قازاقستان رەسپۋبليكاسىنىڭ بىتىمگەرشىلىك قىزمەتى تۋرالى
وسى زاڭ قازاقستان رەسپۋبليكاسى قابىلداعان حالىقارالىق مىندەتتەمەلەرگە سايكەس قازاقستان رەسپۋبليكاسى ۇلتتىق كونتينگەنتىنىڭ بەيبىتشىلىك پەن قاۋىپسىزدىكتى قولداۋ جونىندەگى وپەراتسيالارعا (ميسسيالارعا) قاتىسۋىنا بايلانىستى قوعامدىق قاتىناستاردى رەتتەيدى.
1-تاراۋ. جالپى ەرەجەلەر
1-باپ. وسى زاڭدا پايدالانىلاتىن نەگىزگى ۇعىمدار
وسى زاڭدا مىناداي نەگىزگى ۇعىمدار پايدالانىلادى:
1) ازاماتتىق پەرسونال – قازاقستان رەسپۋبليكاسى مەملەكەتتىك ورگاندارىنىڭ (ۇيىمدارىنىڭ) جۇمىسكەرلەرى, قىزمەتكەرلەرى بولىپ تابىلاتىن قازاقستان رەسپۋبليكاسىنىڭ ازاماتتارى;
2) ارىپتەس مەملەكەتتەر – قازاقستان رەسپۋبليكاسىمەن بىرلەسىپ بىتىمگەرشىلىك وپەراتسياعا قاتىساتىن مەملەكەتتەر;
3) اسكەري پەرسونال – قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ اسكەري قىزمەتشىلەرى;
4) بەيبىتشىلىككە ماجبۇرلەۋ جونىندەگى وپەراتسيا – بىرىككەن ۇلتتار ۇيىمىنىڭ (بۇدان ءارى – بۇۇ) جارعىسىنا سايكەس بىرلەسكەن حالىقارالىق ماجبۇرلەۋ ءىس-قيمىلدارىن جۇرگىزۋدى كوزدەيتىن بىتىمگەرشىلىك وپەراتسيا تۇرلەرىنىڭ ءبىرى;
5) بەيبىتشىلىك پەن قاۋىپسىزدىكتى قولداۋ جونىندەگى وپەراتسيا (ميسسيا) (بۇدان ءارى – بىتىمگەرشىلىك وپەراتسيا) – بولۋى ىقتيمال نەمەسە بولىپ جاتقان قارۋلى قاقتىعىس ايماقتارىنداعى (اۋداندارىنداعى) احۋالدى تۇراقتاندىرۋ ءۇشىن بۇۇ جارعىسىنا سايكەس قولدانىلاتىن, بىتىمگەرشىلىك وپەراتسيالار جۇرگىزۋگە ارنالعان مانداتقا سايكەس جۇزەگە اسىرىلاتىن جانە قاقتىعىستى شەشۋگە ىقپال ەتەتىن جاعدايلاردى جاساۋعا جانە بەيبىتشىلىك پەن
قاۋىپسىزدىكتى قولداۋعا نەمەسە قالپىنا كەلتىرۋگە باعىتتالعان, اسكەري جانە ازاماتتىق پەرسونالدىڭ ماقساتتارى, مىندەتتەرى, ورنى مەن ۋاقىتى بويىنشا ءوزارا بايلانىستى جانە كەلىسىلگەن ءىس-قيمىلدار جيىنتىعى;
6) بىتىمگەرشىلىك وپەراتسياعا دايىندىق (بۇدان ءارى – بىتىمگەرشىلىك دايىندىق) – قازاقستان رەسپۋبليكاسىنىڭ اۋماعىندا جانە ونىڭ شەگىنەن تىس جەردە وقۋ-جاتتىعۋلار جۇرگىزۋدى, كەلىسسوزدەر جۇرگىزۋدى, الدىن الا بارلاۋدى, جوسپارلاۋدى, ۇلتتىق كونتينگەنتتى, ونىڭ ىشىندە ارىپتەس مەملەكەتتەردىڭ قارۋلى كۇشتەرىنىڭ قاتىسۋىمەن وقىتۋدى, ماتەريالدىق-تەحنيكالىق جانە قارجىلىق قامتاماسىز ەتۋدى, جۇكتەر مەن ۇلتتىق كونتينگەنتتى تاسىمالداۋدى, جەدەل شتاب قۇرۋدى قامتيتىن ءىس-شارالار كەشەنى;
7) بىتىمگەرشىلىك وپەراتسيا جۇرگىزۋگە ارنالعان ماندات (بۇدان ءارى – ماندات) – بۇۇ جارعىسىنا سايكەس حالىقارالىق ۇيىم قابىلداعان جانە بىتىمگەرشىلىك وپەراتسيا جۇرگىزۋدى رەگلامەنتتەيتىن زاڭدى قۇجات;
8) قازاقستان رەسپۋبليكاسىنىڭ بىتىمگەرشىلىك قىزمەتى (بۇدان ءارى – بىتىمگەرشىلىك قىزمەت) – اسكەري جانە (نەمەسە) ازاماتتىق پەرسونالدى پايدالانا وتىرىپ, بۇۇ جارعىسىنىڭ ماقساتتارى مەن مىندەتتەرىنە سايكەس كەلەتىن, ءۇشىنشى تاراپتىڭ ارالاسۋى ارقىلى مەملەكەتتەر اراسىنداعى نەمەسە مەملەكەت شەگىندەگى قارۋلى قاقتىعىستاردى بولعىزباۋعا, تەجەۋگە جانە توقتاتۋعا باعىتتالعان جانە بەيبىتشىلىك پەن قاۋىپسىزدىكتى قولداۋعا ىقپال ەتەتىن قۇرالدار مەن ادىستەردى قامتيتىن شارالار جيىنتىعى, قازاقستان رەسپۋبليكاسى قابىلداعان حالىقارالىق مىندەتتەمەلەرگە سايكەس گۋمانيتارلىق كومەك كورسەتۋ;
9) قازاقستان رەسپۋبليكاسىنىڭ ۇلتتىق كونتينگەنتى (بۇدان ءارى – ۇلتتىق كونتينگەنت) – قازاقستان رەسپۋبليكاسىنىڭ اسكەري جانە (نەمەسە) ازاماتتىق پەرسونالى.
2-باپ. وسى زاڭنىڭ قولدانىلۋ اياسى
وسى زاڭنىڭ كۇشى بىتىمگەرشىلىك وپەراتسياعا قاتىساتىن (قاتىسقان), بىراق ۇلتتىق كونتينگەنتتىڭ قۇرامىنا كىرمەيتىن (كىرمەگەن) ادامدارعا قولدانىلمايدى.
3-باپ. قازاقستان رەسپۋبليكاسىنىڭ بىتىمگەرشىلىك قىزمەت سالاسىنداعى زاڭناماسى
1. قازاقستان رەسپۋبليكاسىنىڭ بىتىمگەرشىلىك قىزمەت سالاسىنداعى زاڭناماسى قازاقستان رەسپۋبليكاسىنىڭ كونستيتۋتسياسىنا نەگىزدەلەدى جانە وسى زاڭ مەن قازاقستان رەسپۋبليكاسىنىڭ وزگە دە نورماتيۆتىك قۇقىقتىق اكتىلەرىنەن تۇرادى.
