باسقارماداعىلار قاراقۇم اۋىلدىق وكرۋگىندەگى كوكاشا ەلدى مەكەنىندە زيانكەستەر تۇرعىن ۇيلەر اۋلاسىنا دەيىن جەتكەنىن ايتادى. قازىر كوكاشاداعى 4 ءۇي تولىق باقىلاۋعا الىنىپ, قاجەتتى شارالار قولعا الىندى. قالعان اۋىلدىق وكرۋگ ورتالىقتارىندا مۇنداي دەرەكتەر تىركەلمەگەن.
بيىل زيانكەستەر جىلداعىدان ەرتە «ويانىپ», ءساۋىر ايىنىڭ سوڭىندا بايقالا باستاعان. ءساۋىردىڭ سوڭىندا قاراقۇم اۋىلدىق وكرۋگىنە قاراستى ايدارلى شوقالاق, ىزبانقۇمى, تورتقارا وڭىرلەرىندە, سونداي-اق سازدى اۋىلدىق وكرۋگىندەگى بايسەمباي قۇمى, تازشا توبە جانە ەسكەنە وڭىرلەرىندە يتاليالىق پرۋستىڭ دەرناسىلدەرى انىقتالىپتى. ءسال كەيىن اققۇم وكرۋگىندەگى تەڭىزباي قۇمى مەن ايتجانتابان اۋماقتارىنان, ال 5 مامىردا قوسامان مەن جىڭىشكەقۇم اۋىلدىق وكرۋگتەرىنەن دە زيانكەستەردىڭ بەلسەندىلىگى بايقالا باستاعان. وسىعان بايلانىستى كەيىن كوكتەمگى-جازعى ماۋسىمعا ارنالعان مونيتورينگ جۇمىستارى شۇعىل تۇردە باستالىپ, ناقتى وڭدەۋ اۋماقتارى مەن تەحنيكا تۇرلەرى انىقتالىپ, ىسكە قوسىلدى. اققۇم, قاراقۇم, جىڭىشكەقۇم جانە قوسامان اۋىلدىق وكرۋگتەرىندەگى شارۋاشىلىق جەرلەرىندە 5 جەر اگرەگاتى, قاراقۇمدا 2 اسا جەڭىل ۇشاق, سازدىدا 3 درون كومەگىمەن حيميالىق وڭدەۋ شارالارى جۇرگىزىلىپ جاتىر. بۇگىنگى كۇنگە دەيىن 7 742 گەكتار اۋماق حيميالىق وڭدەۋدەن ءوتتى. ال بۇگىننەن باستاپ مەردىگەر تاراپىنان ان-2 اۋە كولىگى قوسىلىپ, كۇردەلى رەلەفتى وڭىرلەردى وڭدەۋگە كىرىستى.
باسقا اۋىلدارمەن قاتار ۆيدەودا كورسەتىلگەن قاراقۇم ەلدى مەكەنىندە 7 جەر اگرەگاتى, 2 دەلتاپلان جانە 23 رانس قوندىرعىسى جۇمىس ىستەپ جاتىر.
اۋدان اۋماعىنداعى ارالقۇم, ساپاق, جىڭىشكەقۇم, بەكباۋىل اۋىلدىق وكرۋگتەرىنە قاراستى شارۋا قوجالىقتارى مەن مەملەكەتتىك جەر قورلارىنا دا زيانكەستەردەن زالال كەلگەنى انىقتالدى. وسىعان بايلانىستى ساپاق اۋىلدىق وكرۋگىنىڭ كوكتەم ەلدى مەكەنىندە ورنالاسقان شارۋا قوجالىقتارىنا تيەسىلى 157 گەكتار ارنايى تەحنيكامەن وڭدەلىپتى.
قازىر ءتيىستى ورىندار مەن مەردىگەر مەكەمەلەر وكىلدەرى شەگىرتكە جايلاعان اۋماقتا ءجۇر.
