سولتۇستىك قازاقستان رەسەي ءورت سوندىرۋشىلەرى بىرلەسكەن جاتتىعۋ وتكىزدى

پەتروپاۆل. 23 ماۋسىم. سولتۇستىك قازاقستان وبلىسى مەن رەسەي فەدەراتسياسىنىڭ شەكارالاس ايماقتارىندا توتەنشە جاعدايلاردىڭ, قاۋىپتى تابيعي اپاتتاردىڭ الدىن الۋ بويىنشا بىرلەسكەن وقۋلار, جاتتىعۋلار العاش رەت 2012 جىلى وتكەن بولاتىن.  سودان بەرى ۇزبەي ۇيىمداستىرىلىپ كەلەدى.قوس تاراپقا پايداسى مول ءداستۇر بيىل دا جالعاسىن تاپتى.  بۇل تۋرالى وبلىستىق توتەنشە جاعدايلار جونىندەگى دەپارتامەنتتىڭ ماماندارى حابارلادى. جازدىڭ ىستىق كۇندەرىنە قاراماستان قورعان وبلىسى پەتۋحوۆ اۋدانى زوتينا اۋىلىنا تاياۋ جازىق دالاعا قۇرامىندا 50 تەحنيكا بىرلىگى, 180-گە جۋىق ادام كۇشى بار ەكى وبلىستىڭ ازاماتتىق قورعانىس جانە توتەنشە جاعدايلار, اۆاريالىق-قۇتقارۋ قىزمەتتەرى, جەدەل مەديتسينالىق كومەك بولىمشەلەرىنىڭ جەكە قۇرامدارى ورنالاسىپ, قىسقا نۇسقاۋلىقتاردان كەيىن جەدەل ىسكە كىرىستى.  الدىمەن وتتى ابايسىز پايدالانۋ سالدارىنان قىزىل جالىنعا   ورانعان ورمان القاپتارىنا جەدەل كومەك كەلىپ جەتتى. تابيعي اپاتتىڭ ەكپىنىن قايتارۋ ءۇشىن قولداعى كۇش پەن تەحنيكا قۇرالدارى ۇتىمدى پايدالانىلدى.  «ءتىلسىز جاۋدىڭ» سالدارىنان اۆتوجولدا جولاۋشىلارى بار «موسكۆيچ» كولىگى ورتەنە باستاعانىن بايقاعان قۇتقارۋشىلار بىردەن كومەك قولىن سوزدى. زارداپ شەككەن ادامدارعا العاشقى مەديتسينالىق جەدەل جاردەم كورسەتىلىپ, پەتۋحوۆ اۋداندىق ورتالىق اۋرۋحاناسىنا اپارىلدى. ورتكە قارسى قىزمەت بولىمدەرى وسىلايشا بىرلەسە قيمىلداپ, شەبەرلىكتەرىن كورسەتتى. قىسقا مەرزىم ىشىندە ءورت وشاقتارى تولىعىمەن  جويىلدى. ءورت ءسوندىرۋ شتابى قالىپتاسقان جاعدايدى ەسەپكە الا وتىرىپ, وقۋ-جاتتىعۋ جۇمىستارىنا ۇيلەسىمدى باسشىلىق ەتتى. قورعان وبلىستىق توتەنشە جاعدايلار باسقارماسى باسشىسىنىڭ ورىنباسارى الەكسەي تكاچەۆ وقۋ-جاتتىعۋدىڭ جوعارى دەڭگەيدە ۇيىمداستىرىلعانىن, قازاقستان مەن رەسەيدىڭ ءورت سوندىرۋشىلەرىنىڭ ۇيلەسىمدى ارەكەتىن, تەحنيكانى بىلىكتى باسقارۋىن, وقۋ-جاتتىعۋ جەتەكشىلەرىنىڭ ءورتتى ءسوندىرۋ بارىسىنداعى وپەراتيۆتى جاعدايدى تالداۋىن وڭ باعالادى. ارىپتەستەر ورمان ورتتەرىمەن كۇرەسۋ تاجىريبەسىمەن ءبولىسىپ, ورمان شارۋاشىلىعى ۇيىمدارىنىڭ اراسىنداعى ۇيلەستىرۋ ماسەلەلەرىنە ەرەكشە توقتالدى. سولتۇستىك قازاقستان وبلىستىق توتەنشە جاعدايلار دەپارتامەنتى باسشىسىنىڭ ورىنباسارى نۇرلان اتىعاەۆ ادام ومىرىنە ەرەكشە قاۋىپ توندىرەتىن تابيعاتتىڭ ايتىپ كەلمەس ءتىلسىز اپاتتارىنىڭ الدىن الۋدىڭ ماڭىزدىلىعىنا توقتالدى. «بۇگىنگى وقۋلار بىرلەسكەن كۇشپەن توتەنشە جاعدايلارعا قارسى كۇرەستە ءتيىمدى ناتيجەلەرگە قول جەتكىزۋگە بولاتىنىڭ كورسەتتى.  ەكى مەملەكەتتىڭ شەكاراسىن ءورت شالمايتىنىنا سەنىمدىمىز», دەدى نۇرلان باۋىرجان ۇلى. ءومىر ەسقالي. دەرەك, سۋرەت: سولتۇستىك قازاقستان وبلىستىق توتەنشە جاعدايلار جونىندەگى دەپارتامەنتى.