2. ەگەر قازاقستان رەسپۋبليكاسى راتيفيكاتسيالاعان حالىقارالىق شارتتا وسى زاڭداعىدان وزگەشە قاعيدالار بەلگىلەنسە, وندا حالىقارالىق شارتتىڭ قاعيدالارى قولدانىلادى.
4-باپ. بىتىمگەرشىلىك قىزمەتتىڭ نەگىزگى قاعيداتتارى
بىتىمگەرشىلىك قىزمەتتىڭ نەگىزگى قاعيداتتارى:
1) زاڭدىلىق;
2) حالىقارالىق قۇقىق نورمالارىنىڭ ساقتالۋى;
3) تۋراشىلدىق جانە بەيتاراپتىلىق;
4) جەرگىلىكتى حالىقتىڭ ادەت-عۇرىپتارى مەن داستۇرلەرىنىڭ قۇرمەتتەلۋى;
5) بەيبىتشىلىككە ماجبۇرلەۋ جونىندەگى وپەراتسيالارعا قاتىسۋ جاعدايلارىنان باسقا, ۇرىس قيمىلدارىنا قاتىسپاۋ بولىپ تابىلادى.
5-باپ. بىتىمگەرشىلىك قىزمەتتىڭ ماقساتتارى
بىتىمگەرشىلىك قىزمەتتىڭ ماقساتتارى حالىقارالىق قوعامداستىققا جانە شەت مەملەكەتتەرگە (شەت مەملەكەتكە) مەملەكەتتەر اراسىنداعى نەمەسە مەملەكەت شەگىندەگى قارۋلى قاقتىعىستاردى بولعىزباۋعا, تەجەۋگە جانە توقتاتۋعا جاردەم كورسەتۋ, سونداي-اق قازاقستان رەسپۋبليكاسى قابىلداعان حالىقارالىق مىندەتتەمەلەرگە سايكەس گۋمانيتارلىق كومەك كورسەتۋ بولىپ تابىلادى.
6-باپ. بىتىمگەرشىلىك قىزمەتتىڭ مىندەتتەرى
بىتىمگەرشىلىك قىزمەتتىڭ مىندەتتەرى:
1) تاراپتار كەلىسپەۋشىلىكتەرىنىڭ الدىن الۋ, قاقتىعىستاردىڭ قارۋلى قاقتىعىستارعا ۇلاسۋىنا جول بەرمەۋ, قاقتىعىس اۋقىمىن شەكتەۋ;
2) كۇش كورسەتۋ ءىس-قيمىلدارىن توقتاتۋعا ديپلوماتيالىق قۇرالدارمەن جانە ادىستەرمەن جاردەمدەسۋ;
3) اسكەري پەرسونالدىڭ بۇۇ جارعىسىنا سايكەس بىرلەسكەن حالىقارالىق ماجبۇرلەۋ ءىس-قيمىلدارىنا قاتىسۋى;
4) بىتىمگەرشىلىك وپەراتسيا جۇرگىزۋ ايماعىندا (اۋدانىندا) اۋماقتى جانە (نەمەسە) حالىقتى قارۋلى شابۋىلدان قورعاۋ;
5) وق اتۋدى توقتاتۋ شارتتارىنىڭ ساقتالۋىن قامتاماسىز ەتۋ;
6) قاقتىعىسۋشى تاراپتاردى اجىراتۋ, بولىمشەلەردى قارۋسىزداندىرۋ جانە تاراتۋ;
7) بوسقىندار, ەل ىشىندە ۋاقىتشا ورنىن اۋىستىرعان ادامدار پروبلەمالارىن شەشۋگە جاردەمدەسۋ;
8) گۋمانيتارلىق كومەك كورسەتۋ;
9) بىتىمگەرشىلىك وپەراتسيا جۇرگىزۋ ايماعىندا (اۋدانىندا) ينفراقۇرىلىمدى قالپىنا كەلتىرۋ;
10) قۇقىقتىق ءتارتىپتى, حالىقتىڭ قاۋىپسىزدىگىن جانە ادام قۇقىقتارىنىڭ ساقتالۋىن قامتاماسىز ەتۋ;
11) مانداتتا كوزدەلگەن وزگە دە مىندەتتەر بولىپ تابىلادى.
2-تاراۋ. بىتىمگەرشىلىك قىزمەت سالاسىنداعى مەملەكەتتىك رەتتەۋ
7-باپ. قازاقستان رەسپۋبليكاسى پرەزيدەنتىنىڭ قۇزىرەتى
قازاقستان رەسپۋبليكاسىنىڭ پرەزيدەنتى:
1) قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسىنىڭ قاراۋىنا بەيبىتشىلىك پەن قاۋىپسىزدىكتى قولداۋ جونىندەگى حالىقارالىق مىندەتتەمەلەردى ورىنداۋ ءۇشىن قازاقستان رەسپۋبليكاسىنىڭ قارۋلى كۇشتەرىن پايدالانۋ تۋرالى ۇسىنىس ەنگىزەدى;
2) ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋدى اياقتاۋى تۋرالى, ۇلتتىق كونتينگەنتتى بىتىمگەرشىلىك وپەراتسيا جۇرگىزۋ ايماعىنان (اۋدانىنان) مەرزىمىنەن بۇرىن كەرى شاقىرتۋ تۋرالى, سونداي-اق شۇعىل ەۆاكۋاتسيالاۋ تۋرالى شەشىم قابىلدايدى;
3) قازاقستان رەسپۋبليكاسىنىڭ كونستيتۋتسياسىنا جانە زاڭدارىنا سايكەس وزگە دە وكىلەتتىكتەردى جۇزەگە اسىرادى.
