سۋرەتتى تۇسىرگەن – يۋري بەككەر
ايرىقشا ماقساتتاعى كۇشتەر قولباسشىسىنىڭ ورىنباسارى پولكوۆنيك باۋىرجان تاڭاتاروۆ اسكەر قاتارىنا قوسىلىپ جاتقان جاس ساربازداردى وتانعا قالتقىسىز قىزمەت ەتۋگە شاقىرىپ, ءاردايىم قىراعى كۇزەتتە بولۋعا ۇندەدى.
قۇرمەتتى جاۋىنگەرلەر, قاستەرلى وتانىمىزعا قالتقىسىز قىزمەت ەتۋ مەن قورعاۋ – ءاربىر ازاماتتىڭ قاسيەتتى بورىشى. بابالارىمىزدىڭ داڭقتى جولىمەن وتانعا قىزمەت ەتۋ ءداستۇرىن جالعاستىرا وتىرىپ, اسكەر كۇزەتىندە قىزمەت ەتە ءجۇرىپ, ەلىمىزدەگى ءاربىر وتباسىنىڭ تىنىشتىعىن قامتاماسىز ەتەسىزدەر. وتانداستارىمىز ەل كۇزەتىندە, قىراعى شەكارا شەبىندە اسكەري دايىندىعى جوعارى, كۇشى مىعىم ساربازداردىڭ تۇرعانىنا سەنىم ارتادى. الداعى ءبىر جىل اسكەري قىزمەتتە نامىس تۋىن بيىكتە جەلبىرەتەسىزدەر دەپ سەنەمىن. اسكەري جول ءاربىر جاۋىنگەردىڭ بويىندا مىقتى ەرىك-جىگەردى شىڭدايدى, توزىمدىلىككە تاربيەلەيدى. وسى ءبىر جىلدا دەنە تاربيەسىمەن قاتار كيەلى اسكەري قىزمەتتىڭ قىر-سىرىنا قانىعىپ, مول ءبىلىم جيناپ, كاسىبي اسكەري مامان دارەجەسىنە جەتەسىزدەر. وسى كەزەڭدە وتباسىلارىڭىزعا سابىر مەن شىدامدىلىق تىلەيمىن», دەدى ب.تاڭاتاروۆ.
ءىىى دارەجەلى «ايبىن» وردەنىنىڭ يەگەرى, اسكەري ءبولىمنىڭ ارداگەرى قايرات باقاەۆ جاس ساربازداردى اسكەري انت قابىلداۋ راسىمىمەن قۇتتىقتاۋعا كەلدى.
«اسكەري دايىندىق پەن ءتارتىپ ءار سارباز ءۇشىن ۇلكەن ەرىك-جىگەردى تالاپ ەتەدى. وتان الدىنداعى بورىشىن وتەۋ, قاشاندا ەل قورعانى بولۋ سەزىمىن ارقالاپ ءجۇرۋ – زور جاۋاپكەرشىلىك. ەل قورعانى جولىندا جاس ساربازدارعا توزىمدىلىك سەرىك بولسىن. وسى ابىرويلى مىندەتتى ادال دا اسقان جاۋاپكەرشىلىكپەن وتەي وتىرىپ, وتانعا, ەل مەن جەرگە دەگەن پاتريوتتىق سەزىمدى, سۇيىسپەنشىلىكتىڭ جارقىن كورىنىسىن كورسەتۋ جاس ساربازداردىڭ كۇشىنە كۇش, رۋحىنا رۋح قوسادى دەپ سەنەمىن», دەدى ول.
مەملەكەتتىك كۇزەت قىزمەت ايرىقشا ماقساتتاعى كۇشتەرىنىڭ «باتىر» پرەزيدەنتتىك پولكى 0111 اسكەري ءبولىمى 3-باسقارما باستىعىنىڭ ورىنباسارى مايور مەرعالي سارىمساقوۆتىڭ ايتۋىنشا, ەلىمىزدىڭ بارلىق وڭىرىنەن ىرىكتەۋدەن ءوتىپ كەلگەن, دەنەشىنىقتىرۋ دايىندىعى وتە جوعارى ساربازدار تاڭدالعان. الداعى جىل ىشىندە 89 سارباز كاسىبي دايارلىقتان ءوتىپ, وزدەرىن ەل كۇزەتىنىڭ العى شەبىندەگى مىقتى جاۋىنگەر ەكەنىن كورسەتەدى. ساربازدار جەدەل اسكەري قىزمەتى بارىسىندا اسكەري تاجىريبەگە بەيىمدەلىپ, اسكەري ماماندىقتاردى مەڭگەرەدى.
