مەرەيتويعا ءبىلىم بەرۋ سالاسىنىڭ وكىلدەرى, پەداگوگيكالىق ەڭبەك ارداگەرلەرى, كوللەدج تۇلەكتەرى مەن قالا قوناقتارى كەلىپ, وقۋ ورنىنىڭ تاعىلىمدى تاريحىنا تاعزىم ەتىپ, جىلى لەبىزدەرىن ءبىلدىردى.
مەرەكەلىك شارالار كوللەدج جانىنداعى ب.ا. احمەتوۆتىڭ ەسكەرتكىشىنە گۇل شوقتارىن قويۋ راسىمىنەن باستالدى.
بۇل ءراسىم – كورنەكتى ۇستازعا دەگەن قۇرمەت پەن ونىڭ ءبىلىم سالاسىنا قوسقان ۇلەسىنە دەگەن ءىلتيپاتتىڭ بەلگىسى.
ايتۋلى كۇن اياسىندا «مۋزىكالىق تاربيە ادىستەمەسى» كابينەتىنە پاۆلودار ءوڭىرىنىڭ پەداگوگيكالىق ەڭبەك ارداگەرى, كومپوزيتور ءارى مادەنيەت قايراتكەرى قايىربەك ساتيەۆتىڭ ەسىمى بەرىلدى. بۇل قادام ارداگەرلەردىڭ ەڭبەگىن ۇلىقتاۋدىڭ جارقىن ۇلگىسىنە اينالدى.
كوللەدج وقىتۋشىلارى دايىنداعان جاڭا وقۋ قۇرالدارىنىڭ تۇساۋكەسەرى جانە زاماناۋي «SKILLSBOOST CENTER» كابينەتىن اشۋ شارالارى وقۋ ورنىنىڭ ءبىلىم بەرۋدەگى جاڭاشىل كوزقاراسىن كورسەتتى.
ستۋدەنتتەر وزدەرىنىڭ كاسىبي شەبەرلىگىن ءىس جۇزىندە كورسەتىپ, اشىق ساباقتار ۇيىمداستىردى. بۇل – وقۋ ورنىنىڭ ساپالى ءبىلىم بەرۋدەگى بيىك ناتيجەلەرىنىڭ ايعاعى.
مەرەكەلىك ءىس-شارا م.م. كاتاەۆ اتىنداعى وقۋشىلار سارايىندا جالعاسىپ, پەداگوگيكالىق ەڭبەك ارداگەرلەرى مەن ءتۇرلى جىلدارداعى تۇلەكتەر كوللەدجدى مەرەيتويىمەن قۇتتىقتادى.
قوناقتار مەرەكەلىك كونتسەرتتى تاماشالاپ, كوللەدجدىڭ ەڭبەگى سىڭگەن ۇستازدارىنا قۇرمەت كورسەتىلىپ, ارنايى ماراپاتتار تابىستالدى.
ايتا كەتسەك, قاراشا ايىنان باستاپ احمەتوۆ اتىنداعى كوللەدجدىڭ 95 جىلدىعى اياسىندا تۇلەكتەر, ارداگەر ۇستازدار, وقىتۋشىلار مەن ستۋدەنتتەردىڭ كەزدەسۋلەرى ءوتتى.
ءار ءبولىم ستۋدەنتتىك شاقتىڭ جارقىن ساتتەرىن ەسكە ءتۇسىرىپ, ۇستازدارىمەن قاۋىشتى.
كەزدەسۋلەر كوللەدجدىڭ بىلىكتى ماماندار دايارلاۋداعى ماڭىزدىلىعىن ايقىندادى.
ب.احمەتوۆ اتىنداعى جوعارى پەداگوگيكالىق كوللەدج – ساپالى ءبىلىم مەن جاڭا بۋىن كوشباسشى مامانداردى دايارلايتىن قازاقستانداعى جەتەكشى وقۋ ورىندارىنىڭ ءبىرى.
وقۋ ورنى 95 جىل بويى ەل دامۋىنا ۇلەس قوسىپ كەلە جاتقان بىلىكتى پەداگوگتەردى دايارلاۋدىڭ ۇلگىلى ورداسىنا اينالدى.