8-باپ. قازاقستان رەسپۋبليكاسى ۇكىمەتىنىڭ قۇزىرەتى
قازاقستان رەسپۋبليكاسىنىڭ ۇكىمەتى:
1) قازاقستان رەسپۋبليكاسىنىڭ پرەزيدەنتىنە قارجىلاندىرۋ كوزدەرىن كورسەتە وتىرىپ, قاجەتتى شىعىستار تۋرالى قورىتىندىمەن بىرگە اسكەري پەرسونالدىڭ بىتىمگەرشىلىك وپەراتسياعا قاتىسۋى تۋرالى ۇسىنىس ەنگىزەدى;
2) ازاماتتىق پەرسونالدىڭ ەرىكتى نەگىزدە بىتىمگەرشىلىك وپەراتسياعا قاتىسۋى تۋرالى شەشىم قابىلدايدى;
3) مانداتقا سايكەس ازاماتتىق پەرسونالدىڭ قۇرامىن, سانىن, مىندەتتەرىن, بولۋ مەرزىمىن جانە اۋىستىرىلۋ, ولاردى بىتىمگەرشىلىك وپەراتسيا جۇرگىزۋ ورنىنا جانە كەرى قاراي تاسىمالداۋ ءتارتىبىن ايقىندايدى;
4) بىتىمگەرشىلىك وپەراتسيا جۇرگىزۋ ايماعىنا (اۋدانىنا) قاراي ۇلتتىق كونتينگەنتتى قوسىمشا م ۇلىكپەن قامتاماسىز ەتۋ, سونداي-اق ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋى ءۇشىن ونى قارجىلاندىرۋ كوزدەرىن كورسەتە وتىرىپ, قوسىمشا قاراجات ءبولۋ تۋرالى شەشىم قابىلدايدى;
5) ۇلتتىق كونتينگەنتكە سەنىپ تاپسىرىلعان م ۇلىكتى ارىپتەس مەملەكەتتەرگە نەمەسە قابىلداۋشى مەملەكەتكە بەرۋ تۋرالى شەشىم قابىلدايدى, سونداي-اق ونى ەسەپتەن شىعارۋ ءتارتىبىن ايقىندايدى;
6) بىتىمگەرشىلىك قىزمەت شەڭبەرىندە گۋمانيتارلىق كومەك كورسەتۋ, ۇلتتىق كونتينگەنتتى بىتىمگەرشىلىك وپەراتسيا جۇرگىزۋ ورنىنا جىبەرۋ جانە كەرى قايتارۋ, ۇلتتىق كونتينگەنتتى بىتىمگەرشىلىك وپەراتسيا جۇرگىزۋ ايماعىنان (اۋدانىنان) مەرزىمىنەن بۇرىن كەرى شاقىرتۋ, شۇعىل ەۆاكۋاتسيالاۋ جانە ۇلتتىق كونتينگەنت كەلتىرگەن زالالدى وتەۋ ءۇشىن قازاقستان رەسپۋبليكاسى ۇكىمەتىنىڭ رەزەرۆىنەن اقشالاي قاراجات بولەدى;
7) قازاقستان رەسپۋبليكاسىنىڭ بىتىمگەرشىلىك وپەراتسياعا قاتىسۋعا ارنالعان شىعىستارىن حالىقارالىق ۇيىمدار مەن ارىپتەس مەملەكەتتەردىڭ وتەۋىنە جاتاتىن ماسەلەلەردى شەشەدى;
8) بىتىمگەرشىلىك وپەراتسياعا دايىندىق قاعيدالارىن بەكىتەدى;
9) ۇلتتىق كونتينگەنت قۇرامىنا ءارتۇرلى مەملەكەتتىك ورگانداردان (ۇيىمداردان) اسكەري جانە ازاماتتىق پەرسونالدى تارتۋ كەزىندە بىتىمگەرشىلىك وپەراتسياعا دايىندىق قاعيدالارىنا سايكەس جەدەل شتاب قۇرادى;
10) وزىنە كونستيتۋتسيامەن, وسى زاڭمەن, قازاقستان رەسپۋبليكاسىنىڭ وزگە دە زاڭدارىمەن جانە قازاقستان رەسپۋبليكاسى پرەزيدەنتىنىڭ اكتىلەرىمەن جۇكتەلگەن وزگە دە فۋنكتسيالاردى ورىندايدى.
9-باپ. قازاقستان رەسپۋبليكاسى قورعانىس مينيسترلىگىنىڭ قۇزىرەتى
قازاقستان رەسپۋبليكاسىنىڭ قورعانىس مينيسترلىگى:
1) بىتىمگەرشىلىك وپەراتسياعا دايىندىق قاعيدالارىن ازىرلەيدى, سونداي-اق ولاردى ورىنداۋدى ۇيىمداستىرادى;
2) بىتىمگەرشىلىك وپەراتسياعا دايىندىق جوسپارىن ازىرلەيدى جانە بەكىتەدى;
3) وسى زاڭدا, قازاقستان رەسپۋبليكاسىنىڭ وزگە دە زاڭدارىندا, قازاقستان رەسپۋبليكاسىنىڭ پرەزيدەنتىنىڭ جانە قازاقستان رەسپۋبليكاسى ۇكىمەتىنىڭ اكتىلەرىندە كوزدەلگەن وزگە دە وكىلەتتىكتەردى جۇزەگە اسىرادى.
10-باپ. قازاقستان رەسپۋبليكاسىنىڭ وزگە دە مەملەكەتتىك ورگاندارىنىڭ (ۇيىمدارىنىڭ) قۇزىرەتى
1. ۇلتتىق كونتينگەنتتى بىتىمگەرشىلىك وپەراتسياعا قاتىسۋعا جىبەرۋدى جوسپارلايتىن مەملەكەتتىك ورگاندار (ۇيىمدار):
1) ەگەر قازاقستان رەسپۋبليكاسى ۇكىمەتىنىڭ شەشىمىندە, قازاقستان رەسپۋبليكاسىنىڭ حالىقارالىق شارتىندا نەمەسە مانداتتا وزگەشە ايقىندالماسا, اسكەري جانە (نەمەسە) ازاماتتىق پەرسونالدى م ۇلىكپەن قامتاماسىز ەتەدى;
2) بىتىمگەرشىلىك وپەراتسياعا دايىندىق جوسپارىنا سايكەس ۇلتتىق كونتينگەنتتى بىتىمگەرشىلىك دايىندىقتان وتۋگە جىبەرەدى;
3) ۇلتتىق كونتينگەنتتى بىتىمگەرشىلىك وپەراتسيا جۇرگىزۋ ورنىنا جانە كەرى قاراي جىبەرەدى;
4) بىتىمگەرشىلىك وپەراتسياعا قاتىسقان ازاماتتىق پەرسونالعا وسى زاڭنىڭ 17-بابىندا كوزدەلگەن جاعدايلاردا جانە نەگىزدەردە بىرجولعى وتەماقىلار تولەۋدى جۇزەگە اسىرادى.
2. سىرتقى ساياسات سالاسىنداعى ۋاكىلەتتى ورگان قازاقستان رەسپۋبليكاسىنىڭ پرەزيدەنتىنە جانە قازاقستان رەسپۋبليكاسىنىڭ ۇكىمەتىنە ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋىنىڭ سىرتقى ساياسي ورىندىلىعى تۋرالى ۇسىنىس ەنگىزەدى, كەلىسسوزدەر جۇرگىزەدى, بىتىمگەرشىلىك قىزمەت ماسەلەلەرى بويىنشا حالىقارالىق ۇيىمدارمەن جانە ارىپتەس مەملەكەتتەرمەن ءوزارا ءىس-قيمىل جاسايدى.
3. دەنساۋلىق ساقتاۋ سالاسىنداعى ۋاكىلەتتى ورگان ۇلتتىق كونتينگەنتكە ساپار الدىندا, بىتىمگەرشىلىك وپەراتسيا جۇرگىزۋ كەزەڭىندە پروفيلاكتيكالىق ەگۋلەر, سونداي-اق بىتىمگەرشىلىك وپەراتسيادان قايتىپ ورالعاننان كەيىن وڭالتۋ ءىس-شارالارىن جۇرگىزۋدى ۇيىمداستىرادى جانە قامتاماسىز ەتەدى.
4. بايلانىس جانە كولىك سالاسىنداعى ۋاكىلەتتى ورگان ۇلتتىق كونتينگەنتىن بىتىمگەرشىلىك وپەراتسياعا قاتىسۋعا جىبەرۋ جوسپارلانعان مەملەكەتتىك ورگاندارعا (ۇيىمدارعا) قولجەتىمدى بايلانىس تۇرلەرىمەن قامتاماسىز ەتۋگە جانە ۇلتتىق كونتينگەنت پەن جۇكتەردى بىتىمگەرشىلىك وپەراتسيا جۇرگىزۋ ايماعىنا (اۋدانىنا) جانە كەرى قاراي تاسىمالداۋعا جاردەمدەسەدى.
