فينالدىق ويىنداردىڭ سالتاناتتى اشىلۋ راسىمىندە قر جوعارعى سوتى ازاماتتىق ىستەر جونىندەگى سوت القاسىنىڭ توراعاسى نۇرسەرىك ءشارىپوۆ, قر سۋديالار وداعىنىڭ توراعاسى دوسجان ءامىر ءسوز سويلەپ, اتالعان سپورتتىق ءىس-شارانىڭ ماڭىزدىلىعى جونىندە ايتىپ, بارلىق قاتىسۋشىلارعا ساتتىلىك تىلەدى.
– سۋديالار سپارتاكياداسى – بۇل تەك سپورتتىق باسەكە عانا ەمەس, سونىمەن قاتار ەلىمىزدىڭ سوت جۇيەسىندە قىزمەت ەتەتىن ازاماتتاردىڭ دوستىعىن, كاسىبي ىنتىماقتاستىعىن جانە بىرلىگىن كورسەتەتىن ماڭىزدى ءىس-شارا. سالاۋاتتى ءومىر سالتىن قالىپتاستىرۋ, دەنە تاربيەسىن ناسيحاتتاۋ, بەلسەندى ءومىر ءسۇرۋ مادەنيەتىن دامىتۋ – سپارتاكيادانىڭ باستى ماقساتتارىنىڭ ءبىرى. سونىمەن قاتار, بۇل دودا ارىپتەستەر اراسىنداعى رۋحاني بايلانىستى نىعايتىپ, سوت جۇيەسىنىڭ ادامگەرشىلىك جانە قوعامدىق بىرتۇتاستىعىن ايقىندايدى. وسى جولعى سپارتاكيادا ءوزىنىڭ اۋقىمدىلىعىمەن, جوعارى دەڭگەيدە ۇيىمداستىرىلۋىمەن جانە قاتىسۋشىلاردىڭ بەلسەندىلىگىمەن ەرەكشەلەندى. وسىنداي سايىستار ارقىلى ءبىز كاسىبي الەۋەتىمىزدى دە ارتتىرا تۇسەمىز, – دەدى قر سۋديالار وداعىنىڭ توراعاسى دوسجان ءامىر.
