بولام دەگەن بالاعا بانكتەر دە بولىسادى

ءدال بۇگىنگى كۇندەرى وزدەرىنە كاسىپ, بولاشاعىنا ءناسىپ ىزدەگەن ەلىمىزدىڭ بارشا تۇلەكتەرى مەن حالىقارالىق دەڭگەيدە ماماندىق الۋعا كوزدەگەن جاستارىمىز ىزدەنىس ۇستىندە. قازىرگى تاڭدا ساپالى ءبىلىم الۋدىڭ بارلىق جولدارىن قاراستىرىپ وتىرعان تۇلەكتەردىڭ مۇددەسىنە وراي, ءتۇرلى مۇمكىندىكتەر تۋىپ تۇر. ال مەكتەپتە جاقسى وقىعان قابىلەتتى بالالارعا مەملەكەت تاراپىنان جاسالىپ جاتقان قولداۋ دا از ەمەس. دەگەنمەن, ءوز كەزەگىندە ۇلتتىق كومپانيالار مەن بانكتەر دە بولاشاعىنان ءۇمىت كۇتتىرگەن ماقساتشىل جاستارعا قارجىلىق گرانتتار بولۋدە. ءسوزىمىزدى ناقتىلاۋ ءۇشىن بىزدەر «قازاقستان حالىق بانكى» اق باسقارماسى توراعاسىنىڭ ورىنباسارى مارات المەنوۆتى اڭگىمەگە تارتتىق. – مارات بۇركىتباي ۇلى, بيىل مامىردا بەيجىڭدە وتكەن حالىقارالىق كەڭەستىڭ VI وتىرىسىنىڭ شەڭبەرىندە UPI بانك قىتايلىق تولەم جۇيە­سى­مەن ىنتىماقتاستىق تۋرالى مەمو­راندۋمعا قول قويىلعانىنان حاباردارمىز. ىنتىماقتاستىق باعىت­تارىنىڭ ىشىندە – قىتايدا وقىپ جاتقان نەمەسە وقىعىسى كەلەتىن قازاقستان ستۋدەنتتەرىنە ارنالعان ستيپەنديالىق باعدارلامانى دامىتۋ دا بار ەكەن. بۇل بولاشاقتىڭ ءىسى مە, بولماسا ناقتى باستاما بار ما؟ – شىن مانىندە, باعدارلامانى ىسكە اسىرۋ باستالىپ تا كەتتى. دەگەنمەن, UPI باسشىلىعى ستيپەنديالىق باعدارلامانى ۇيىمداستىرۋ جونىندەگى جوسپارىن وتكەن جىلعى قاراشادا UnionPay International Co., Ltd. باس­شى­لىعىنىڭ جانە قر ۇلتتىق بانكى مەن «قازاقستان حالىق بانكى» اق (Halyk Bank) بىرلەسىپ وتكىزگەن ءباسپاسوز كونفەرەنتسياسىندا مالىمدەگەن بولاتىن. بيىل, مامىر ايىندا UnionPay International حالىقارالىق كەڭەسىنىڭ VI وتىرىسىندا UnionPay International Co., Ltd., جانە «قازاقستان حالىق بانكى» اق (Halyk Bank) اراسىندا ءوزارا تۇسىنىستىك تۋرالى مەموراندۋمعا قول قويىلدى. بۇل وتىرىسقا «قازاقستان حالىق بانكى» اق باسقارماسىنىڭ ءتورايىمى ءۇمىت شاياحمەتوۆا UnionPay International حالىقارالىق كەڭەسىنىڭ مۇشەسى رەتىندە قاتىسىپ, ورتالىق ازيا جانە شىعىس ەۋروپا ەلدەرى (رەسەي, بەلارۋس, ۋكراينا) («Far Eastern Europe and Central Asia») اتىنان وكىلدىك