5. حالىقتى الەۋمەتتىك قورعاۋ سالاسىنداعى ۋاكىلەتتى ورگان ۇلتتىق كونتينگەنت قاتارىنداعى ادام مەرتىككەن, كونتۋزيا العان, جاراقاتتانعان, اۋىرعان جانە قازا تاپقان (قايتىس بولعان) جاعدايلاردا قازاقستان رەسپۋبليكاسىنىڭ زاڭناماسىنا سايكەس مۇگەدەكتىگى بويىنشا, اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلار تولەۋدى ۇيىمداستىرادى.
3-تاراۋ. ۇلتتىق كونتينگەنتتى بىتىمگەرشىلىك وپەراتسياعا قاتىسۋ ءۇشىن جىبەرۋ
11-باپ. ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋى تۋرالى شەشىم قابىلداۋ ءتارتىبى
1. ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋى تۋرالى ماسەلەنى قاراۋ ءۇشىن حالىقارالىق ۇيىمنىڭ شەشىمى جانە (نەمەسە) قازاقستان رەسپۋبليكاسى راتيفيكاتسيالاعان حالىقارالىق شارت نەگىزدەر بولىپ تابىلادى.
2. بىتىمگەرشىلىك وپەراتسياعا اسكەري پەرسونالدىڭ قاتىسۋى ءۇشىن:
1) سىرتقى ساياسات سالاسىنداعى ۋاكىلەتتى ورگان قازاقستان رەسپۋبليكاسىنىڭ پرەزيدەنتىنە جانە قازاقستان رەسپۋبليكاسىنىڭ ۇكىمەتىنە اسكەري پەرسونالدىڭ بىتىمگەرشىلىك وپەراتسياعا قاتىسۋىنىڭ سىرتقى ساياسي ورىندىلىعى تۋرالى ۇسىنىس ەنگىزەدى, كەلىسسوزدەر جۇرگىزەدى, بىتىمگەرشىلىك قىزمەت ماسەلەلەرى بويىنشا حالىقارالىق ۇيىمدارمەن جانە ارىپتەس مەملەكەتتەرمەن ءوزارا ءىس-قيمىل جاسايدى;
2) اسكەري پەرسونالدىڭ بىتىمگەرشىلىك وپەراتسياعا قاتىسۋىنىڭ سىرتقى ساياسي ورىندىلىعى تۋرالى ۇسىنىس قولداۋ تاپقان جاعدايدا, قازاقستان رەسپۋبليكاسىنىڭ ۇكىمەتى قازاقستان رەسپۋبليكاسىنىڭ پرەزيدەنتىنە قاجەتتى شىعىستار تۋرالى قورىتىندىمەن, اسكەري پەرسونالدىڭ بىتىمگەرشىلىك وپەراتسياعا قاتىسۋى ءۇشىن ونى قارجىلاندىرۋ كوزدەرىن كورسەتە وتىرىپ, قوسىمشا قاراجات ءبولۋ تۋرالى شەشىمنىڭ نەگىزدەمەسىمەن بىرگە ۇسىنىس ەنگىزەدى.
ۇسىنىستا بىتىمگەرشىلىك وپەراتسيا جۇرگىزۋ ايماعى (اۋدانى), مىندەتتەر, جالپى سانى, قارۋ-جاراقتىڭ ءتۇرى مەن قۇرامى, م ۇلىك, باعىنىستىلىق, بولۋ مەرزىمى, اۋىستىرۋ ءتارتىبى, شىعارۋ, بىتىمگەرشىلىك وپەراتسيا جۇرگىزۋ ورنىنا جانە كەرى قاراي تاسىمالداۋ شارتتارى تۋرالى مالىمەتتەر, سونداي-اق ناقتى بىتىمگەرشىلىك وپەراتسياعا بايلانىستى باسقا دا اقپارات قامتىلۋعا ءتيىس.
3. بەيبىتشىلىك پەن قاۋىپسىزدىكتى قولداۋ جونىندەگى حالىقارالىق مىندەتتەمەلەردى ورىنداۋ ءۇشىن قازاقستان رەسپۋبليكاسىنىڭ قارۋلى كۇشتەرىن پايدالانۋ تۋرالى شەشىم قازاقستان رەسپۋبليكاسى كونستيتۋتسياسىنىڭ
53-بابىنىڭ 5) تارماقشاسىنا سايكەس قابىلدانادى.
4. قازاقستان رەسپۋبليكاسىنىڭ قورعانىس مينيسترلىگى قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسىندا قابىلدانعان قازاقستان رەسپۋبليكاسىنىڭ قارۋلى كۇشتەرىن پايدالانۋ تۋرالى شەشىمنىڭ نەگىزىندە اسكەري پەرسونالدى بىتىمگەرشىلىك وپەراتسياعا قاتىسۋ ءۇشىن جىبەرەدى.
5. بىتىمگەرشىلىك وپەراتسياعا ازاماتتىق پەرسونالدىڭ قاتىسۋى ءۇشىن:
1) سىرتقى ساياسات سالاسىنداعى ۋاكىلەتتى ورگان قازاقستان رەسپۋبليكاسىنىڭ قورعانىس مينيسترلىگىمەن جانە باسقا دا مۇددەلى ورتالىق مەملەكەتتىك ورگاندارمەن كەلىسۋ بويىنشا سىرتقى ساياسي ورىندىلىعىن قاراۋ جانە حالىقارالىق ۇيىمدارمەن جانە (نەمەسە) اۋماعىندا بىتىمگەرشىلىك وپەراتسيا جۇرگىزىلەتىن ارىپتەس مەملەكەتتەرمەن كەلىسۋ ناتيجەلەرى بويىنشا قازاقستان رەسپۋبليكاسىنىڭ ۇكىمەتىنە بىتىمگەرشىلىك وپەراتسياعا ازاماتتىق پەرسونالدىڭ قاتىسۋى تۋرالى ۇسىنىس ەنگىزەدى;
2) بىتىمگەرشىلىك وپەراتسياعا ازاماتتىق پەرسونالدىڭ قاتىسۋى تۋرالى ۇسىنىس قولداۋ تاپقان جاعدايدا, قازاقستان رەسپۋبليكاسىنىڭ ۇكىمەتى ازاماتتىق پەرسونالدىڭ بىتىمگەرشىلىك وپەراتسياعا قاتىسۋى جانە قوسىمشا قاراجات ءبولۋ تۋرالى قارجىلاندىرۋ كوزدەرىن, بىتىمگەرشىلىك وپەراتسيا جۇرگىزۋ ايماعى (اۋدانى), مىندەتتەر, جالپى سانى, م ۇلىك, باعىنىستىلىق, بولۋ مەرزىمى, اۋىستىرۋ ءتارتىبى, شىعارۋ, بىتىمگەرشىلىك وپەراتسيا جۇرگىزۋ ورنىنا جانە كەرى قاراي تاسىمالداۋ شارتتارى تۋرالى مالىمەتتەردى,
سونداي-اق ناقتى بىتىمگەرشىلىك وپەراتسياعا بايلانىستى باسقا دا اقپاراتتى كورسەتە وتىرىپ شەشىم قابىلدايدى;
3) قازاقستان رەسپۋبليكاسىنىڭ مەملەكەتتىك ورگاندارى (ۇيىمدارى) قازاقستان رەسپۋبليكاسىنىڭ ۇكىمەتى قابىلداعان شەشىمنىڭ نەگىزىندە ءتيىستى ازاماتتىق پەرسونالدى بىتىمگەرشىلىك وپەراتسياعا قاتىسۋ ءۇشىن جىبەرەدى.