انت قابىلداعاننان كەيىن مەملەكەتتىك كۇزەت قىزمەتىنىڭ ايرىقشا ماقساتتاعى كۇشتەرىنىڭ جەكە قۇرامى ءوز مىندەتتەرىن ورىنداۋعا كىرىسەدى. اتاپ ايتقاندا, مەملەكەتتىك تۋ مەن ەلتاڭبا ەتالوندارىن قورعاپ, ەل پرەزيدەنتىنىڭ قاتىسۋىمەن وتەتىن حاتتامالىق ءىس-شارالاردى سۇيەمەلدەپ, ايرىقشا كۇزەتتى تالاپ ەتەتىن تۇلعالار مەن نىسانداردىڭ قاۋىپسىزدىگىن قامتاماسىز ەتەدى. بۇل ەرەكشە قۇرامعا بويىنىڭ ۇزىندىعى 180–195 سم, ءبىلىمى ورتاشادان تومەن ەمەس, دەنە ءبىتىمى مىعىم, 18–27 جاسقا دەيىنگى ەل ازاماتتارى ىرىكتەلەدى. جوعارى ءبىلىمدى, سپورتتىق جەتىستىكتەرى مەن رازريادتارى بار اسكەرگە شاقىرىلۋشىلارعا باسىمدىق بەرىلەدى.
اسكەري انت قابىلداۋ بارىسىندا تۇركىستان وبلىسىنان كەلگەن قاتارداعى جاۋىنگەر المات اقجىگىت, الماتى وبلىسى رايىمبەك اۋدانىنان كەلگەن جانىبەك جامبىل «باتىر» پولكى قاتارىندا اسكەري بورىشىن وتەۋدى مەكتەپتە جۇرگەندە ماقسات ەتكەنىن ايتتى. وسى سەبەپتى دە پولك قۇرامىنا كىرۋ ءۇشىن ارنايى دايىندىق جاساپ, سالادا ۇزدىك بولۋدى ماقسات ەتىپ كەلگەن. ەرەكشە دايارلىقتان وتكەن تاجىريبەلى ساربازداردى الداعى ۋاقىتتا كاسىبي اسكەري قىزمەت كۇتىپ تۇر. مەملەكەتتىك قىزمەت كۇزەتىنىڭ ايرىقشا ءبولىمى قاتارىندا اسكەري قىزمەتىن وتەۋ – باتىلدىقتىڭ مەكتەبىنەن وتۋگە, ەر-ازاماتتىڭ ومىرلىك جولىندا باعا جەتپەس جەتىستىك سانالادى. جاس ساربازدار اسكەري قىزمەتتىڭ قىر-سىرىن, داعدىلارىن يگەرىپ, الەۋمەتتىك, مانساپتىق كەزەڭنىڭ ساتىسىنان وتۋگە مۇمكىندىك الادى. اسكەري تاجىريبەنىڭ وسى كەزەڭىنەن وتكەن ساربازدار ەل قورعانى عانا ەمەس, قىراعى كۇزەتتە كاسىپقوي اسكەري مامان رەتىندە بولاشاق مامانداردى دايارلاۋعا ىقپال ەتەدى. ولار جاڭا تەحنولوگيالارعا نەگىزدەلگەن اسكەري تەحنيكا, تسيفرلىق جۇيەمەن باسقارىلاتىن قارۋلى كۇش قۇرىلىمدارى جۇيەسىندەگى شەشىمدەردى ۇيرەنىپ, بولاشاقتىڭ مىقتى اسكەريلەرى ساپىندا تۇرادى.
اسكەري انت قابىلداۋ بارىسىندا وفيتسەرلىك قۇرام اتا-انالاردى اسكەري رەجىم تالاپتارىمەن تانىستىرىپ, جاس ساربازداردىڭ قاۋىپسىزدىگىن ساقتاۋ, وتباسىمەن كەزدەسۋ تارتىبىمەن تانىستىردى. اسكەري انت قابىلداعان ساربازدار ءبىر تاۋلىككە دەمالىسقا كەتتى.
الماتى
