سولتۇستىك قازاقستاندا قار تازالايتىن تەحنيكالار كوبەيدى

پەتروپاۆل. 19 اقپان. سولتۇستىك قازاقستاندا قار تازالاۋ جۇمىستارىنا وبلىستىق قازىنادان 230 ميلليون تەڭگە ءبولىندى. بۇل تۋرالى توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى حابارلادى. بۇگىندە ەكى مىڭنان استام قۇتقارۋشى, 1250 تەحنيكا, 315 جىلىتۋ قوسىنى قىسقى ماۋسىمعا تىڭعىلىقتى دايىندىقتارمەن كىرىسىپ, توتەنشە جاعدايلاردى بولدىرماۋدىڭ شارالارىن جان-جاقتى قاراستىرىپ كەلەدى. بيىل وبلىستا قار وتە قالىڭ. سارشۇناق اياز بەن دولى بوران سالدارىنان شالعايداعى ەلدى مەكەندەردىڭ قار قۇرساۋىنان شىعا الماي قالاتىن كەزدەرى كەزدەسەدى. تابيعاتتىڭ توسىن «مىنەزدەرىنە» بايلانىستى كەي اۋدانداردا توتەنشە جاعداي جاريالاندى. وسىنداي قيىندىقتاردى ەسكەرگەن بولۋ كەرەك, توتەنشە جاعدايلار جونىندەگى مينيسترلىكتىڭ شەشىمىنە سايكەس وبلىسقا 2 شنەكوروتور, 3 بۋلدوزەر مەن 3 اۆتوگرەيدەر تەحنيكالارى بەرىلدى. ولار اۋداندارعا جىبەرىلىپ, جەر-جەرلەردە جەدەل ارەكەت ەتۋ وتريادتارى قۇرىلدى. ءومىر ەسقالي. دەرەك: سولتۇستىك قازاقستان وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى. سۋرەت: akimsemey.gov.kz.