فوتو: gov.kz
تۇرعىندارعا تالدىقورعاندا 37 جاڭا پاتەردىڭ, سارقان قالاسىندا 20 جەكە تۇرعىن ءۇيدىڭ كىلتى تابىستالدى.
«2022 جىلى تۇرعىن ءۇي كەزەگىندە تۇرعان ازاماتتار ءۇشىن 5 قاباتتى 50 پاتەرلى ءۇي, وتكەن جىلى «بولاشاق» شاعىن اۋدانىندا ەكى قاباتتى 20 پاتەرلى تۇرعىن ءۇي قولدانىسقا بەرىلدى. بۇعان قوسا, اۋداننىڭ الەۋمەتتىك وسال توپتاعى ازاماتتارى ءۇشىن 24 تۇرعىن ءۇي ساتىپ الىنىپ, بەرىلدى. بۇگىن 20 ءۇيدىڭ كىلتى تاپسىرىلسا, بۇدان بولەك, جاقىن ارادا وسى تيپتەگى 30 تۇرعىن ءۇيدىڭ قۇرىلىسى اياقتالىپ, قولدانىسقا بەرىلەدى», دەدى سارقان اۋدانىنىڭ تۇرعىن ءۇي-كوممۋنالدىق شارۋاشىلىعى, اۆتوموبيل جولدارى, جولاۋشىلار كولىگى جانە تۇرعىن ءۇي ينسپەكتسياسى ءبولىمىنىڭ باسشىسى اسەت قاناپيانوۆ.
بۇگىن جاڭا ۇيگە يە بولعاندار قاتارىندا جەتىم بالالار, مۇگەدەكتىگى بار بالانى تاربيەلەۋشى وتباسىلار, مۇگەدەكتىگى بار ازاماتتار, كوپ بالالى انالار, تولىق ەمەس وتباسىلار, ۇلى وتان سوعىسىنىڭ ارداگەرلەرىنە تەڭەستىرىلگەندەر بار.
«بۇگىن كوپتەن كۇتكەن پاتەرىمىزدى الدىق. مۇگەدەكتىگى بار بالامىزدىڭ دەنساۋلىق جاعدايىنا قولايلى جاڭا پاتەرگە يە بولعانىمىزعا قۋانىشتىمىز. كەزەكتە 10 جىلدان اسا ۋاقىت تۇرىپ, اسىعا كۇتكەن كۇنگە دە جەتتىك, راقمەت», دەدى ج. بولاتبەكوۆا.
جەتىسۋ وبلىسىندا بيىل تۇرعىن ءۇي قۇرىلىسىنا 7,6 ملرد. تەڭگە بولىنگەن. بۇل قارجى 56 كوپ قاباتتى مەن 214 جەكە تۇرعىن ءۇي سالۋعا باعىتتالعان. بۇدان بولەك, حالىقتىڭ الەۋمەتتىك وسال توپتارى ءۇشىن 866 پاتەر ساتىپ الىندى, وعان 15,9 ملرد. تەڭگە بولىنگەن.
