فوتو قر كولىك مينيسترلىگى
كولىك ءمينيسترى مارات قاراباەۆ شىعىس قازاقستان وبلىسىنا جۇمىس ساپارى بارىسىندا ەلىمىزدىڭ شىعىسىندا جاڭا اۋەجايلار ورنالاساتىن الاڭدارمەن تانىستى.
كاتونقاراعاي اۋدانىندا جاڭا اۋەجاي سولداتوۆو اۋىلىنىڭ قاسىندا سالىنادى. بۇل اۋىل كاتونقاراعاي جانە ۇلكەن نارىن اۋىلدارىنىڭ اراسىندا ورنالاسقان. كاتونقاراعاي اۋىلىنا دەيىنگى قاشىقتىق 38 شاقىرىمدى قۇرايدى.
ال زايساندا اۋەجاي ساتباەۆ اتىنداعى بۇرىنعى اسكەري اۋەايلاقتىڭ اۋماعىندا ورنالاسادى. بۇل جەردەن زايسان قالاسىنا دەيىنگى قاشىقتىق 25 شاقىرىمدى قۇرايدى.
باستاپقى كەزەڭدە اۋەجايلاردا Q400, ATR 42/72, CRJ200 اۋە كەمەلەرى ءۇشىن ۇزىندىعى 2200 مەتر جاساندى ۇشۋ-قونۋ جولاعى سالىنادى. اۋە كەمەلەرىنىڭ بۇل تۇرلەرى استانا مەن الماتىدان وبلىستىڭ تۋريستىك ورىندارىنا دەيىن اۋە قاتىناسىن قامتاماسىز ەتۋگە مۇمكىندىك بەرەدى.
كەيىن بۇل جولاقتى كەڭەيتۋ جۇمىستارى جۇرگىزىلىپ, سىيىمدىلىعى كوبىرەك ۇلكەن ۇشاقتاردى (Airbus ا320, Boeing 737) قابىلداۋعا دا مۇمكىندىك بولادى.
«مەملەكەت باسشىسىنىڭ تاپسىرماسىن ۋاقتىلى ورىنداۋ ءۇشىن ەل وڭىرلەرىنە جۇمىس ساپارىمەن شىعىپ, نىساندار سالىناتىن ۋچاسكەلەرمەن تانىسۋدامىز. الداعى ۋاقىتتا قولعا الىناتىن جۇمىستاردى پىسىقتادىق. ءۇش اۋەجايدىڭ دا قۇرىلىسى كەلەسى 2025 جىلى باستالادى», دەپ اتاپ ءوتتى مينيستر.
مينيستر جەرگىلىكتى اتقارۋشى ورگاننىڭ وكىلدەرىمەن, قۇرىلىس جانە اۆياتسيا سالاسىنىڭ ساراپشىلارىمەن كەزدەسۋ وتكىزدى, وندا اۋەجايلار سالۋ جوسپارى تالقىلاندى.
