رونالدۋ «رەالدان» كەتەتىن بولدى

استانا. 20 ناۋرىز. كريشتيانۋ رونالدۋ وسى جىلدىڭ جازىندا نەمەسە 2016 جىلى كورولدىك كلۋبتان كەتەتىن بولدى. «رەالدىڭ» پرەزيدەنتى فلورەنتينو پەرەس وسى قادامدى دۇرىس دەپ سانايدى. سەبەبى, ول فۋتبولشىنىڭ كەلىسىمشارتى اياقتالعانعا دەيىن كلۋبتا قالعانىن قالامايدى. بۇل تۋرالى egemen.kz حابارلادى. «قازىرگى كەلىسىمشارت 2018 جىلعا دەيىن. ول كەزدە فۋتبولشى 34 جاستا بولادى. سوعان قاراماستان رونالدۋدىڭ ترانسفەرلىك باعاسى بۇگىننەن باستاپ تۇسۋدە. ونىڭ ۇستىنە, كريشتيانۋدىڭ مۇلدەم جازىلمايتىن جاراقاتتارى بار. بۇل الداعى ۋاقىتتا ونىڭ ويىنىنا كەرى اسەرىن تيگىزەرى انىق», – دەپ, پەرەس مىرزا ءوزىنىڭ ارەكەتىن تۇسىندىرۋگە تىرىستى. سونىمەن قاتار, كەيىنگى كەزدەرى رونالدۋدىڭ ءتارتىبى دە ءجيى سىنعا ۇشىراپ ءجۇر. كەيبىر جانكۇيەرلەر كلۋب پرەزيدەنتىنىڭ الگىندەي ءسوز ايتۋىنا وسى ماسەلە باستى سەبەپ بولدى دەگەندى العا تارتادى. دەسەك تە, ايتىلعان ءسوز – اتىلعان وق. سوندىقتان الداعى ۋاقىتتا فۋتبول الەمىندەگى تاعى ءبىر ءىرى ترانسفەرلىك اۋىسىمنىڭ كۋاسى بولۋىمىز ابدەن مۇمكىن. جانكۇيەرلەردىڭ ايتۋىنشا, پورتۋگاليا فۋتبولشىسى «رەالعا» دەيىن ويناعان «مانچەستەر يۋنايتەد» كومانداسىنا قايتا بارۋى عاجاپ ەمەس. ءتىپتى ميۋ-دىڭ بۇرىنعى باس جاتتىقتىرۋشىسى الەكس فەرگيۋسسون وسى ماسەلە بويىنشا رونالدۋمەن ارنايى كەزدەسكەن دەگەن دە اڭگىمەلەر ايتىلا باستادى. كريشتيانۋ رونالدۋ 1985 جىلدىڭ 5 اقپانىندا پورتۋگاليانىڭ مادەيرا قالاسىندا دۇنيەگە كەلدى. ليسسابوننىڭ «سپورتينگىندە» ءتالىم العان ول 2003-2009 جىلدارى «مانچەستەر يۋنايتەد» كومانداسىندا وينادى. التى جىلدىڭ ىشىندە اعىلشىن كلۋبى ءۇشىن 196 ويىن وتىكىزىپ, 84 گول سوقتى. ال 2009 جىلى ءمادريدتىڭ «رەالىنا» اۋىستى. سول كەزدە فلورەنتينو پەرەس فۋتبولشى ءۇشىن ميۋ-عا 93,4 ميلليون ەۋرو تولەگەنىن ايتا كەتەيىك. بۇل سول كەزدەگى رەكوردتىق مەجە ەدى. سودان بەرى فۋتبولشى «رەال» ساپىندا 189 ويىن وتكىزىپ, 207 گول سوقتى. ەلامان قوڭىر. دەرەك: egemen.kz. سۋرەت: sportbox.az.