فوتو: اشىق دەرەككوز
قارجى ءمينيسترى ءمادي تاكيەۆ بيىل «ۇلتتىق قور – بالالارعا» جوباسى اياسىندا 1 اقپاندا 7 ملن-عا جۋىق بالاعا 100 دوللار 52 تسەنتتەن اۋدارىلعانىن ايتتى.
«قازىر (قورداعى قارجى) دوللارمەن ەسەپتەلەدى جانە وسى سوما قوسىمشا ينۆەستيتسيالانادى. سوندىقتان جيناق ءوسىپ جاتىر. ينۆەستيتسيالىق كىرىسكە توقتالساق, بيىل ءبىز 2,6 پايىزبەن سانادىق. كەلەسى جىلى 3% ينۆەستيتسيالىق ءوسىم بولادى دەپ بولجام جاساپ وتىرمىز. سوندىقتان ءبىز 1 قاڭتارداعى ساندى ەسكەرىپ, بالالارعا 118-120 دوللار بولاتىن شىعار دەپ وتىرمىز. بىراق ونى 1 اقپانعا دەيىن تاعى ءبىر ناقتى ەسەپتەۋ كەرەك», دەدى ءمادي تاكيەۆ.
ءوز كەزەگىندە ۇلتتىق بانك توراعاسى تيمۋر سۇلەيمەنوۆ ءبىر بالاعا بولجام 130 دوللاردى قۇرايتىنىن ايتتى.
ەستەرىڭىزگە سالا كەتەيىك, 2024 جىلدىڭ اقپان ايىندا ۇلتتىق قوردان بالالارعا العاشقى تولەمدەردى اۋدارعان ەدى. مەملەكەت باسشىسىنىڭ باستاماسىمەن قولعا الىنعان «بالالارعا ارنالعان ۇلتتىق قور» جوباسى ۇلتتىق قوردىڭ جىلدىق ينۆەستيتسيالىق كىرىسىنىڭ 50 پايىزىن 18 جاسقا دەيىنگى بالالاردىڭ جيناق شوتتارىنا اۋدارۋدى كوزدەيدى. ولاردى پايدالانۋدىڭ نەگىزگى باعىتتارى تۇرمىس جاعدايىن جاقسارتۋ جانە وقۋ اقىسىن تولەۋ.
