلعان بىرلىك, كەلىسىم, تۇراقتىلىق قانا ءتاستۇيىن بولاشاعىمىزدىڭ كەپىلى! – دەدى. ول «ءبىز ەلىمىزدىڭ پاتريوتىمىز!» دەپ داۋىستاعان جاستار ەلىمىزدەگى باستى ساياسي وقيعا – سايلاۋعا ءبىر كىسىدەي باراتىندىعىن مالىمدەدى. مۇنان كەيىن وبلىس ورتالىعىنداعى ز.الدامجار اتىنداعى الەۋمەتتىك-تەحنيكالىق ۋنيۆەرسيتەت ستۋدەنتتەرى دە ءبىلىم ورداسى الدىندا فلەش-موب ءتۇزدى. قولدارىنا كوك تۋىمىزدىڭ بەلگىسىندەي جالاۋشا ۇستاعان جاستار «العا, قازاقستان!» دەپ داۋىستادى. فلەش-موبتىڭ ەرەكشەلىگى, وعان قاتىسقان ستۋدەنتتەردىڭ بارلىعى دەرلىك سايلاۋعا بيىل ءبىرىنشى رەت قاتىسقالى وتىر. – مەملەكەت باسشىسىن سايلاۋ – ەلدىڭ بولاشاعى ءۇشىن ءاركىمدى تولعاندىراتىن ساياسي ناۋقان. ال ەلدىڭ بىرلىگىن, ەكونوميكانىڭ ىرعاقتى دامۋىن, الەۋمەتتىك باقۋات تىرلىگىمىزدى كىم قالامايدى دەيسىز؟ قازىر الەمدە بولىپ جاتقان كەلەڭسىز كورىنىستەردى كورىپ وتىرعان ۇلكەن دە, كىشى دە ەلدىڭ تىلەگىن تىلەيدى. سوندىقتان 26 ءساۋىر كۇنى وتەتىن پرەزيدەنتتىك سايلاۋعا ءبىز العاش رەت قاتىساتىنىمىزدى قۋانىشپەن ايتا وتىرىپ, بارلىق قازاقستاندىقتاردى سايلاۋعا بەلسەندىلىكپەن كەلۋگە شاقىرامىز, – دەدى ۋنيۆەرسيتەتتىڭ قۇقىقتانۋ فاكۋلتەتىنىڭ 2-كۋرس ستۋدەنتى ايدانا جاقاەۆا. فلەش-موبتا مۋزىكا ىرعاعىمەن بي قيمىلدارىن جاساي تۇرىپ, جاستار سايلاۋعا كەلەتىندىكتەرىن ءبىلدىردى. ولار پرەزيدەنتتىك سايلاۋدىڭ وتە ماڭىزدى ساياسي ناۋقان ەكەنىنە جۇرتشىلىقتىڭ نازارىن وسىلاي اۋداردى. ءنازيرا جارىمبەتوۆا, «ەگەمەن قازاقستان». قوستاناي.ستۋدەنتتەر سايلاۋدا بەلسەندىلىك تانىتادى
الداعى سايلاۋعا قاتىستى ءال-فارابي اتىنداعى قازۇۋ-دىڭ ەكونوميكا جانە بيزنەس جوعارى مەكتەبىنىڭ ءماجىلىس زالىندا «پرەزيدەنت سايلاۋى جاھاندىق سىن-قاتەرلەرگە بەرىلگەن ءتيىمدى جاۋاپ رەتىندە» اتتى دوڭگەلەك ۇستەل ءوتتى. جيىنعا ۋنيۆەرسيتەت باسشىلىعى, ساياساتكەرلەر كونگرەسىنىڭ مۇشەلەرى, اكىمشىلىك قۇقىق كافەدراسىنىڭ پروفەسسورلارى قاتىستى. قازاقستان حالقى اسسامبلەياسىنىڭ كەڭەسىندە ۇسىنىلعان كەزەكتەن تىس پرەزيدەنت سايلاۋى