سىرتقى ىستەر مينيسترلىگى ءباسپاسوز قىزمەتىنىڭ مالىمەتىنشە, جيىنعا امەريكالىق ترانسۇلتتىق كورپوراتسيالار, ينۆەستيتسيالىق قورلار مەن ەلىمىزدىڭ مەملەكەتتىك ورگاندارىنىڭ وكىلدەرى قاتىستى. كەزدەسۋ بارىسىندا ينۆەستيتسيالىق سەرىكتەستىكتىڭ باسىم باعىتتارى, ونىڭ ىشىندە شيكىزاتتىق ەمەس سەكتورلاردى دامىتۋ, ورنىقتى ءوسۋ تەحنولوگيالارى, ينفراقۇرىلىم جانە ءوندىرىستى جەرگىلىكتەندىرۋ ماسەلەلەرى تالقىلانعان.
جالپى, اقش – ەلىمىزدىڭ ەكونوميكاسىنا 62 ملرد دوللاردان اسا تىكەلەي ينۆەستيتسيا سالعان ءىرى ينۆەستور. وسى ورايدا سىرتقى ىستەر مينيسترلىگى ينۆەستيتسيالار كوميتەتىنىڭ توراعاسى عابيدوللا وسپانقۇلوۆ اقش بيزنەسىنىڭ ەلىمىزگە دەگەن قىزىعۋشىلىعى ارتىپ كەلە جاتقانىن اتاپ ءوتتى: «اقش – ءبىزدىڭ نەگىزگى ستراتەگيالىق سەرىكتەسىمىز. بۇگىندە وتاندىق نارىقتا ءىرى امەريكالىق كومپانيالار تابىستى جۇمىس ىستەپ جاتىر جانە ولاردىڭ قاتارىن كەڭەيتۋگە مۇددەلىمىز. ءبىز تەك كاپيتال تارتۋعا ەمەس, بىرلەسكەن وندىرىستەردى ىسكە قوسۋعا, وزىق تەحنولوگيالاردى ەنگىزۋگە جانە جاڭا ەكسپورتتىق تاۋارلاردى دامىتۋعا ۇمتىلامىز. وسى كەزدەسۋ جاڭا جوبالارعا قوسىمشا سەرپىن بەرەدى دەپ سەنەمىز».
سونداي-اق ساپار اياسىندا اقش ساۋدا پالاتاسىنىڭ تاياۋ شىعىس, تۇركيا جانە قازاقستان بويىنشا ۆيتسە-پرەزيدەنتى دجەننيفەر ميلمەن كەزدەسۋ ءوتتى. تاراپتار قازاقستان مەن اقش اراسىنداعى ىسكەرلىك سەرىكتەستىكتىڭ قازىرگى جاي-كۇيىن جانە قازاقستاندىق-امەريكالىق ىسكەرلىك كەڭەس اياسىنداعى ءوزارا ءىس-قيمىلدى كەڭەيتۋ جولدارىن تالقىلادى. اسىرەسە ەلىمىزدىڭ امەريكالىق بيزنەس قاۋىمداستىعى اراسىندا تانىمالدىلىعىن ارتتىرۋ جانە ناقتى ينۆەستيتسيالىق باستامالاردى ىسكە اسىرۋ ماسەلەلەرىنە باسا نازار اۋدارىلدى.
بۇعان قوسا كوميتەت باسشىسى «Jones Equity Fund», «Heeney Capital», «Honeywell», «IG Global», «Amazon Kuiper», «Jennmar» جانە باسقا دا كومپانيالار وكىلدەرىمەن بىرقاتار ەكىجاقتى كەزدەسۋ وتكىزدى. ەل تاراپى جوبالاردى تولىق سۇيەمەلدەۋگە, سونىڭ ىشىندە اكىمشىلىك قولداۋ كورسەتۋگە, مەملەكەتتىك قولداۋ شارالارىنا جانە جەرگىلىكتى سەرىكتەستەردى ىزدەۋگە دايىن ەكەنىن جەتكىزدى.
كامشات تولەگەنوۆا,
ل.ن.گۋميلەۆ اتىنداعى ەۇۋ-دىڭ 2-كۋرس ستۋدەنتى
