سۋرەت: facebook.com/batyskz
مارتەبەلى مەيماندى اۋەلى باتىس قازاقستان وبلىسىنىڭ اكىمى ناريمان تورەعاليەۆ قابىلداپ, رەسمي كەزدەسۋ وتكىزدى. كەزدەسۋدە تاراپتار ەكىجاقتى ىنتىماقتاستىق, ونىڭ ىشىندە لوگيستيكا, كولىك, اگروونەركاسىپتىك كەشەن جانە قۇرىلىس سالالارىنداعى ماسەلەلەردى تالقىلادى. ەلشى ءوڭىردىڭ كاسىپكەرلەرىن ەلشىلىك ۇيىمداستىراتىن بيزنەس-ميسسيالار شەڭبەرىندە ليتۆا رەسپۋبليكاسىنا شاقىردى.
ايتا كەتەيىك, اقجايىق ءوڭىرى مەن ليتۆا اراسىندا كاسىپكەرلىك بايلانىس قازىردىڭ وزىندە جامان ەمەس. 2024 جىل قورىتىندىسىنا قاراعاندا باتىس قازاقستان وبلىسىنىڭ ليتۆا رەسپۋبليكاسىمەن تاۋار اينالىمى 877 مىڭ دوللار بولعان. ونىڭ ىشىندە ەكسپورت 262,4 مىڭ دوللاردى, ال يمپورت 614,6 مىڭ دوللاردى قۇراعان. مىسالى, يمپورتتىڭ نەگىزگى تاۋارى – ىرىمشىك پەن كيىم-كەشەك 500 مىڭ دوللارعا جەتسە, ەكسپورت – پوليەتيلەن قاپتار مەن پاكەتتەر 137 مىڭ دوللار بولىپتى. ەكى تاراپ بولاشاقتى ەكونوميكانىڭ بارلىق سالاسىندا ىنتىماقتاستىقتى ودان ءارى دامىتۋعا كەلىستى.
وسى ساپارعا وراي ورال قالاسىنىڭ كورمە زالىندا «Unseen Lithuania» اتتى كورمە اشىلىپ, ليتۆا مەملەكەتىنىڭ ەكونوميكالىق الەۋەتىن, كاسىپكەرلىك كۇش-قۋاتىن, مادەنيەتى مەن تاريحىن بەينەلەيتىن فوتولار قويىلدى.
بۇدان كەيىن ماحامبەت وتەمىس ۇلى اتىنداعى باتىس قازاقستان ۋنيۆەرسيتەتىندە ەلشىنىڭ ستۋدەنتتەرمەن كەزدەسۋى ءوتتى. كەزدەسۋ بارىسىندا ەگيديۋس ناۆيكاس مىرزا ليتۆا رەسپۋبليكاسى, ونىڭ جوعارى ءبىلىم بەرۋ جۇيەسى جانە اكادەميالىق ىنتىماق مۇمكىندىگى تۋرالى كەڭىنەن اڭگىمەلەدى. ستۋدەنتتەر حالىقارالىق ستيپەنديالار مەن عىلىم جانە ءبىلىم سالاسىنداعى بىرلەسكەن جوبالارعا قاتىسۋ مۇمكىندىگىنە قىزىعۋشىلىق تانىتتى. ەلشى ليتۆانىڭ ارىپتەستىككە ءازىر ەكەنىن, قازاقستاندىق جوعارى وقۋ ورىندارىمەن بايلانىستى دامىتۋعا مۇددەلى ەكەنىن اتاپ ءوتتى.
«قازىرگى زاماندا ءبىلىم بەرۋ سالاسىنداعى حالىقارالىق سەرىكتەستىك – ءبىزدىڭ ەلدەرىمىزدىڭ تۇراقتى بولاشاعىنا جاسالعان ينۆەستيتسيا», دەدى ەگيديۋس ناۆيكاس.
ساپار سوڭىندا قوناقتار بقۋ ارحەولوگيا مۋزەيىن ارالاپ, ءوڭىردىڭ ارحەولوگيالىق مۇرالارىمەن جانە ۋنيۆەرسيتەت عالىمدارىنىڭ جەتىستىكتەرىمەن تانىستى. ولار تاريحي-مادەني مۇرانى ساقتاۋ ماڭىزدىلىعىن اتاپ ءوتتى.
باتىس قازاقستان وبلىسى
