«مەن پاۆيلوندارىڭىزدىڭ 100 مىڭىنشى قوناعى بولعانىما وتە قۋانىشتىمىن, بۇل مەن ءۇشىن كۇتپەگەن توسىن سىي! مەن پاۆيلوننىڭ كونتەنتتىك مازمۇنىنا, اتاپ ايتقاندا, قازاق حاندىعىنىڭ قالىپتاسۋ تاريحىنا جانە تاريح پەن جاڭا تەحنولوگيالاردىڭ ۇيلەسىمىن كورىپ تاڭعالدىم. تامىرى تەرەڭگە جايىلعان تاريحتارىڭىزدى ۇمىتپاي, بولاشاققا دەگەن كوزقاراستارىڭىزدىڭ تاماشا ۇلگىسى – «ALEM» قۇرىلعىسى. ۇيىمداستىرۋشىلارعا جىلى لەبىزدەرى ءۇشىن جانە تاڭعاجايىپ ەلدىڭ باي مادەنيەتى مەن تاريحى تۋرالى كوبىرەك بىلۋگە مۇمكىندىك العانىم ءۇشىن راقمەت. قازاقستاننىڭ مادەنيەتىمەن تانىسۋ ءۇشىن قازاقستانعا بارىپ تۇركىستاندى كورگىم كەلەدى», دەدى اكيبا اكيحيتو.
قازاقستان پاۆيلونى مەن ەلىمىزدىڭ اتىنان 100 مىڭىنشى قوناقتى قازاقستان رەسپۋبليكاسىنىڭ جاپونياداعى توتەنشە جانە وكىلەتتى ەلشىسى ەرلان باۋداربەك-قوجاتاەۆ قۇتتىقتادى.
اكيبا اكيحيتوعا Karavansaray Turkistan تۋريستىك كەشەنىنە ەكى ادامعا ارنالعان سەرتيفيكات پەن ەستەلىك كادەسىيلار تابىستالدى.
كەلۋشىلەر سانىن ەسەپتەۋدى جاپوندىق EXPO 2025 Osaka دۇنيەجۇزىلىك كورمەسىن وتكىزۋ قاۋىمداستىعى ارنايى جابدىقتىڭ كومەگىمەن جۇرگىزەدى. قاۋىمداستىق ماماندارىنىڭ ايتۋىنشا, پاۆيلون شاعىن بولعانىمەن, قازاقستاندىق ەكسپوزيتسيا كورمە قوناقتارىنا ويلاستىرىلعان كونتەنتىمەن جانە جوعارى تەحنولوگيالىق ەكسپوناتتارىمەن قىزىقتى.
پاۆيلون كونتەنتتىك مازمۇنىنا, اتاپ ايتقاندا تاريحقا, مادەنيەتكە, ەكونوميكالىق كورسەتكىشتەرگە, ەكوجۇيەگە, تۋريزمگە, يننوۆاتسياعا اسا دەن قويىلىپ ازىرلەنگەن ءتورت ايماقتان تۇرادى.
سونىمەن قاتار پاۆيلون ەلدىڭ ينۆەستيتسيالىق جانە ەكونوميكالىق الەۋەتىن كورسەتەدى. سونداي-اق اعزالاردى ترانسپلانتاتسيالاۋ جانە وقشاۋلانعان ورگانداردى ەمدەۋ سالاسىنداعى جەتىستىك – «ALEM» (Astana Life Ex-situ Machine) يننوۆاتسيالىق قۇرىلعىسى ۇسىنىلدى. جەتەكشى قازاقستاندىق مەديتسينالىق زەرتتەۋشىلەر مەن ينجەنەرلەر ازىرلەگەن «ALEM» وقشاۋلانعان اعزادا قاجەتتى ارالاسۋلار مەن ماقساتتى ەمدەۋ جۇرگىزۋ مۇمكىندىگىمەن دونورلىق مۇشەلەردى 24 ساعاتتان ارتىق ساقتاۋعا مۇمكىندىك بەرەدى.
