ساۋدا ورتالىعىنىڭ ماركەتينگ ءبولىمىنىڭ اعا مەنەدجەرى اندرەي پوكوتيلوۆتىڭ ايتۋىنشا, نىسان اۋماعىندا تۇراقتى تۇردە تازالاۋ جۇمىستارى جۇرگىزىلەدى. وعان تروتۋارلار مەن جولداردى, اۆتوتۇراق ايماعىن, كىرەبەرىستى تازارتۋ, ۆيترينالاردى, كونديتسيونەردىڭ سىرتقى بلوكتارىن جۋ جانە باسقا دا جۇمىستار كىرەدى.
ء«بىز جىل سايىن «الماتى – ورتاق ءۇيىمىز» اكتسياسى اياسىنداعى ەكولوگيالىق ءىس-شارالارعا قاتىسامىز, ويتكەنى سۇيىكتى قالامىزدىڭ تازالىعىنا ءبارىمىز مۇددەلىمىز. اكتسياعا سوو-نىڭ بارلىق قىزمەتكەرى – شامامەن 40 ادام قاتىسادى. ءبىز كۇن سايىن ساۋدا ورتالىعىنىڭ ءىشىن دە, اينالاسىن دا تازالايمىز. كۇن جىلىنعان سوڭ اعاش وتىرعىزىپ, سۋبۇرقاقتى تولىقتاي جاڭارتۋدى جوسپارلاپ وتىرمىز. جاقىندا جوعارى ساپالى جاڭا جۋ ماشينالارىن ساتىپ الدىق, ەندى تازالاۋ جۇمىستارى بۇرىنعىدان دا ءتيىمدى ءارى جىلدام جۇرەدى. وسىنداي باستامالارعا قاتىسۋ – قالادا جايلى جانە ەكولوگيالىق تازا ورتا قالىپتاستىرۋعا قوسقان ۇلەسىمىز. كاسىپورىن تۋرالى العاشقى اسەر ونىڭ اۋماعىنداعى تازالىقتان باستالادى. سوندىقتان كوممەرتسيالىق نىسان اينالاسىنداعى كەڭىستىكتى كۇنى بويى تازا ۇستاۋ ماڭىزدى», دەدى ماركەتينگ ءبولىمىنىڭ اعا مەنەدجەرى اندرەي پوكوتيلوۆ.
قالاداعى كوممەرتسيالىق نىساندار ەكولوگيالىق جاعدايدى جاقسارتۋعا جانە تۇرعىنداردىڭ مادەنيەتىن ارتتىرۋعا باعىتتالعان وسىنداي باستامالاردى ءارى قاراي دا قولداۋدى جوسپارلاپ وتىر.
ايتا كەتەيىك, 1 ناۋرىز بەن 1 ءساۋىر ارالىعىندا الماتىدا «الماتى – ورتاق ءۇيىمىز» اتتى اكتسيا وتۋدە. ول ءتورت كەزەڭنەن تۇرادى:
- «تازا كوشەلەر» (1-9 ناۋرىز) – ايالدامالار مەن جول بەلگىلەرىن تازالاۋ, قوقىس جاشىكتەرىن ورناتۋ, ماگيسترالداردى كوركەيتۋ;
- «تازا ساياباقتار, سكۆەرلەر مەن تاۋلار» (10-16 ناۋرىز) – تابيعي ايماقتاردا سەنبىلىكتەر وتكىزۋ, قوقىس جيناۋ شارالارى;
- «تازا اۋلالار» (17-23 ناۋرىز) – اۋلالاردى, بالالار جانە سپورت الاڭدارىن, كورىكتەندىرۋ ەلەمەنتتەرىن تازالاۋ جانە سىرلاۋ, كوگالداندىرۋ, «ۇزدىك اۋلا/اۋلا سىپىرۋشى/شاعىن باق» بايقاۋىن ۇيىمداستىرۋ;
- ء«بىزدىڭ قالا – ءبىزدىڭ ماقتانىشىمىز» (24 ناۋرىز – 1 ءساۋىر) – ەسكەرتكىشتەردى كورىكتەندىرۋ جانە جاپپاي اعاش وتىرعىزۋ.