12-باپ. ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋدى اياقتاۋىنا نەگىزدەر
1. ۇلتتىق كونتينگەنتتىڭ بىتىمگەرشىلىك وپەراتسياعا قاتىسۋدى اياقتاۋىنا مىنالار نەگىزدەر بولىپ تابىلادى:
1) بىتىمگەرشىلىك وپەراتسيانىڭ اياقتالۋى;
2) بىتىمگەرشىلىك وپەراتسياعا قاتىسۋ مەرزىمىنىڭ اياقتالۋى;
3) قازاقستان رەسپۋبليكاسى پرەزيدەنتىنىڭ شەشىمى;
4) قازاقستان رەسپۋبليكاسىنىڭ بىتىمگەرشىلىك وپەراتسياعا ودان ءارى قاتىسۋى ورىنسىز بولاتىن حالىقارالىق اسكەري-ساياسي احۋالدىڭ وزگەرۋىنە بايلانىستى مەرزىمىنەن بۇرىن كەرى شاقىرتۋ;
5) بىتىمگەرشىلىك وپەراتسيا جۇرگىزۋ ايماعىندا (اۋدانىندا) قاقتىعىستىڭ شيەلەنىسۋى مەن قارقىندىلىعى كۇرت ورشىگەن جاعدايدا شۇعىل ەۆاكۋاتسيالاۋ;
6) قازاقستان رەسپۋبليكاسىنىڭ حالىقارالىق شارتىندا كوزدەلگەن وزگە دە نەگىزدەر.
2. ۇلتتىق كونتينگەنت بىتىمگەرشىلىك وپەراتسيا جۇرگىزۋ ايماعىنان (اۋدانىنان) ءۇشىنشى ەلدەرگە شۇعىل ەۆاكۋاتسيالانعان جاعدايدا, ۇلتتىق كونتينگەنتتىڭ قازاقستان رەسپۋبليكاسىنا كەلگەن كۇنى بىتىمگەرشىلىك وپەراتسياعا قاتىسۋ اياقتالدى دەپ ەسەپتەلەدى.
13-باپ. ۇلتتىق كونتينگەنتتى جاساقتاۋ جانە دايىنداۋ
1. اسكەري پەرسونالدى جاساقتاۋ كەلىسىمشارت بويىنشا اسكەري قىزمەت وتكەرىپ جاتقان جانە بىتىمگەرشىلىك دايىندىقتان وتكەن قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ اسكەري قىزمەتشىلەرى قاتارىنان ەرىكتى نەگىزدە جۇزەگە اسىرىلادى.
2. ازاماتتىق پەرسونالدى جاساقتاۋ بىتىمگەرشىلىك دايىندىقتان وتكەن ادامدار قاتارىنان ەرىكتى نەگىزدە جۇزەگە اسىرىلادى. ول شتاتىندا تۇرعان مەملەكەتتىك ورگاننىڭ (ۇيىمنىڭ) ازاماتتىق پەرسونالىمەن كەلىسىمشارت جاسالادى, وندا بىتىمگەرشىلىك وپەراتسياعا قاتىسۋ شارتتارى مەن ءتارتىبى جازىلادى. كەلىسىمشارت نىسانى بىتىمگەرشىلىك وپەراتسياعا دايىندىق قاعيدالارىندا بەلگىلەنەدى.
3. ۇلتتىق كونتينگەنتتى بىتىمگەرشىلىك وپەراتسياعا وقىتۋ مەن دايىنداۋ بىتىمگەرشىلىك وپەراتسياعا دايىندىق قاعيدالارىنا سايكەس جۇرگىزىلەدى.
4. بىتىمگەرشىلىك دايىندىق قازاقستان رەسپۋبليكاسىنىڭ قورعانىس ءمينيسترى بەكىتكەن جوسپار بويىنشا قازاقستان رەسپۋبليكاسى قورعانىس مينيسترلىگىنىڭ بازاسىندا جۇزەگە اسىرىلادى.
5. بىتىمگەرشىلىك دايىندىقتان ءوتىپ جاتقان ادامداردىڭ بىتىمگەرشىلىك دايىندىق ۋاقىتىندا جالاقىسى مەن جۇمىس ورنى ساقتالادى. ەڭبەككە اقى تولەۋدى, ءىسساپار شىعىستارىن تولەۋدى وقۋداعى ادام شتاتىندا تۇرعان مەملەكەتتىك ورگان (ۇيىم) جۇزەگە اسىرادى.
6. بىتىمگەرشىلىك دايىندىقتى قامتاماسىز ەتۋ ماقساتىندا ازاماتتىق مامانداردى جانە شەت مەملەكەتتەردىڭ قارۋلى كۇشتەرىنىڭ بولىمشەلەرىن تارتا وتىرىپ, وقۋ-جاتتىعۋلار, كۋرستار, سەمينارلار, ترەنينگتەر جانە باسقا دا ءىس-شارالار وتكىزىلۋى مۇمكىن.
14-باپ. ۇلتتىق كونتينگەنتتى ماتەريالدىق-تەحنيكالىق قامتاماسىز ەتۋ
1. ۇلتتىق كونتينگەنتتى ماتەريالدىق-تەحنيكالىق قامتاماسىز ەتۋدى ونى جىبەرەتىن مەملەكەتتىك ورگان (ۇيىم) جۇزەگە اسىرادى.
2. ۇلتتىق كونتينگەنتتى باسقا مەملەكەتتىك ورگاندا (ۇيىمدا) بار م ۇلىكپەن قوسىمشا ماتەريالدىق-تەحنيكالىق قامتاماسىز ەتۋ قاجەت بولعان كەزدە قازاقستان رەسپۋبليكاسىنىڭ ۇكىمەتى قوسىمشا م ۇلىكتى ءبىر مەملەكەتتىك ورگاننان (ۇيىمنان) باسقا مەملەكەتتىك ورگانعا (ۇيىمعا) بەرۋ تۋرالى شەشىم قابىلدايدى.
3. مەملەكەتتىك ورگانداردا (ۇيىمداردا) قوسىمشا م ۇلىك بولماعان جاعدايدا, م ۇلىك وسى زاڭنىڭ 23-بابىندا كوزدەلگەن قاراجات ەسەبىنەن ساتىپ الىنادى.
4-تاراۋ. ۇلتتىق كونتينگەنتتى الەۋمەتتىك قورعاۋ, ونىڭ قۇقىقتارى, مىندەتتەرى مەن جاۋاپتىلىعى
15-باپ. بىتىمگەرشىلىك وپەراتسيا جۇرگىزۋ ايماعىندا (اۋدانىندا) مەديتسينالىق قامتاماسىز ەتۋ
1. بىتىمگەرشىلىك وپەراتسيا جۇرگىزۋ ايماعىندا (اۋدانىندا) مەديتسينالىق ۇيىمدار نەمەسە بولىمشەلەر, مەديتسينالىق جابدىق بولماعان كەزدە ۇلتتىق كونتينگەنتتى بىتىمگەرشىلىك وپەراتسيا جۇرگىزۋ ايماعىندا (اۋدانىندا) مەديتسينالىق قامتاماسىز ەتۋ حالىقارالىق شارتتار نەگىزىندە ارىپتەس مەملەكەتتەردىڭ, بولاتىن ەلدىڭ مەديتسينالىق ۇيىمدارىندا جۇزەگە اسىرىلادى.
