فوتو: ۆيدەودان الىنعان كادر
اپاتقا ۇشىراعان اۋە كەمەسى «انگارا» اۋە كومپانياسىنا تيەسىلى بولعان. ول حاباروۆسك – بلاگوۆەششەنسك – تىندا باعىتى بويىنشا رەيس ورىنداعان. ۇشاق تىندا قالاسىنا قونۋ كەزىندە اپاتقا ۇشىراعان. اۋە كەمەسى اۋەجايعا بىرنەشە شاقىرىم قالعاندا راديوبايلانىسقا شىقپاي قالعان. العاشقى قونۋ ارەكەتى ءساتسىز اياقتالىپ, ۇشاق ەكىنشى اينالىمعا كەتكەننەن كەيىن راداردان جوعالىپ كەتكەن. كەيىن بەلگىلى بولعانداي, اۋە كەمەسى تاۋلى ايماقتاعى ءبىر جوتانىڭ ەتەگىنە سوعىلىپ, جەرگە قۇلاعان.
رەسمي دەرەكتەرگە سايكەس, ۇشاق بورتىندا 49 ادام بولعان, ولاردىڭ التاۋى ەكيپاج مۇشەلەرى, قالعان 43-ءى جولاۋشىلار, ونىڭ ىشىندە بەس بالا بار. امۋر وبلىسىنىڭ ازاماتتىق قورعانىس جانە ءورت قاۋىپسىزدىگىن قامتاماسىز ەتۋ ورتالىعىنىڭ مالىمەتىنشە, اپات ورنىنا اۋەدەن جۇرگىزىلگەن شولۋ بارىسىندا ءتىرى قالعاندار انىقتالماعان. الايدا, جەردەگى ىزدەۋ جۇمىستارى بارىسىندا جاعداي ناقتىلانۋى مۇمكىن.
ۇشاقتىڭ سىنىقتارى تىندا قالاسىنان 16 شاقىرىم جەردەن تابىلعان. Telegram-ارنالاردا جاريالانعان اقپارات بويىنشا, ۇشاقتىڭ قالدىقتارى جارتى شاقىرىم اۋماققا شاشىلىپ كەتكەن. رەسەيدىڭ توتەنشە جاعدايلار مينيسترلىگى اپات ورنىنان ۇشاقتىڭ جانىپ جاتقان فيۋزەلياجى تابىلعانىن راستاعان.
قازىرگى ۋاقىتتا تەرگەۋ امالدارى باستالىپ, وقيعانىڭ ءمان-جايى انىقتالىپ جاتىر.
