پەتروپاۆلدا جەر زاڭسىزدىعى ءورشىپ تۇر

پەتروپاۆل. 18 ماۋسىم. قىزىلجار وڭىرىندە زاڭ بۇزۋشىلىقتاردىڭ الدىن الۋ جانە بولدىرماۋ ماقساتىندا اتقارىلىپ جاتقان ىقپال ەتۋ شارالارىنا قاراماستان جەر قاتىناستارى سالاسىنداعى بۇرا تارتۋشىلىقتار تىيىلماي وتىر. بۇل تۋرالى وبلىستىق «سولتۇستىك قازاقستان» گازەتى حابارلادى. پەتروپاۆل قالاسى پروكۋرورىنىڭ ورىنباسارى جاسۇلان سماعۇلوۆ مالىمدەگەندەي جەر تۋرالى زاڭ تالاپتارىنىڭ ورىندالۋىنا بايلانىستى جۇرگىزىلگەن تەكسەرىس قورىتىندىلارى كوڭىل كونشىتپەيدى.  جەر ۋچاسكەلەرىن بەرۋدە جانە قايتارۋدا زاڭدىلىقتاردىڭ قاتاڭ ساقتالا بەرمەۋى سالدارىنان بيىلدىڭ وزىندە عانا 86 فاكت اشكەرەلەنگەن.  ەكى ادام تارتىپتىك جاۋاپكەرشىلىككە تارتىلىپ, 5 ميلليون تەڭگە مەملەكەتتىڭ پايداسىنا وندىرىلگەن.  جۋىردا 3 ميلليارد تەڭگەنىڭ جەر تەلىمى مەملەكەتتىڭ مەنشىگىنە قايتارىلعانىن تىلگە تيەك ەتكەن ول قالا اكىمدىگىنىڭ يۋجنىي كەنتىندەگى جالپى اۋماعى 235 گەكتار جەر ۋچاسكەسىن “توبىل” الەۋمەتتىك-كاسىپكەرلىك كورپوراتسياسى” ۇلتتىق كومپانياسى” اكتسيونەرلىك قوعامىنىڭ جەكەمەنشىگىنە بەرۋ تۋرالى قاۋلىسى زاڭسىز دەپ تابىلعانىن جەتكىزدى. ءسويتىپ مەملەكەت مەنشىگىنە كەرى قايتارىلعان. «جەر تەلىمدەرىن الۋ ءۇشىن كەزەكتە تۇرعاندار سانى 5 مىڭنان اسىپ جىعىلادى.  ەندى ول جەرلەردى سول ازاماتتارعا بەرۋ كەرەك. پروكۋرورلىق ارەكەت ەتۋدىڭ ارقاسىندا تۇرعىنداردىڭ جەر تەلىمدەرىنە كەزەگىن 24 پايىزعا كەمىتۋگە قول جەتتى», دەيدى ج. سماعۇلوۆ. بىلتىر جەر قاتىناستارىنا جاۋاپتى ورگانداردىڭ زاڭعا قايشى شەشىمدەرى از بولماپتى. وعان دالەل رەتىندە پەتروپاۆل قالاسى اكىمدىگىنىڭ جەر ۋچاسكەلەرىن جانە جىلجىمايتىن م ۇلىكتى ماجبۇرلەپ يەسىزدەندىرۋ تۋرالى قاۋلىسىن كەلتىردى. ونىڭ نەگىزىندە 77 جەر ۋچاسكەسىندە ورنالاسقان قۇرىلىس نىساندارىن بۇزۋ ماسەلەسى قاراستىرىلعان.  سەبەبى, اكىمدىك بەلگىلەگەن جەر تەلىمدەرى قالانىڭ باس جوسپارىنا سايكەس ءۇي-جاي قۇرىلىستارىنىڭ اۋماعىنا جاتاتىنى انىقتالعان. ءارى اتالمىش اۋدانعا سالىنباق بولعان جاڭا قۇرىلىستىڭ جوسپارى مەن جوباسى جاسالماعان. قالالىق جەر قاتىناستارى ءبولىمىنىڭ بۇدان باسقا دا “بىلىق-شىلىقتارى” تولىپ جاتقان كورىنەدى. پروكۋرورلىق تەكسەرىستىڭ ناتيجەسىندە ۋليانوۆ كوشەسى, 59 مەكەنجايىنداعى جەر ۋچاسكەسىنىڭ زاڭسىز بەرىلگەندىگى بەلگىلى بولعان. مامانداندىرىلعان اۋدانارالىق ەكونوميكالىق سوت پروكۋراتۋرانىڭ ساتباەۆ كوشەسى, 17 “ا” مەكەنجايىندا ورنالاسقان جەر ۋچاسكەسىن مەملەكەتكە قايتارۋ تۋرالى تالابىن قاناعاتتاندىرعان. وبلىس ورتالىعىنىڭ باس جوسپارىن بەلدەن باسا وتىرا جەكە تۇرعىن ءۇي قۇرىلىسى ءۇشىن جەر ۋچاسكەلەرىن ۇلەستىرگەن قۇزىرەتتى مەكەمەنىڭ باسقا دا ارەكەتتەرىنە توسقاۋىل قويىلعان. سوت تارتىبىمەن قۇنى 1 270 000 تەڭگە بولاتىن جەر ۋچاسكەسى مەملەكەت مەنشىگىنە قايتارىلعان. پروكۋروردىڭ ايتۋىنشا, مۇنداي زاڭسىزدىقتار كوپ جاعدايدا سىبايلاس جەمقورلىققا جاعداي تۋعىزادى. سول سەبەپت جەر ماسەلەسىندە ولقىلىقتارعا ورىن بەرگەن تۇلعالار  تيىستى جازاسىن الاتىن بولادى. ءومىر ەسقالي. دەرەك: وبلىستىق «سولتۇستىك قازاقستان» گازەتى. سۋرەت: egemen.kz