2. بىتىمگەرشىلىك وپەراتسيا جۇرگىزۋ ايماعىندا (اۋدانىندا) مامانداندىرىلعان مەديتسينالىق ۇيىمدار بولماعان كەزدە ازاماتتىق پەرسونال اسكەري پەرسونالدىڭ اسكەري-مەديتسينالىق بولىمشەلەرىندە وتەۋسىز مەديتسينالىق قامتاماسىز ەتىلەدى.
16-باپ. ۇلتتىق كونتينگەنتتى الەۋمەتتىك قامسىزداندىرۋ
1. ۇلتتىق كونتينگەنت بىتىمگەرشىلىك وپەراتسياعا قاتىسۋ كەزەڭىندە ءۇش ەسەلەنگەن اقشالاي قامتىلىممەن (جالاقىمەن) قامتاماسىز ەتىلەدى. ەڭبەككە اقى تولەۋدى ۇلتتىق كونتينگەنت قاتارىنداعى ادامدار شتاتىندا تۇرعان مەملەكەتتىك ورگاندار (ۇيىمدار) جۇزەگە اسىرادى.
2. ۇلتتىق كونتينگەنت قاتارىنداعى ادام بىتىمگەرشىلىك وپەراتسيادان قايتىپ ورالعاننان كەيىن ءوزى جۇمىسكەرى, قىزمەتكەرى بولىپ تابىلاتىن مەملەكەتتىك ورگاننىڭ (ۇيىمنىڭ) قاراجاتى ەسەبىنەن كەمىندە كۇنتىزبەلىك جەتى كۇن, بىراق جيىرما ءبىر تاۋلىكتەن اسپايتىن مەرزىمگە ساناتوري-كۋرورتتىق ەمدەلۋگە جىبەرىلەدى.
3. بىتىمگەرشىلىك وپەراتسياعا قاتىسۋ كەزەڭىندە, سونداي-اق بىتىمگەرشىلىك وپەراتسيا جۇرگىزۋ ايماعىنا (اۋدانىنا) بارۋ جانە كەرى قايتۋ كەزىندە, ەگەر حالىقارالىق شارتتاردا وزگەشە كوزدەلمەسە, ۇلتتىق كونتينگەنت قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ اسكەري قىزمەتشىلەرى ءۇشىن قازاقستان رەسپۋبليكاسىنىڭ زاڭناماسىندا بەلگىلەنگەن نورمالار بويىنشا قازاقستان رەسپۋبليكاسىنىڭ مەملەكەتتىك بيۋدجەتىنىڭ قاراجاتى ەسەبىنەن تاماقتاندىرۋمەن قامتاماسىز ەتىلەدى.
قازاقستان رەسپۋبليكاسى ۇلتتىق قاۋىپسىزدىك كوميتەتى شەكارا قىزمەتىنىڭ قازاقستان رەسپۋبليكاسى ازاماتىنىڭ پاسپورتىنا بەلگى قويۋىمەن ايقىندالاتىن, قازاقستان رەسپۋبليكاسىنان كەتكەن جانە قازاقستان رەسپۋبليكاسىنا كەلگەن كەزدەن باستاپ ەسەپتەلەتىن ۋاقىت بىتىمگەرشىلىك وپەراتسياعا قاتىسۋ كەزەڭى دەپ ەسەپتەلەدى. قازاقستان رەسپۋبليكاسى ازاماتى پاسپورتىنىڭ بولۋى مىندەتتى ەمەس ەلدەرگە كەتكەن كەزدە قازاقستان رەسپۋبليكاسىنىڭ مەملەكەتتىك شەكاراسىن كەسىپ وتكەن كۇندەر بىتىمگەرشىلىك وپەراتسياعا قاتىسۋ كەزەڭى دەپ ەسەپتەلەدى.
4. بىتىمگەرشىلىك وپەراتسياعا قاتىساتىن (قاتىسقان) اسكەري پەرسونالدى الەۋمەتتىك قامسىزداندىرۋ قازاقستان رەسپۋبليكاسىنىڭ زاڭناماسىندا كوزدەلگەن تارتىپپەن جۇرگىزىلەدى.
5. بەيبىتشىلىككە ماجبۇرلەۋ جونىندەگى وپەراتسيالارعا قاتىساتىن اسكەري پەرسونالعا بىتىمگەرشىلىك وپەراتسيا ايماعىندا (اۋدانىندا) بولعان كەزەڭى ۇرىس قيمىلدارىنا قاتىسۋمەن تەڭەستىرىلەدى.
17-باپ. ازاماتتىق پەرسونالدى الەۋمەتتىك قامسىزداندىرۋ ەرەكشەلىكتەرى
1. بىتىمگەرشىلىك وپەراتسياعا قاتىساتىن (قاتىسقان) ازاماتتىق پەرسونالعا بىتىمگەرشىلىك وپەراتسيادان كەلگەننەن كەيىن ءبىر جىل ىشىندە ۇزاقتىعى كۇنتىزبەلىك ون ءتورت كۇن قوسىمشا جىل سايىنعى اقىلى ەڭبەك دەمالىسى بەرىلەدى.
2. بىتىمگەرشىلىك وپەراتسياعا جانە بىتىمگەرشىلىك دايىندىققا قاتىسۋ كەزەڭىندە ازاماتتىق پەرسونالدىڭ مەملەكەتتىك ورگانداعى (ۇيىمداعى) جۇمىس ورنى ساقتالادى.
3. ازاماتتىق پەرسونال قاتارىنداعى ادام ءبىتىمگەرشىلىك وپەراتسيا كەزەڭىندە, سونداي-اق بىتىمگەرشىلىك وپەراتسياعا قاتىسۋ ناتيجەسىندە مەرتىگۋى (جارالانۋى, جاراقاتتانۋى, كونتۋزيا الۋى), اۋىرۋى سالدارىنان قازا تاپقان (قايتىس بولعان), بىتىمگەرشىلىك وپەراتسيا كەزەڭىندە مۇگەدەكتىك بەلگىلەنگەن نەمەسە مەرتىككەن (جارالانعان, جاراقاتتانعان, كونتۋزيا العان) جاعدايلاردا, قازاقستان رەسپۋبليكاسىنىڭ ۇكىمەتى ايقىندايتىن تارتىپپەن بىرجولعى وتەماقى تولەۋ جۇرگىزىلەدى.
4. ازاماتتىق پەرسونال قاتارىنداعى ادام ءبىتىمگەرشىلىك وپەراتسيا كەزەڭىندە, سونداي-اق بىتىمگەرشىلىك وپەراتسياعا قاتىسۋ ناتيجەسىندە مەرتىگۋى (جارالانۋى, جاراقاتتانۋى, كونتۋزيا الۋى), اۋىرۋى سالدارىنان قازا تاپقان (قايتىس بولعان) جاعدايلاردا, ادامنىڭ بىتىمگەرشىلىك وپەراتسياعا قاتىسۋى اياقتالعان كۇننەن باستاپ ءبىر جىل وتكەنگە دەيىن ازاماتتىق پەرسونال قاتارىنداعى ادامنىڭ مۇراگەرلەرىنە قازا تاپقان (قايتىس بولعان) كۇنى سوڭعى اتقارعان لاۋازىمى بويىنشا بەس جىلدىق جالاقىسى مولشەرىندە بىرجولعى وتەماقى تولەۋ جۇرگىزىلەدى.
