فوتو: سەنات
اۋىل شارۋاشىلىعى ءمينيسترىنىڭ ورىنباسارى ازات سۇلتانوۆ كوكتەمگى ەگىس جۇمىستارىن جۇرگىزۋ جونىندەگى شارالار ەرەكشە باقىلاۋدا ەكەنى تۋرالى دەپۋتاتتارعا ايتىپ بەردى. وبلىس اكىمدىكتەرىنىڭ دەرەكتەرى بويىنشا بيىلعى جىلعى جالپى ەگىس القابى 23,8 ملن گەكتاردى قۇرايدى. مەملەكەت باسشىسىنىڭ اۋىل شارۋاشىلىعى داقىلدارىن ءارتاراپتاندىرۋ جونىندەگى تاپسىرماسىنا سايكەس, بيدايدىڭ ەگىس القابى وتكەن جىلمەن سالىستىرعاندا 426 مىڭ گەكتارعا قىسقارىپ, 13,3 ملن گەكتاردى قۇرادى. سونىمەن قاتار مايلى داقىلدار القابىن 373 مىڭ گەكتارعا جانە جەمشوپ داقىلدارىن 66 مىڭ گەكتارعا ۇلعايتۋ جوسپارلانىپ وتىر.
ساۋدا جانە ينتەگراتسيا ءمينيسترىنىڭ ورىنباسارى قايرات بالىقباەۆ ءوز كەزەگىندە پارلامەنتشىلەرگە اگروونەركاسىپ كەشەنى ءونىمىنىڭ تاۋار اينالىمى سالاسىنداعى 2023 جىلعى جاعداي تۋرالى باياندادى. ونىڭ ايتۋىنشا, 2023 جىلى قازاقستانعا اوك ءونىمىنىڭ يمپورتى 0,9%-عا تومەندەپ, 5,9 ملرد اقش دوللارىن قۇرادى. ەكسپورت 4,3%-عا تومەندەپ, 5,4 ملرد بولدى.
قاتىسۋشىلار شارا بارىسىندا وسى سەكتورداعى جاعدايدى جاقسارتۋ بويىنشا پىكىر الماستى جانە الداعى ءىس-قيمىلدار ءۇشىن باسىم باعىتتاردى بەلگىلەدى. اتاپ ايتقاندا, ءوندىرىستىڭ تيىمدىلىگىن ارتتىرۋ جانە اۋىل شارۋاشىلىعى ونىمدەرىنىڭ ەكسپورتىن ىنتالاندىرۋ شارالارى ايقىندالدى.