بۇگىنگىنىڭ باستى جاڭالىعىنا اينالعانى راس. ويتكەنى, پرەزيدەنت قىزمەتى – جاريا قىزمەت, ءۇلكەن جاۋاپكەرشىلىكتى تالاپ ەتەدى. ءبىر ۇلتتىڭ تاعدىرى, ياكي بولاشاعى باسشىنىڭ سول ەلگە جاساعان قىزمەتىنەن, يگىلىكتى ىسىنەن كورىنەرى حاق. وسى ورايدا, زاڭ عىلىمدارىنىڭ دوكتورى, «قۇقىقتىق تاربيە» ورتالىعىنىڭ ديرەكتورى ارىقباي اعىباەۆ: «بۇگىنگىنىڭ كۇن تارتىبىندە تۇرعان ءبىرىنشى ماسەلە «ءتىل» ماسەلەسى. پرەزيدەنت ۇلكەن لاۋازىمدى تۇلعا بولعاندىقتان, ودان مەملەكەتتىك ءتىلدى تالاپ ەتەمىز. ال پارلامەنت دەپۋتاتتارى مەن اكىمدەردەن مۇنى نەگە تالاپ ەتپەيمىز؟ مەملەكەتتىك قىزمەتتەگى ادام مەملەكەتتىك ءتىلدى جەتىك بىلەتىن بولسا, ۇلتتىڭ بولاشاعى زور, كەلەشەگى كەمەل بولادى. ورتالىق سايلاۋ كوميسسياسى سايلاۋدىڭ قالاي جانە قاي كۇنى وتەتىن مەرزىمىن تىزبەكتەپ جاريالادى. كونستيتۋتسيامىزدا پرەزيدەنت بولۋعا اركىمنىڭ ءوزىن ۇسىنۋعا دەيىن قۇقىعى بار ەكەندىگى ايتىلادى. ەندەشە, حالقىمىزدىڭ وركەندەپ ءوسۋ جولىندا ايانباي تەر توگەتىن ابزال جاننىڭ ساياساتىن قولدايىق, داۋىس بەرەيىك», دەدى. ال فيلوسوفيا عىلىمدارىنىڭ دوكتورى, ءدىنتانۋ جانە مادەنيەتتانۋ كافەدراسىنىڭ پروفەسسورى تۇرسىن حافيز ۇلى «سايلاۋ نەگىزىنەن باتىس وركەنيەتىنە ءتان. ولاردىڭ تۇسىنىگىندەگى دەموكراتيامەن جانە ساياسي تاڭداۋمەن ءبىز شارا جۇرگىزۋىمىز كەرەك. شىن مانىندە, سايلاۋدىڭ دا ماقساتى ءوز حالقىنا, ءوز ادامدارىنا ەركىن تاڭداۋ جاعدايىن تۋعىزىپ, ادامدىق ىنتىماقتاستىقتى ارتتىرۋ كوزى بولىپ تابىلادى. ءبىزدىڭ ەلدەگى سايلاۋدىڭ كەڭەيتىلگەن ءتارتىبى وسىلاي قالىپتاسقان», دەپ ءوز پىكىرىن ورتاعا سالدى. جاستاردىڭ اتىنان ءسوز سويلەگەن قازۇۋ-دىڭ جاستار ۇيىمدارى كوميتەتىنىڭ جەتەكشىسى نۇرلان ابدىقادىروۆ قازۇۋ جاستارى كەزەكتەن تىس پرەزيدەنتتىك سايلاۋدى تولىعىمەن قولدايدى, دەي كەلە ۋنيۆەرسيتەتتىڭ ستۋدەنتتەرى ءبىر كىسىدەي سايلاۋعا قاتىسىپ, وزىندىك ۇلەسىن قوسۋعا نيەتتى ەكەندىگىن جەتكىزدى. ايناش ەسالي, «ەگەمەن قازاقستان». الماتى.ۇلتتىق يادرولىق ورتالىقتاعى جيىن