5. ازاماتتىق پەرسونال قاتارىنداعى ادامعا بىتىمگەرشىلىك وپەراتسياعا قاتىسۋ كەزەڭىندە نەمەسە بىتىمگەرشىلىك وپەراتسياعا قاتىسۋ ناتيجەسىندە مەرتىگۋى (جارالانۋى, جاراقاتتانۋى, كونتۋزيا الۋى), اۋىرۋى سالدارىنان بولعان مۇگەدەكتىك بەلگىلەنگەن كەزدە بىرجولعى وتەماقى ادامنىڭ بىتىمگەرشىلىك وپەراتسياعا قاتىسۋى اياقتالعان كۇننەن باستاپ ءبىر جىل وتكەنگە دەيىن سوڭعى جۇمىس ورنى (اتقارعان لاۋازىمى) بويىنشا:
1) I توپتاعى مۇگەدەككە – وتىز ايلىق جالاقى;
2) II توپتاعى مۇگەدەككە – ون سەگىز ايلىق جالاقى;
3) III توپتاعى مۇگەدەككە – التى ايلىق جالاقى مولشەرىندە تولەنەدى.
6. ەگەر ازاماتتىق پەرسونال قاتارىنداعى ادامنىڭ قازا تابۋى (قايتىس بولۋى) نەمەسە ونىڭ مەرتىگۋى (جارالانۋى, جاراقاتتانۋى, كونتۋزيا الۋى):
1) سوتتىڭ زاڭدى كۇشىنە ەنگەن ۇكىمى بولعان كەزدە وزىنە-ءوزى قول جۇمساۋعا دەيىن جەتكىزۋ جاعدايلارىن قوسپاعاندا, وزىنە-ءوزى قول جۇمساۋ سالدارىنان;
2) قىلمىستىق نەمەسە اكىمشىلىك قۇقىق بۇزۋشىلىقتار جاساعان كەزدە;
3) ونىڭ الكوگولدىك, ەسىرتكىلىك نەمەسە وزگەدەي ماساڭ كۇي تۋعىزاتىن زاتتاردى تۇتىنۋى نەمەسە قولدانۋى سەبەبىنەن;
4) بىرجولعى وتەماقى الۋ نەمەسە مىندەتتەرىن ورىنداۋدان جالتارۋ ماقساتىندا وزىنە قاساقانا قانداي دا ءبىر دەنە زاقىمىن (دەنە مۇشەسىن زاقىمداۋ) نەمەسە ءوز دەنساۋلىعىنا وزگە دە زيان كەلتىرۋ سالدارىنان بولعانى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن دالەلدەنسە, بىرجولعى وتەماقى تولەنبەيدى.
7. ازاماتتىق پەرسونال قاتارىنداعى ادام ءبىتىمگەرشىلىك وپەراتسياعا قاتىسۋ كەزەڭىندە مۇگەدەكتىككە اكەپ سوقپاعان اۋىر مەرتىككەن (جارالانعان, جاراقاتتانعان, كونتۋزيا العان) جاعدايدا, وعان – ءبىر جارىم ايلىق جالاقىسى, جەڭىل مەرتىككەندە جارتى ايلىق جالاقىسى مولشەرىندە بىرجولعى وتەماقى تولەنەدى.
8. بىتىمگەرشىلىك وپەراتسياعا قاتىسۋ كەزىندە قازا تاپقان نەمەسە بىتىمگەرشىلىك وپەراتسياعا قاتىسۋ ناتيجەسىندە مەرتىگۋى (جارالانۋى, جاراقاتتانۋى, كونتۋزيا الۋى), اۋىرۋى سالدارىنان ادامنىڭ بىتىمگەرشىلىك وپەراتسياعا قاتىسۋى اياقتالعان كۇننەن باستاپ ءبىر جىل وتكەنگە دەيىن قايتىس بولعان ازاماتتىق پەرسونال قاتارىنداعى ادامدى جەرلەۋ قازاقستان رەسپۋبليكاسىندا ونىڭ تۋىستارى تاڭداعان جەردە جۇرگىزىلەدى. ءمايىتتى جەتكىزۋگە ازىرلەۋمەن, ءمايىتتى جەتكىزۋمەن, جەرلەۋمەن, قۇلپىتاس دايىنداۋمەن جانە ورناتۋمەن بايلانىستى بارلىق شىعىستار ازاماتتىق پەرسونال جۇمىسكەرى, قىزمەتكەرى بولىپ تابىلعان مەملەكەتتىك ورگاننىڭ (ۇيىمنىڭ) ەسەبىنەن قازاقستان رەسپۋبليكاسىنىڭ ۇكىمەتى قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ اسكەري قىزمەتشىلەرى ءۇشىن بەلگىلەگەن مولشەردە جۇزەگە اسىرىلادى.
18-باپ. ۇلتتىق كونتينگەنتتىڭ قۇقىقتارى مەن مىندەتتەرى
1. ۇلتتىق كونتينگەنت قازاقستان رەسپۋبليكاسىنىڭ كونستيتۋتسياسىندا جانە زاڭدارىندا كوزدەلگەن بارلىق قۇقىقتاردى پايدالانادى.
بىتىمگەرشىلىك وپەراتسيادا ۇلتتىق كونتينگەنتتىڭ قۇقىقتارى مەن بوستاندىقتارى بولاتىن ەلدىڭ زاڭدارىمەن, قازاقستان رەسپۋبليكاسى راتيفيكاتسيالاعان حالىقارالىق شارتتارمەن عانا شەكتەلەدى نەمەسە كەڭەيتىلەدى.
2. ۇلتتىق كونتينگەنت قازاقستان رەسپۋبليكاسىنىڭ كونستيتۋتسياسىن, زاڭدارىن جانە بولاتىن ەلدىڭ زاڭدارىن ساقتاۋعا, سونداي-اق جەرگىلىكتى حالىقتىڭ ادەت-عۇرىپتارى مەن داستۇرلەرىن قۇرمەتتەۋگە مىندەتتى.
3. اسكەري پەرسونالعا قازاقستان رەسپۋبليكاسىنىڭ زاڭناماسىندا جانە قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ جالپى اسكەري جارعىلارىندا كوزدەلگەن مىندەتتەر جۇكتەلەدى. بىتىمگەرشىلىك وپەراتسياداعى مىندەتتەر اياسى مانداتپەن شەكتەلۋى نەمەسە كەڭەيتىلۋى مۇمكىن.
4. ۇلتتىق كونتينگەنتكە بىتىمگەرشىلىك وپەراتسيادا اتقارىپ وتىرعان لاۋازىمىنا سايكەس لاۋازىمدىق مىندەتتەر جۇكتەلەدى.
19-باپ. ۇلتتىق كونتينگەنتتىڭ قارۋ قولدانۋى
ۇلتتىق كونتينگەنتتىڭ قارۋ الىپ ءجۇرۋ جانە قولدانۋ قاعيدالارى قازاقستان رەسپۋبليكاسىنىڭ زاڭناماسىندا, قازاقستان رەسپۋبليكاسى قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ جالپى اسكەري جارعىلارىندا, سونداي-اق مانداتتا, قازاقستان رەسپۋبليكاسى راتيفيكاتسيالاعان حالىقارالىق شارتتاردا ايقىندالادى.
