فوتو: اشىق دەرەككوز
ايماعامبەتوۆتىڭ پىكىرىنشە, بۇگىنگى تاڭدا بالالاردىڭ تەلەديداردان گورى ينتەرنەت پەن YouTube-تى كوبىرەك تاڭدايتىنى ۇلكەن ماسەلە بولىپ وتىر. سونداي-اق, ول بالالاردىڭ «سيني تراكتور» مەن «ماشا ي مەدۆەد» سياقتى مۋلتفيلمدەرمەن شەكتەلمەي, ساپالى ءارى قىزىقتى قازاقشا مۋلتفيلمدەردى كورۋى ءتيىس ەكەنىن اتاپ ءوتتى.
«وسى ماقساتتا, كەلەسى جىلدىڭ بيۋدجەت جوباسىن قاراستىرۋ بارىسىندا, قازاق تىلىندەگى مۋلتفيلمدەر جاساۋعا 350 ميلليون تەڭگە بولەتىن جانە ولاردىڭ تەك تەلەديدارعا ەمەس, مىندەتتى تۇردە ينتەرنەتكە, سونىڭ ىشىندە YouTube-قا جۇكتەلۋىن قامتاماسىز ەتەتىن نورمانى زاڭعا ەنگىزدىك. بۇل بالالاردىڭ قازاق تىلىندە قىزىقتى كونتەنتكە قول جەتكىزۋ مۇمكىندىگىن كەڭەيتەدى دەپ سەنەمىز», دەپ جازدى اسحات ايماعامبەتوۆ Telegram پاراشاسىندا.
سونداي-اق, ايماعامبەتوۆ الەمدىك حيت مۋلتفيلمدەردى دە مەملەكەتتىك تىلگە اۋدارىپ, YouTube-قا جۇكتەۋدىڭ ماڭىزدى ەكەنىن تىلگە تيەك ەتتى. بىراق بۇل ءۇشىن اۆتورلىق قۇقىق يەلەرىمەن اۋقىمدى جۇمىس قاجەت. ازىرگە بۇل ماسەلە تولىق شەشىلگەن جوق, بىراق الداعى ۋاقىتتا وسى باعىتتا جۇمىستى جالعاستىرۋدى جوسپارلاپ وتىرعاندىعىن اتاپ ءوتتى.