ەلىمىزدىڭ ۇلتتىق يادرولىق ورتالىعىنىڭ ۇجىمى الداعى كەزەكتەن تىس پرەزيدەنتتىك سايلاۋعا ءبىر كىسىدەي قاتىساتىندىقتارىن جەتكىزدى. جالپى, ۇلتتىق يادرولىق ورتالىعى ۇجىمىنىڭ ساياسي بەلسەندىلىگى جوعارى. مەملەكەت باسشىسى نۇرسۇلتان نازارباەۆ اعىمداعى جىلدىڭ 27 اقپانىندا پرەزيدەنتتىك سايلاۋدى وتكىزۋ تۋرالى جارلىققا قول قويعاندا دا كۋرچاتوۆتىق عالىمدار اتالعان شەشىمدى وزدەرىنىڭ قىزۋ قولدايتىندىقتارىن بىلدىرگەن ەدى. بۇل جولعى جيىنعا كاسىپورىننىڭ 200-دەن استام قىزمەتكەرى قاتىستى. ۇلتتىق يادرولىق ورتالىقتىڭ باس ديرەكتورىنىڭ مىندەتىن اتقارۋشى سەرگەي بەرەزين, كۋرچاتوۆ قالالىق اۋماقتىق كوميسسياسىنىڭ توراعاسى سامات سماعۇلوۆ, «نۇر وتان» پارتياسى كۋرچاتوۆ قالاسى فيليالى توراعاسىنىڭ ءبىرىنشى ورىنباسارى ليۋبوۆ كيسەلەۆا, ەكولوگيا جانە رادياتسيالىق قاۋىپسىزدىك ينستيتۋتىنىڭ عىلىمي حاتشىسى ءنۇريا قادىروۆا سەزد قورىتىندىلارى مەن ەلباسى تاپسىرمالارىن جۇزەگە اسىرۋ جانە سايلاۋدىڭ ءادىل ءارى اشىق وتۋىنە اتسالىسۋ قاجەتتىگى جونىندە اڭگىمەلەدى. جيىندا العاشقى كەزەكتە ەلەكتورالدىق ناۋقان كەزەڭدەرى تالقىلانىپ, ۋچاسكەلىك جانە اۋماقتىق سايلاۋ كوميسسيالارى تۋرالى ماسەلەلەر قارالدى. كۋرچاتوۆ قالاسى بويىنشا 1 اۋماقتىق جانە 4 ۋچاسكەلىك سايلاۋ كوميسسياسى جۇمىس ىستەيدى. وندا كەزەكتەن تىس سايلاۋعا دايىندىق جۇمىستارى باستالىپ تا كەتتى. سايلاۋ ۋچاسكەلەرىنىڭ شەكارالارى انىقتالىپ, قالاداعى داۋىس بەرۋشىلەردى حاباردار ەتۋ ءۇشىن مەرزىمدى باسپاسوزگە جاريالاندى. كەزدەسۋگە قاتىسۋشىلار كوميسسيانىڭ جۇمىس كەستەسى, بەكىتىلگەن تالون بويىنشا جانە ۇيدە داۋىس بەرۋ مۇمكىندىكتەرىن سۇرادى. سونداي-اق, ۇلتتىق يادرولىق ورتالىق قىزمەتكەرلەرى بارشا وتانداستارىمىزدى الداعى 26 ءساۋىر كۇنىنە تاعايىندالعان كەزەكتەن تىس پرەزيدەنتتىك سايلاۋعا ءبىر كىسىدەي قاتىسۋعا شاقىردى. «قازاقستاننىڭ وسىناۋ تاريحي ماڭىزدى كەزەڭىندە ەلىمىزدىڭ ءار ازاماتى كەزەكتەن تىس وتكىزىلەتىن پرەزيدەنتتىك سايلاۋعا داۋىس بەرۋگە قاتىسۋى ءتيىس», دەلىنگەن ەڭبەك ۇجىمى قابىلداعان ۇندەۋدە. دۋمان اناش, «ەگەمەن قازاقستان». شىعىس قازاقستان وبلىسى, كۋرچاتوۆ قالاسى.تاعدىر ورتاق, مۇمكىندىكتەرىمىز تەڭ
