ەڭ قۋاتتى سۋپەركومپيۋتەر — قازۇتۋ-دا

ق.ي.ساتباەۆ اتىنداعى قازۇتۋ بازاسىندا بىلتىر ىسكە قوسىلعان قازاقستان-كورەي اقپاراتتىق تەلەكوممۋنيكاتسيالار تەحنولوگيالارى جونىندەگى ءبىلىم ورتالىعى 186 اتاۋلى كۋرس بويىنشا ءار دەڭگەيدەگى ءىT ماماندارىن دايارلاۋدا. جۋىردا ونىمدىلىگى جونىنەن قازاقستانداعى ەڭ قۋاتتى سۋپەركومپيۋتەردىڭ تۇساۋكەسەر ءراسىمى ءوتتى. وعان ءبىلىم جانە عىلىم ءمينيسترى ج.تۇيمەباەۆ قاتىستى. ەلباسى ن.نازارباەۆتىڭ تىكەلەي تاپ­­سىرماسىمەن ەلىمىزدىڭ ءارتۇرلى مەكەمە­لە­رىندە 15 ينجەنەرلىك عىلىمي زەرتحانالار اشىلىپ, ولار وزىق تەحنولوگيالىق قون­دىرعىلارمەن جانە كومپيۋتەرلەرمەن جاب­دىقتالعان. ق.ساتباەۆ اتىنداعى قازۇتۋ ءبىلىم جانە عىلىم مينيسترلىگى ۇيىم­داس­تىر­عان “كوسموستىق جانە اقپاراتتىق تەح­نولوگيالاردى (سۋپەركومپيۋتەردى) ۇجىم­دىق پايدالانۋدىڭ ۇلتتىق عىلىمي زەرت­حاناسىن” اشۋ جونىندەگى اشىق كونكۋرسقا قاتىسىپ, جەڭىمپاز بوپ تانىلعان بولاتىن. سۋپەركومپيۋتەردىڭ وسى ۋنيۆەرسيتەت بازاسىندا ورناتىلۋى دا سونىڭ جەمىسى ەدى. – سۋ­پەركومپيۋتەر 400 ميلليون تەڭ­گەگە سا­تىپ الىندى. الەمنىڭ جەتەكشى ەل­دەرى مۇن­داي كومپيۋتەرلەردى بۇرىننان پاي­دا­لا­نۋدا جانە ونىڭ مۇمكىندىكتەرىن عىلىم مەن ءبىلىمنىڭ, ەكونوميكانىڭ ەڭ كۇردەلى مىندەتتەرىن شەشۋ ءۇشىن قولدا­نۋ­دا, – دەدى ءبىلىم جانە عىلىم ءمينيسترى ج.تۇيمەباەۆ. سۋپەركومپيۋتەردىڭ تەحنيكالىق ءمۇم­كىن­­دىكتەرى وتە زور. ونىمەن مەتەورولوگيا جانە ەكولوگيا سالاسىندا ۇزاق مەرزىمدى بول­جامدار جاساۋعا دا بولادى. ۇلتتىق قاۋ­ىپسىزدىكتى قامتاماسىز ەتۋدە دە مۇمكىندىگى شەكسىز. سونداي-اق اەروكوسموستىق جانە اۆ­توموبيل ونەركاسىبى, يادرولىق ەنەر­گە­تيكا باعىتىنداعى كۇردەلى مىندەتتەردى شەشۋگە, مۇناي وندىرۋدە جانە گاز ونەركاسىبىندە, پايدالى قازبالاردى ىزدەپ تابۋدا جانە ورنالاسقان جەرىن الدىن الا بولجاۋدا كەلتىرەتىن پايداسى وتە زور. گۇلزەينەپ سادىرقىزى.