اگروونەركاسىپتى دامىتۋ – جۇرتتى جۇمىسپەن قامتۋ

كەشە ورتالىق كوممۋنيكاتسيالار قىزمەتىندە «قازاگرو» ۇلتتىق باسقارۋشى كومپانياسى» اق باسقارما توراعاسىنىڭ مىندەتىن اتقارۋشى داۋرەن ماقاجانوۆ ءباسپاسوز ءماسليحاتىن وتكىزدى. ول حولدينگتىڭ وتكەن جىلى اتقارعان جۇمىستارى تۋرالى ايتىپ, الداعى جوسپارلارىمەن ءبولىستى. جىل قورىتىندىسىنا قاراعاندا, «قازاگرو» اگروونەركاسىپ كەشەنىن قارجىلاندىرۋعا بىلتىر 222 ملرد. تەڭگە كولەمىندە اقشا سالىپتى. «وتكەن جىلى اگروونەركاسىپ كەشەنىندەگى سۋبەكتىلەردى قارجىلاي ساۋىقتىرىپ, قولداۋعا جانە ينۆەستيتسيالىق جوبالاردى جۇزەگە اسىرىپ, شارۋالاردىڭ تەحنيكاسىن جاڭارتۋدا كوپ جۇمىس اتقاردىق. نەسيەنى تەك قانا تەڭگەمەن بەرۋگە ۇلكەن تاۋەكەل كەرەك بولدى. مۇنىمەن بىرگە, ناق ءبىر جىل بۇرىن تەڭگە باعامىنا تۇزەتۋ جاسالدى. سوعان قاراماستان حولدينگ جىلدى 5,7 ملرد. تەڭگە كولەمىندە پايدامەن قورىتىندىلادى. بىلتىر سالانى قارجىلاندىرۋعا 222 ملرد. تەڭگە جۇمسالدى. بۇل 2013 جىلمەن سالىستىرعاندا 15 پايىزعا ارتىق ەكەنىن ايتقىم كەلەدى», دەدى د.ماقاجانوۆ. سپيكەردىڭ سوزىنە سەنسەك, اگروونەركاسىپ كەشەنىن دامىتۋعا ارنالعان شارالاردىڭ ارقاسىندا 41,2 مىڭ ادام جۇمىسپەن قام­تىلىپتى. حولدينگتە مەملەكەت باسشىسىنىڭ تاياۋدا بەرگەن تاپسىرماسىن ورىنداۋ ءىسى دە تىڭعىلىقتى جۇرگىزىلىپ جاتىر ەكەن. ناقتى كورسەتەر بولساق, «قازاگرو» 559 ملن. تەڭگە كولەمىندە ءتيىمسىز شىعىستاردى قىس­قارتۋدى كوزدەپ وتىرعان كورىنەدى. شى­عىستاردى وڭتايلاندىرۋعا بايلانىستى بەيىنسىز اكتيۆتەردى قىسقارتۋ جوسپاردا تۇر. بۇيىرتسا, بيىل 559 ملن. تەڭگە كولەمىندە ءتيىمسىز شىعىستاردى قىسقارتامىز. ول بويىنشا ءبىرىنىڭ جۇمىسىن ەكىنشىسى قايتالاپ وتىرعان بولىمدەر مەن قىزمەتكەرلەر جۇمىستان بوساتىلادى. شامامەن 93-تەن 73 ادامعا دەيىن قىسقارتۋ كوزدەلگەن. ناتيجەسىندە, اكىمشىلىك شى­عىندار 194,7 ملن. تەڭگەگە, ياعني 12 پايىز­عا قىسقارادى», دەدى ول. ايتكەنمەن, اگروونەركاسىپتى دامىتقان سايىن, ادامداردى جۇمىس­پەن قامتۋ مۇمكىندىگى ارتا بەرەتىنىن دە مەڭزەدى. حولدينگ اعىمداعى جىلى 15 ينۆەستي­تسيالىق جوبانى پايدالانۋعا بەرەدى ەكەن. «نەگىزى, حولدينگتىڭ ينۆەستيتسيالىق قورجى­نىندا 477 جوبا بار. ولاردىڭ جالپى قۇنى 309,1 ملرد. تەڭگەگە تەڭ. نازار سالساڭىزدار, بۇگىنگە دەيىن 365 جوبا ىسكە قوسىلىپ, ونىڭ 236-سى تولىق قۋاتىندا جۇمىس ىستەپ تۇر. ال بيىل 75 ينۆەستيتسيالىق جوبا­نى پايدالانۋعا بەرۋدى ويلاپ وتىرمىز», دەدى د.ماقاجانوۆ. «قازاگرو» ينۆەس­تي­تسيالىق جوبالارمەن وڭىرلەردى قامتۋ شاراسىن دا بىرىزدەندىرىپ, اۋقىمىن كەڭەي­تىپ كەلەدى ەكەن. مىسالى, وتكەن جىلمەن سالىستىرعاندا 28 اۋدان جانە اۋداندىق ماڭىزى بار التى قالا جىلدى ارتىق كور­سەتكىشپەن قورىتىندىلاپتى. نۇرباي ەلمۇراتوۆ, «ەگەمەن قازاقستان».