قارۋ قولدانعان كەزدە ۇلتتىق كونتينگەنت اينالاداعى ازاماتتاردىڭ قاۋىپسىزدىگىن قامتاماسىز ەتۋ ءۇشىن بارلىق مۇمكىن بولاتىن شارالاردى قولدانۋعا, ال قاجەت بولعان جاعدايدا, زارداپ شەككەندەرگە شۇعىل مەديتسينالىق كومەك كورسەتۋگە مىندەتتى.
ۇلتتىق كونتينگەنت قاتارىنداعى ادام قارۋ قولدانىلعان ءاربىر جاعداي تۋرالى كومانديرگە (باستىققا) باياندايدى.
20-باپ. ۇلتتىق كونتينگەنتتىڭ جاۋاپتىلىعى
ۇلتتىق كونتينگەنت قىلمىستارى, تەرىس قىلىقتارى جانە وزگە دە قۇقىق بۇزۋشىلىقتارى ءۇشىن قازاقستان رەسپۋبليكاسىنىڭ زاڭدارىنا جانە قازاقستان رەسپۋبليكاسى راتيفيكاتسيالاعان حالىقارالىق شارتتارعا سايكەس قىلمىستىق, اكىمشىلىك, ازاماتتىق-قۇقىقتىق جانە تارتىپتىك جاۋاپتىلىقتا بولادى.
ۇلتتىق كونتينگەنت قاتارىنداعى ادام نەمەسە ادامدار توبى بىتىمگەرشىلىك وپەراتسيا كەزەڭىندە ونىڭ (ولاردىڭ) بىتىمگەرشىلىك وپەراتسيا جۇرگىزۋ ايماعىندا (اۋدانىندا) ودان ءارى بولۋىنا جول بەرمەيتىن قۇقىق بۇزۋشىلىقتار جاساعان كەزدە اۋىستىرۋ بويىنشا شىعىستار اتالعان ادامداردىڭ قاراجاتى ەسەبىنەن وتەلەدى, ولار ادامنىڭ نەمەسە ادامدار توبىنىڭ قازاقستان رەسپۋبليكاسىنان بىتىمگەرشىلىك وپەراتسيا جۇرگىزۋ ورنىنا بارۋى جانە كەرى قايتۋى بويىنشا شىعىستاردى قامتيدى.
21-باپ. بىتىمگەرشىلىك وپەراتسيا جۇرگىزۋ ايماعىنداعى (اۋدانىنداعى) يۋريسديكتسيا
بىتىمگەرشىلىك وپەراتسيا جۇرگىزۋ ايماعىندا (اۋدانىندا) شەتەلدىكتەر ۇلتتىق كونتينگەنتكە قاتىستى قۇقىق بۇزۋشىلىقتار جاساعان جاعدايدا, ەگەر قازاقستان رەسپۋبليكاسى راتيفيكاتسيالاعان حالىقارالىق شارتتاردا وزگەشە ەسكەرىلمەسە, بولاتىن ەلدىڭ زاڭدارى قولدانىلادى.
22-باپ. بىتىمگەرشىلىك قىزمەت سالاسىندا قاداعالاۋدى جۇزەگە اسىرۋ
قازاقستان رەسپۋبليكاسىنىڭ بىتىمگەرشىلىك قىزمەت سالاسىنداعى زاڭناماسىنىڭ دالمە-ءدال ءارى بىركەلكى قولدانىلۋىن جوعارى قاداعالاۋدى قازاقستان رەسپۋبليكاسىنىڭ باس پروكۋرورى جانە ول ۋاكىلەتتىك بەرگەن پروكۋرورلار جۇزەگە اسىرادى.
5-تاراۋ. قورىتىندى ەرەجەلەر
23-باپ. بىتىمگەرشىلىك قىزمەتتى قارجىلاندىرۋ
1. بىتىمگەرشىلىك قىزمەتتى قارجىلاندىرۋ:
1) جۇمىسكەرلەرى, قىزمەتكەرلەرى بىتىمگەرشىلىك وپەراتسياعا قاتىسۋعا جىبەرىلەتىن مەملەكەتتىك ورگانداردى (ۇيىمداردى) ۇستاۋعا كوزدەلگەن;
2) بىتىمگەرشىلىك قىزمەتتى قارجىلاندىرۋ ءۇشىن نەمەسە بىتىمگەرشىلىك وپەراتسياعا جۇمسالاتىن شىعىنداردى تولىق نەمەسە ءىشىنارا وتەۋ تارتىبىمەن بۇۇ, وزگە دە حالىقارالىق ۇيىمدار جانە ارىپتەس مەملەكەتتەر بولەتىن;
3) قازاقستان رەسپۋبليكاسى ۇكىمەتى رەزەرۆىنىڭ قاراجاتى ەسەبىنەن جۇرگىزىلەدى.
2. قازاقستان رەسپۋبليكاسىنىڭ بىتىمگەرشىلىك وپەراتسياعا كەتەتىن شىعىندارىن تولىق نەمەسە ءىشىنارا وتەۋ تارتىبىمەن بۇۇ, وزگە دە حالىقارالىق ۇيىمدار جانە ارىپتەس مەملەكەتتەر بولەتىن قاراجات رەسپۋبليكالىق بيۋدجەت كىرىسىنە تۇسەدى.
24-باپ. بىتىمگەرشىلىك قىزمەتتە پايدالانىلاتىن م ۇلىكتى قازاقستان رەسپۋبليكاسىنىڭ مەملەكەتتىك شەكاراسى ارقىلى الىپ ءوتۋ
ۇلتتىق كونتينگەنتتىڭ جۇمىس ىستەۋى نەمەسە بىتىمگەرشىلىك دايىندىقتى جۇرگىزۋ ءۇشىن قاجەتتى جاي قارۋ-جاراق پەن اسكەري تەحنيكانى قازاقستان رەسپۋبليكاسىنىڭ اۋماعىنا اكەلۋ (اۋماعىنان اكەتۋ) قازاقستان رەسپۋبليكاسىنىڭ ەكسپورتتىق باقىلاۋ تۋرالى زاڭناماسىندا بەلگىلەنگەن تارتىپپەن جۇزەگە اسىرىلادى.
25-باپ. وسى زاڭدى قولدانىسقا ەنگىزۋ ءتارتىبى
وسى زاڭ العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.
قازاقستان رەسپۋبليكاسىنىڭ پرەزيدەنتى
ن.نازارباەۆ.
استانا, اقوردا, 2015 جىلعى 15 ماۋسىم
№ 320-V قرز
سوڭعى جاڭالىقتار
19 ساۋىرگە ارنالعان ۆاليۋتا باعامى
قارجى • بۇگىن, 09:35
سينوپتيكتەر ەسكەرتۋ جاريالادى: بىرقاتار وبلىستا ۇسىك جۇرەدى
اۋا رايى • بۇگىن, 09:19
تۇلعا • كەشە
اۋا رايى • كەشە
يران ورمۇز بۇعازىن قايتا جاپتى
الەم • كەشە
يران اۋە كەڭىستىگىن ءىشىنارا اشتى
الەم • كەشە
ءال-فارابي داڭعىلىندا جول ەرەجەسىن ورەسكەل بۇزعاندار ۇستالدى
ايماقتار • كەشە
جەردە ماگنيتتىك داۋىل باستالدى
وقيعا • كەشە