سارسەنبى كۇنى الماتىدا ۇكىمەتتىك ەمەس ۇيىمدار كوشباسشىلارىنىڭ كەزدەسۋى بولىپ ءوتتى. جالپىقالالىق كونفەرەنتسيا بارىسىندا ەلباسىنىڭ «نۇرلى جول – بولاشاققا باستار جول» جولداۋىنىڭ جۇزەگە اسىرىلۋىندا ازاماتتىق سەكتور نە اتقارىپ وتىر دەگەن ساۋال توڭىرەگىندە اڭگىمە ءوربىپ, الدا كەلە جاتقان پرەزيدەنت سايلاۋىنا قاتىستى ۇستانىمدار ورتاعا سالىندى. كونفەرەنتسيادا «شىراق» قق ءتورايىمى ءلاززات قالتاەۆا, «نامىس» قق توراعاسى قايرات يماناليەۆ, الماتى قالالىق مۇگەدەكتەر قوعامى باسقارماسىنىڭ توراعاسى ءالي امانباەۆ پەن وزگە دە ارداگەرلەر, قوعامدىق جانە ۇكىمەتتىك ەمەس ۇيىمداردىڭ وكىلدەرى ءسوز الىپ, كوزقاراستارىن ءبىلدىردى. سول سياقتى «حالىقارالىق قۇقىق قورعاۋ ورتالىعى» قق توراعاسى ءجاندىلدا جاقىپوۆ: – بىزدەر, ۇەۇ كوشباسشىلارى كونفەرەنتسياسى, قازىرگى تاعدىرشەشتى تاريحي كەزەڭنىڭ ماڭىزدىلىعىن تۇسىنە وتىرىپ, بارلىق قازاقستاندىقتاردى 2015 جىلدىڭ 26 ساۋىرىندە وتەتىن قازاقستان رەسپۋبليكاسىنىڭ پرەزيدەنتى سايلاۋىنا داۋىس بەرۋگە شاقىرامىز. بۇگىنگى قازاقستان – تەڭ قۇقىقتى, بىردەي مۇمكىندىكتەردى, كونفەسسياارالىق جانە ەتنوسارالىق كەلىسىمدى, قوعامدىق ۇدەرىستەر مەن ەكونوميكانى جاڭعىرتۋ جولىن تاڭداعان ەل. بىزدەر كەزەكتەن تىس سايلاۋ وتكىزۋ شەشىمىن قازىرگى الاساپىران, اۋمالى-توكپەلى كەزەڭدەردە سىرتقى قاۋىپتەن ساقتانۋدىڭ بىردەن-ءبىر جولى رەتىندە قاراستىرىپ, تۇسىنىستىكپەن قابىلدايمىز. ءبىزدىڭ ارقايسىمىز ءدىني سەنىمىمىزگە, ۇلتىمىزعا قاراماستان, ەشقانداي الالاۋسىز جاقسى ءبىلىم الۋعا, مەديتسينالىق قامقورلىققا, مانساپ قۋعا, تۇلعا رەتىندە قالىپتاسۋعا قۇقىلىمىز. ازاماتتىق قوعام دا جوعارى ماقساتتار, باقۋاتتىلىق پەن ەلدىڭ كوركەيۋى جولىندا جۇمىلا الادى, – دەدى. ماڭىزدى ماجىلىستە ۇەۇ جەتەكشىلەرى كەزەكتەن تىس پرەزيدەنت سايلاۋىن قولدايتىندىقتارىن ءبىلدىرىپ, ءوز پىكىرلەرىن دايەكتەدى. ايناش ەسالي, «ەگەمەن قازاقستان». الماتى.
