ءدىني ەكسترەميزم مەن تەرروريزمگە جول جوق

لاڭكەستىككە قارسى كۇرەس جونىندەگى قالالىق كوميس­سيانىڭ وتىرىسىندا الماتىنىڭ اكىمى احمەتجان ەسىموۆ ءدىني ەكسترەميزم مەن لاڭكەستىكتىڭ الدىن الۋ ورايىنداعى اقپاراتتىق-نا­سيحاتتىق توپتار جۇمىسىن جانداندىرۋدى تاپسىردى. قۇقىق قورعاۋ قۇرىلىمدارىنىڭ, كۇش ۆەدومستۆولارىنىڭ وكىلدەرى جانە قالالىق باسقارمالار باسشىلارى قاتىسقان جيىن بارىسىندا ادامدار كوپ جينالاتىن جەرلەردەگى ءدىني ارانداتۋ مەن تەرروريزمگە قاتىستى بىرقاتار كوكەيكەستى ماسەلەلەر تالقىلاندى. قالا باسشىسى تەرروريزمگە قارسى كۇرەسكە جۇمىلعان مەملەكەتتىك ورگانداردىڭ قارجىلىق جانە ماتەريالدىق-تەحنيكالىق تۇرعىدان قامتاماسىز ەتىلۋى ءتيىستى دارەجەدە ەكەندىگىن اتاپ كورسەتتى. بۇل ماقساتتارعا قالالىق بيۋدجەتتەن 2014-2015 جىلدارى 104 ميلليون تەڭگەدەن استام قارجى بولىنگەن. سونىمەن قاتار, قاراپايىم حالىقتىڭ ءدىني ساۋاتتىلىعىن ارتتىرۋ, تەرىس ءدىني اعىمدار قىزمەتىنىڭ بەت-پەردەسىن اشۋ جونىندە شارالار قولدانىلۋدا. ءداستۇرلى دىندەردى ناسيحاتتاۋ, قالا تۇرعىندارىنىڭ حالقىمىزدىڭ ءداستۇرى مەن مادەني مۇراسىنا ساي كەلەتىن ءدىني ساناسىن قالىپتاستىرۋ ورايىنداعى قىزمەت كۇشەيتىلە تۇسكەن. الايدا, بۇل جۇمىستا كەمشىلىكتەر مەن اتتەگەن-ايلار دا جوق ەمەس. سونىڭ سالدارىنان, اسىرەسە, جاستاردى راديكالدىق باعىتتاعى ءدىني يدەولوگيا ىقپالىنان تولىقتاي قورعاۋ مۇمكىن بولماي قالاتىن كەزدەر دە از ەمەس. وسىعان بايلانىستى القالى جيىندا شەشىمىن تالاپ ەتەتىن بىرقاتار مىندەتتەر بەلگىلەندى. اتاپ ايتقاندا, قالالىق قۇرىلىمداردىڭ باسشىلارىنا ءوز كاسىبىمەن اينالىسىپ جۇرگەن جانە جۇمىسسىز جاستار اراسىنداعى ناسيحاتتى پارمەندىرەك جۇرگىزۋ, وقۋشىلاردى قوسىمشا بىلىممەن نەعۇرلىم كەڭىرەك قامتۋ, ولاردى دەنە شىنىقتىرۋ مەن سپورت شارالارىنا پارمەندى تارتۋ تاپسىرىلدى. سونداي-اق, جەدەل باقىلاۋ ورتالىعىنىڭ تەحنيكالىق مۇمكىندىكتەرىن كەڭەيتۋ جانە قالانىڭ ەلەكتروندى كارتاسىن جاڭعىرتۋ ورايىندا دا جاقسارتۋدى تىلەيتىن جايلار بارشىلىق. ءبىر ايتا كەتەرلىگى, الماتىدا وسى باعىتتا 9 اقپاراتتىق- ناسيحاتتىق توپ جۇمىس ىستەيدى. ولار حالىقتىڭ ءدىني ساۋاتتىلىعىن ارتتىرۋ, تەرىس باعىتتاعى ءدىني اعىمدار قىزمەتىنىڭ قيتۇرقىسىن اشۋ جونىندە ماقساتتى ءتۇسىندىرۋ جۇمىستارىن تىنىمسىز جۇرگىزۋدە. قورعانبەك امانجول, «ەگەمەن قازاقستان». الماتى.