قازاقستاندا جاڭعىرتۋ جونىندەگى ۇلتتىق كوميسسيا قۇرىلدى

استانا. 30 ءساۋىر. قازاقستان پرەزيدەنتى ەل الدىنا قويىلعان مىندەتتەردى جۇزەگە اسىرۋ باعىتىنداعى جۇمىستاردى جالعاستىرۋدىڭ ماڭىزدىلىعىن اتاپ ءوتتى. وسىعان بايلانىستى, مەملەكەت باسشىسى بەس ينستيتۋتسيونالدىق رەفورمانى جۇزەگە اسىرۋ ماقساتىندا جاڭعىرتۋ جونىندەگى ۇلتتىق كوميسسيا قۇرۋ تۋرالى جارلىققا قول قويىلعانىن مالىمدەدى. بۇل تۋرالى akorda.kz حابارلادى. كوميسسيانى پرەمەر-مينيستر كارىم ءماسىموۆ باسقارادى, ورىنباسارى پرەزيدەنت اكىمشىلىگىنىڭ باسشىسى نۇرلان نىعماتۋلين بولادى. كاسىبي مەملەكەتتىك اپپارات قۇرۋ جونىندەگى جۇمىس توبىن پرەزيدەنتتىڭ كومەكشىسى ەربول ورىنباەۆ, زاڭ ۇستەمدىگىن قامتاماسىز ەتۋ جونىندەگى جۇمىس توبىن پرەزيدەنت اكىمشىلىگى باسشىسىنىڭ ورىنباسارى تالعات دوناقوۆ, ەكونوميكا ماسەلەلەرى جونىندەگى جۇمىس توبىن ۇلتتىق ەكونوميكا ءمينيسترى ەربولات دوساەۆ, بىرتەكتىلىك جانە بىرلىك جونىندەگى جۇمىس توبىن پرەزيدەنت اكىمشىلىگى باسشىسىنىڭ ورىنباسارى باعلان مايلىباەۆ, ەسەپ بەرەتىن مەملەكەت قالىپتاستىرۋ جونىندەگى جۇمىس توبىن پارلامەنت ءماجىلىسى توراعاسىنىڭ ورىنباسارى داريعا نازارباەۆا باسقارادى. ونىڭ ورىنباسارى قىزمەتىن اسقار بەيسەنباەۆ اتقارادى. سونداي-اق, كوميسسيا قۇرامىنا شەتەلدىك كونسۋلتانت رەتىندە «نازارباەۆ ۋنيۆەرسيتەتى» ابۇ پرەزيدەنتى شيگەو كاتتسۋ كىردى. مەملەكەت باسشىسى ۇكىمەت قۇرامى ساقتالاتىنىن ايتتى. «ولاردىڭ ءبارى وسى قۇرامدا ىنتىماقپەن جۇمىس ىستەدى, قويىلعان مىندەتتەردى ورىنداي الدى. مەن ەشقايسىسىن دا الماستىرۋ قاجەتتىگىن كورىپ تۇرعان جوقپىن, سوندىقتان جۇمىستارىن جالعاستىراتىن بولادى», – دەدى قازاقستان پرەزيدەنتى. ەلامان قوڭىر. دەرەك, سۋرەت: akorda.kz.