ءيا, جۇمابەك ومار ۇلىنىڭ بولمىسى, اتقارعان ونەگەلى ىستەرى قاي دارەجەدە دە, قاي دەڭگەيدە دە اسپەتتەۋگە لايىق. ويتكەنى تۇعىرلى تۇلعانىڭ ءومىر جولى تۋعان حالقىنىڭ, ەلىنىڭ, وتانىنىڭ قادىرىن بيىكتەتۋگە, ءوزى عۇمىر كەشكەن قوعامىنىڭ كەم-كەتىگىن تۇزەۋگە, وزەكتى تۇيتكىلدەرىن ءباسپاسوز ارقىلى تارازىلاۋعا, باعىت-باعدار سىلتەپ, ءجون-جوبا نۇسقاۋعا, ۋاقىت ءسوزىن ايتۋعا باعىتتالدى. وي كوزىمەن قاراساق, جۇمەكەڭ وتاندىق جۋرناليستيكانىڭ كورنەكتى وكىلى رەتىندە ەرەن ەڭبەگىمەن, قاجىرلى ىزدەنىسىمەن ۇلت ءباسپاسوزىنىڭ تۇعىرى بەرىك, تۋى بيىك بولۋىنا ادامي-ازاماتتىق قالىبىمەن, اقيقاتتان اتتامايتىن شىنشىل مىنەزىمەن, تۋمىسىنان بىرگە جاراتىلعان ادالدىعىمەن اۋقىمى مەن كولەمى ولشەۋگە سىيمايتىن جارقىن ءىس اتقارىپ, ەرەن ەڭبەك ءسىڭىردى. قايراتكەر ازاماتتىڭ ءبۇتىن ءبىر ءومىر جولى وتاندىق ءباسپاسوزدىڭ اۋمالى-توكپەلى جىلدارداعى تىنىس-تىرشىلىگىنە ارالاسۋمەن, ءوز تاعدىرىنا بۇيىرعان جۋرناليستيكانىڭ بەس باتپانداي اۋىر جۇگىن ارقالاۋمەن ءوتتى. ج.ومار ۇلى جۋرناليستيكاداعى ءداستۇر ساباقتاستىعىن ساقتاۋعا, ءوز زامانىنىڭ جاڭاشىلدىعىمەن تولىقتىرۋعا اق ادال قىزمەت ەتتى.
ءىىى جۇمابەك كەنجالين وقۋلارىن جۇرگىزگەن جۋرناليستيكا فاكۋلتەتىنىڭ دەكانى قانات اۋەسباي پارلامەنت سەناتىنىڭ توراعاسى ماۋلەن اشىمباەۆتىڭ, ءال-فارابي اتىنداعى قازۇۋ رەكتورى جانسەيىت تۇيمەباەۆتىڭ قۇتتىقتاۋلارىن وقىعان سوڭ, باعدارلاماعا سايكەس ءسوز العان مەيماندار ونىڭ قادىر-قاسيەتىن, ازاماتتىق قىرلارىن ايتىپ, جۋرناليستيكا مەن ءباسپاسوز سالاسىن دامىتۋداعى ەسەلى ەڭبەگىنە توقتالدى.
تولعاۋلى پىكىرلەرىن, جۇرەكجاردى لەبىزدەرىن ورتاعا سالعانداردىڭ ارقايسىسى جۇمابەك ومار ۇلىنا دەگەن رياسىز كوڭىلىن, شەتسىز-شەكسىز قۇرمەتىن, ىقىلاس-پەيىلىن كەستەلى سوزدەرىمەن, ورنەكتى ويلارىمەن بەزبەندەدى.
ءوز ءسوزىن اسىلداردى ارداقتاۋ ءداستۇرىن بەرىك ۇستانىپ وتىرعان ۋنيۆەرسيتەتكە العىس ايتۋدان باستاعان قوعام قايراتكەرى ساۋىتبەك ابدراحمانوۆ جۇمابەك ومار ۇلىنىڭ كىرشىكسىز تازا بولمىسىنان, جۋرناليستىك قىزمەتىنەن تارتىپ, «قازاق گازەتتەرى» اكتسيونەرلىك قوعامىن ساقتاپ قالۋداعى ەڭبەگىمەن ساباقتاي كەلىپ, قارىمدى قالامگەردىڭ ءار قىرى بىرتە-بىرتە زەرتتەلىپ اشىلا بەرۋگە ءتيىس ەكەنىن ايتسا, بەلگىلى قالامگەر جانبولات اۋپباەۆ ارداقتى ازاماتپەن بىرگە جۇمىس ىستەگەن جارقىن جىلداردى ەسكە الىپ, تاباندى جۋرناليست, ءبىلىمدى دە بىلىكتى باسشى, ءومىرىنىڭ سوڭعى ساتىنە دەيىن جۇردەك ۋاقىت جۇرىسىنە لايىق جۇمىس ماشىعىنان تانباعان قاجىر-قايرات يەسى رەتىندەگى قاسيەتتەرىنە نازار اۋداردى.
