قازاق كۇرەسى كونفەدەراتسيا قۇرامىنا كىردى

استانا. 18 ماۋسىم. قازاق كۇرەسى فەدەراتسياسى رەسمي تۇردە  سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسىنىڭ قۇرامىنا كىردى. بۇل تۋرالى كونفەدەراتسيانىڭ ءباسپاسوز قىزمەتى حابارلادى. كونفەدەراتسيانىڭ باق جانە قوعاممەن بايلانىس جونىندەگى قىزمەتتىڭ ۇيلەستىرۋشىسى جىگەر ازبەرگەننىڭ ايتۋىنشا, مامىر ايىندا قازاق كۇرەسى فەدەراتسياسىنىڭ ەسەپ بەرۋ كونفەرەنتسياسىندا كونفەدەراتسيانىڭ قۇرامىنا كىرۋ تۋرالى شەشىم قابىلداندى. بۇل شەشىمدى كونفەدەراتسيانىڭ جالپى جينالىسىندا ونىڭ مۇشەلەرى ءبىراۋىزدان قۇپتادى. وسىلايشا قازاق كۇرەسى فەدەراتسياسى كونفەدەراتسيانىڭ التىنشى مۇشەسى بولىپ وتىر. ايتا كەتەيىك, سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى 2012 جىلى قۇرىلعان بولاتىن. ونىڭ توراعاسى تيمۋر ق ۇلىباەۆ. قازىرگى تاڭدا بوكس, گرەك-ريم, ەركىن جانە ايەلدەر كۇرەسى, دزيۋدو, تاەكۆوندو (WTF) جانە اۋىر اتلەتيكا فەدەراتسيالارى ۇيىمنىڭ مۇشەلەرى. كونفەدەراتسيانى قۇرۋداعى ماقسات - ۇلكەن ناتيجەگە قول جەتكىزۋ ءۇشىن كاسىپقوي, كادرلىق جانە قارجى رەسۋرستارىنىڭ باسىن بىرىكتىرۋ. بەس فەدەراتسيانىڭ باسىن بىرىكتىرىپ وتىرعان ۇيىمنىڭ مىندەتى: بۇقارالىق سپورتتى دامىتۋ, ولاردى كەڭىنەن تانىستىرۋ, دەنە شىنىقتىرۋ مەن سالاماتتى ءومىر سالتىن ناسيحاتتاۋ. كونفەدەراتسيا سونداي-اق, الەم چەمپيوناتتارىندا جەڭىسكە جەتۋگە قابىلەتتى اتلەتتەردى دايىنداۋ ماسەلەلەرىن شەشۋدە كوپ رەسۋرستىق شىعىندى جانە كەشەندى, جۇيەلىك جۇمىستى تالاپ ەتەتىن جوعارى جەتىستىكتەر سپورتىن دامىتۋمەن, دەنە شىنىقتىرۋ مەن سالاماتتى ءومىر سالتىن ناسيحاتتاۋ سياقتى ماسەلەلەرمەن اينالىسادى. داستان كەنجالين. دەرەك: سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى. سۋرەت: egemen.kz