جۇمىسسىز جاستار ازايدى

ءاربىر كوميۋنيتي ورتالىقتا قو­عامدىق كەڭىستىك, پسيحولوگيالىق, زاڭ كو­­مەگى, جۇمىسقا ورنالاستىرۋ, كا­سىپ­­تىك باعدار بەرۋ, كاسىپكەرلىك ما­سە­­­­لەلەر بويىنشا كەڭەس بەرۋ, سون­داي­-اق جاستار يدەياسىن جەدەلدەتۋگە­ ار­­­­نالعان كوۆوركينگ ايماق بار. مۇن­­­داي­­ ورتالىقتاردا جىل باسىنان بە­رى­ 750-دەن استام ءىس-شارا وتكىزىلىپ, 30 مىڭ­­­نان استام جاس قاتىسقان. «وناي» كار­­تاسى نەگىزىندە كوميۋ­نيتي ورتا­لىق­­­­­تار­دىڭ رەزيدەنتتەرى ءۇشىن كلۋب­­تىق كار­توچكالىق جۇيە ەنگىزىلگەن. قوعام­دىق كولىكتە پايدالانۋمەن قاتار كارتادا تاماقتانۋ, سپورتتىق جانە مادەني ينفراقۇرىلىمداردا, شەبەرلىك دارىستەرىنە جانە باسقا دا الەۋمەتتىك ءىس-شارالارعا قاتىسۋ بارىسىندا ديسكونت جەڭىلدىگى قاراستىرىلعان.

جاقىندا قالا باسشىسى ەربولات دوساەۆ جەتىسۋ اۋدانىندا ورنالاسقان وسىنداي ورتالىقتىڭ جۇمىسىمەن تانىسىپ, ءار اۋداندا اشىلىپ جاتقان كوميۋنيتي ورتالىقتار جۇمىسىنىڭ وڭ ناتيجە بەرىپ جاتقانىن اتاپ ءوتتى. ناتيجەسىندە, وسى جىلدىڭ ءبىرىنشى توقسانىندا 9 مىڭنان استام ازامات جۇمىسقا ورنالاسىپ, وسى كەزەڭدە جاستار اراسىنداعى جۇمىسسىزدىق دەڭگەيى 5,2-دەن 4,6 پايىزعا تومەندەگەن.

جالپى اۋدانى 645 شارشى مەتر جاڭا عيما­را­ت­تى سالۋدا ينكليۋزيۆتى قادامدار ەسكەرىلىپتى. زاماناۋي كرەا­تيۆتى قوعامدىق كەڭىستىكتە جاستار مەملەكەتتىك باعدارلامالار بويىنشا كەڭەس الىپ, پسيحولوگيالىق جانە زاڭگەرلىك كومەككە, جاڭا ماماندىق الۋ بويىنشا قىسقامەرزىمدى كۋرس­تاردان وتۋگە مۇمكىندىك الىپ, مادەني جانە سپورت الاڭدارىندا بوس ۋاقىتىن ءتيىمدى وتكىزەتىن بولادى.

بۇگىندە الماتىدا تۇرىپ جاتقان 14-35 جاس ارا­لى­عىنداعى جاستاردىڭ سانى 680 مىڭعا جۋىقتايدى. ولاردىڭ 60 مىڭعا جۋىعى جەتىسۋ اۋدانىندا تۇرادى دەسەك, جۇمىسسىز جاستاردىڭ ۇلەسى 6 پايىز.­ كوميۋنيتي ورتالىعى ماماندارىنىڭ ايتۋى­نشا, جاستاردى الەۋمەتتەندىرۋ جۇمىستارى قانشا­لىقتى تارتىمدى بولعان سايىن, ولاردىڭ قوعامدىق ومىرگە بەلسەنە ارالاسۋى دا سوعۇرلىم ناتيجەلى بولاتىنى انىق. قالادا جاستارعا ارنالعان 30-دان استام دەمالىس ورتالىعى دا جاڭارتىلعان.

الماتى