«جۇمابەك – بۇكىل ادامدىق قاسيەت-قادىرى تولىق قالىپتاسقان, ومىرگە ادام بولىپ كەلىپ, ومىردەن ادام بولىپ وتكەن ۇلكەن جۇرەكتى ازامات» دەپ ءسوز ساباقتاعان فيلولوگيا عىلىمدارىنىڭ دوكتورى ءومىرحان ءابديمان ۇلى قايراتكەر تۇلعا كوتەرىلگەن بيىكتىكتىڭ ءبارى دە تازا ەڭبەگىمەن, ءادىل ءجۇرىپ, جاقسىلىقتىڭ جاناشىرى بولا ءبىلۋىنىڭ ارقاسىندا جەتكەن جەتىستىكتەر ناتيجەسى», دەدى.
القالى جيىندا كورنەكتى پۋبليتسيست قاينار ولجاي, تالعات ايتباي ۇلى, «قازاق گازەتتەرى» جشس باس ديرەكتورىنىڭ ورىنباسارى – الماتى باسىلىمدارىنىڭ جەتەكشىسى سەرىك ابىكەن ۇلى, ت.ب. ازاماتتار ءسوز سويلەدى. «اتامۇرا» كورپوراتسياسىنىڭ پرەزيدەنتى راحىمعالي قۇل-مۇحاممەد جۋرناليستيكا مايتالمانىنىڭ 70 جىلدىعىنا ارناپ اۆتوردىڭ «ۇلت رۋحىن ۇلىقتاعان ۇرپاقپىز» ەڭبەگىن 3 مىڭ دانامەن شىعارۋعا باستاماشىلىق جاساعانىن ايتىپ, اتالعان كىتاپتىڭ قۇندىلىعى جونىندە وي ءوربىتتى.
ءىىى جۇمابەك كەنجالين وقۋلارى اياسىندا قوس بىردەي كىتاپتىڭ, اتاپ ايتقاندا «ونەگەلى ءومىر» سەرياسىمەن جارىق كورگەن «جۇمابەك كەنجالين» دەپ اتالاتىن عۇمىرنامالىق جيناقتىڭ, سونداي-اق ج.كەنجاليننىڭ «ۇلت رۋحىن ۇلىقتاعان ۇرپاقپىز» اتتى تۋىندىسىنىڭ تۇساۋى كەسىلىپ, وقىرمان قاۋىمعا جول تارتتى.
ءىس-شارا اياقتالعان سوڭ كونفەرەنتسيا قاتىسۋشىلارى پانفيلوۆ كوشەسىندە ورنالاسقان 101 ءۇيدى بەتكە الدى. 1985–2009 جىلدار ارالىعىندا جۇمابەك كەنجالين تۇرعان بۇل كوپقاباتتى ەڭسەلى ءۇيدىڭ قابىرعاسىنا ورناتىلعان ەسكەرتكىش تاقتانىڭ اشىلۋ ءراسىمى جاسالدى. بۇدان سوڭ كوسەمسوز شەبەرىنىڭ رۋحىنا ارناپ اس بەرىلىپ, قۇران باعىشتالدى. استا دا تالاي يگى جاقسىلار ءوز ەستەلىكتەرىمەن ءبولىستى. ارداقتى تۇلعانىڭ زايىبى ءاليما ابدراحمانقىزى, قالامگەردىڭ ۇلدارى داستان مەن جاندوس كەنجاليندەر قولداۋ ءبىلدىرىپ كەلگەن بارشا جاناشىر ازاماتتارعا اۋلەت اتىنان العىسىن جەتكىزدى.
ءداۋىرجان جۇماجان ۇلى,
جۋرناليست