ەتتى. بىرلەسكەن ستيپەنديالىق باعدارلا­مانى تىكەلەي ىسكە اسىرۋ ءدال وسى وقيعادان, اتالمىش جيىننان باس­تاۋ الدى دەسەك بولادى. ياعني, 16 ماۋسىمنان باستاپ باعدارلاما رەسمي تۇردە جۇزەگە اسا باستادى. – ءتۇرلى مۇمكىندىكتەردى قاراس­تىرىپ وتىرعان مەكتەپ بىتىرۋشىلەر اتىنان بۇل نەعىلعان باعدارلاما دەپ ناقتىلاي تۇسۋگە بولا ما؟ – «UnionPay»-مەن بىرگە حالىق­تىق ءبىلىم بەرۋ» ستيپەنديالىق باعدار­لاماسى» («Halyk Education with Union Pay» scholarship program») – قازاقستان ازاماتتارىن – وتاندىق جانە شەتەلدىك ورتا جانە جوعارى وقۋ ورىندارىن بىتىرۋشىلەردى قىتايداعى بەيىندى جوعارى وقۋ ورىندارىندا وقىتۋ جونىندەگى باعدارلاما بولىپ تابىلادى. باعدارلاماعا ىلىككەن ستۋدەنتتەرگە ءبىر جىل بويى ستيپەنديا تولەنەدى. – باعدارلامانىڭ جاي-جاپسارىن تولىقتىرا تۇسسەڭىز. وعان قانشا قازاقستاندىق ستۋدەنت ىلىگە الادى؟ تالاپتارى قانداي؟ – باعدارلاما اياسىندا 50 شاقتى ستۋدەنتكە ستيپەنديا بولىنە­دى. باع­دارلاماعا قازاقستان رەسپۋبلي­كا­سىنىڭ كەلەسىدەي ازاماتتارى قاتىسا الادى: ۇبت-دان كەم دەگەندە 100 بالل العان مەكتەپ بىتىرۋشىلەر. قالعان وقىتۋ مەرزىمى كەم دەگەندە ءبىر اكادەميالىق جىل بولاتىن قىتايداعى بەيىندى جوعارى وقۋ ورىندارىندا باكالاۆريات باعدارلامالارى بويىنشا وقيتىن ۇزدىك ستۋدەنتتەر. قازاقستاندا نەمەسە شەتەلدە جوعارى وقۋ ورنىن بىتىرگەن جانە قىتايداعى بەيىندى جوعارى وقۋ ورىندارىندا ماگيستر دارەجەسىنە وقۋىن جالعاستىرعىسى كەلەتىن, سونداي-اق, قالعان وقىتۋ مەرزىمى كەم دەگەندە ءبىر اكادەميالىق جىل بولاتىن ماگيستراتۋرادا وقىپ جاتقاندار. بارلىق جوعارىدا اتالعان جاعداي­لاردا كوپبالالى وتباسىنان شىق­قان, سونداي-اق, اتا-اناسىنىڭ قام­قورلىعىنسىز قالعان مەكتەپ ءبىتىرۋ­شىلەرگە جانە جەتىم بالالارعا ارتىق­شىلىق بەرىلەدى. – بۇل جوبادا باسقا دا سەرىكتەستەر بار ما؟ مىسالى, قازاقستان مەن قىتايدىڭ جوعارى وقۋ ورىندارى؟ – جوق, باسقا سەرىكتەستەر جوق. – باعدارلاما بولاشاقتا جال­عاسىن تابا ما؟ – ءبىزدىڭ بىرلەسكەن ستيپەنديالىق باعدارلامامىز 2015 جىلعى قىركۇيەكتەن 2016 جىلدىڭ ماۋسىم ارالىعىندا جۇزەگە اسادى. وسى ارالىقتا ءاربىر ستيپەنديا الۋشىعا تولەنەتىن ستيپەنديانىڭ جالپى سوماسى 5 مىڭ اقش دوللارىن قۇرايدى. – باعدارلامانىڭ مەرزىمى شەكتەۋلى ەكەن. نەگە؟ الداعى ۋاقىت­تا اتالمىش باعدارلاماعا قاتى­سۋ­شىلاردىڭ سانى كوبەيۋى مۇمكىن بە؟ – بۇل UnionPay International-مەن بىرلەسىپ جاساپ جاتقان ءبىزدىڭ العاشقى جوبامىز. باستاپقى جوبانىڭ جۇزەگە اسىرىلۋىنا قاراي, كەلەشەكتە وسى ماسەلەلەردىڭ بارلىعى ناقتىلانا تۇسەدى دەپ ويلايمىن. – ستۋدەنتتەردى قولداۋعا قاتىستى حالىق بانكىنىڭ تاعى قانداي باعدارلامالارى بار؟ – شىنىندا دا, حالىق بانكى بالالار ۇيىنەن شىققان مەكتەپ بىتىرۋشىلەر لايىقتى ومىرگە قادام باسسىن دەپ, ولاردىڭ جوعارى وقۋ ورىندارىندا ءبىلىم الۋىنا باعىتتالعان تاعى ءبىر باعدارلامانى ىسكە اسىرۋدا. «حالىقتىق ستۋدەنتتەر» اتتى الەۋمەتتىك جوباسى 2007 جىلدىڭ قىر­كۇيەك ايىنان باستاپ ىسكە اسى­رىلىپ, مىنە, سەگىز جىل بويى جالعاسىپ كەلەدى. «حالىقتىق ستۋدەنتتەر» – رەس­پۋبليكانىڭ ءار تۇكپىرىندەگى بالالار ۇيلەرىندەگى جانە اكە-شەشەسى­نىڭ قامقورلىعىنسىز قالعان بالا­لار مەن مەكتەپ-ينتەرناتتار تاربيە­لەنۋشىلەرىنە ارنالعان ارنايى قايى­رىمدىلىق باعدارلاما. ول بويىنشا قازاقستاننىڭ ءارتۇرلى وڭىرىندەگى وسى ۇيىمداردىڭ تاربيەلەنۋشىلەرى جوعارى ءبىلىم مەن حالىق بانكىنىڭ نەگىزىن قالاعان ق.ابەنوۆ اتىنداعى اتاۋلى ستيپەنديانى الادى. وسى ۋاقىتقا دەيىن «حالىق­تىق ستۋدەنتتەر» اتتى جوبانىڭ ارقاسىن­دا ءبىزدىڭ بانكتىڭ قامقورلىعىن­داعى بالالار ۇيلەرى مەن مەكتەپ-ينتەرناتتاردىڭ 39 تاربيەلەنۋشىسى جوعارى ءبىلىم الدى. ولاردىڭ بىرقاتارى حالىق بانكىنىڭ مىڭداعان قىزمەتكەرى بار ۇجىمىنىڭ قاتارىن تولىقتىردى, ياعني 14 ستۋدەنت ءبىزدىڭ بانك­كە جۇمىسقا قابىلداندى. ءبىز ءوز قامقورلىعىمىزداعى جوو تۇلەكتەرىنە حالىق بانكىندە, سونداي-اق, بارلىق «حالىق» قارجىلىق توبىنىڭ قۇرى­لىمىندا قىزمەت ەتۋدى ۇسىنا الامىز, مانساپ جولىندا ءوسۋ مۇمكىندىكتەرىن قاراستىرامىز. «حالىقتىق ستۋدەنتتەر» اتتى جوبا ىسكە اسىرىلا باستاعاننان بەرى «قازاقستان حالىق بانكى» اق بۇل ماقساتقا 45 ميلليون تەڭگە قاراجات جۇمسادى. تەك 2014-2015 وقۋ جىلىنا عانا 2,5 ميلليون تەڭگە قارجى ءبولىندى. – اڭگىمەڭىزگە راحمەت. اڭگىمەلەسكەن ايناش ەسالي, «ەگەمەن قازاقستان». الماتى.