استانا. 14 ماۋسىم. وتكەن تۇندە گرۋزيا استاناسى – تبيليسي قالاسىندا جويقىن سۋ تاسقىنى بولدى. اپاتتىڭ سالدارىن جويۋ جۇمىستارىنا اتى اڭىزعا اينالعان فۋتبولشى, بۇگىندە گرۋزيانىڭ ۆيتسە-پرەمەرى, سونداي-اق, ەنەرگەتيكا جانە تابيعي رەسۋرستار ءمينيسترى كاحا كالادزە دە بەلسەنە قاتىسۋدا. بۇل تۋرالى tribuna.com حابارلادى.
ەلدىڭ قارجى مينيسترلىگى حابارلاعانداي, توتەنشە جاعداي سالدارىنان 18 ميلليون دوللار شىعىن كەلگەن. ەڭ وكىنىشتىسى, نوسەر جاۋىننان كەيىن ورىن العان اپاتتان 12 ادام قازا تاپتى. قايعىلى جاعدايعا بايلانىستى گرۋزيا بيلىگى 15 ماۋسىمدى قارالى كۇن دەپ جاريالادى.
كاحا كالادزە كيەۆتىڭ «ديناموسى» (1998-2000 جج.) مەن «ميلان» (يتاليا, 2001-2010 جج.) فۋتبول كوماندالارىندا جاسىنداي جارقىلداعان داڭقتى فۋتبولشى. 2012 جىلى ۇلكەن سپورتپەن قوشتاسقان ول ساياساتقا ارالاسىپ, ەل بيلىگىنىڭ ءبىر تۇتقاسىن ۇستادى. سودان بەرى وتانىنا قالتقىسىز قىزمەت ەتىپ كەلەدى.
ەلامان قوڭىر.
دەرەك, سۋرەت: tribuna.com.
