فوتو: Sputnik / يوسيف بۋدنەۆيچ
«بۇگىن سىزدەرمەن عىلىم ورداسىندا جينالىپ وتىرمىز. قۋانىشتىمىن. بۇل – قازاق عىلىمىنىڭ قارا شاڭىراعى. وزدەرىڭىز جاقسى بىلەسىزدەر, سوڭعى كەزدەرى بۇل عيمارات ابدەن توزىپ كەتتى. سوندىقتان مەن وسىدان ەكى جىل بۇرىن بۇل جەردە كۇردەلى جوندەۋ جۇرگىزۋ جونىندە ناقتى تاپسىرما بەردىم. سودان بەرى ءبىراز شارۋا اتقارىلدى. ءىشى دە, سىرتى دا زامان تالابىنا ساي جاڭعىرتىلدى. ەڭ باستىسى, عيماراتتىڭ تاريحي كەلبەتى ساقتالدى. جىل سوڭىنا دەيىن بۇل جۇمىس تولىق اياقتالادى, اباتتاندىرۋ جۇمىسى جۇرگىزىلەدى. جاڭارعان عىلىم ورداسى بۇگىنگى جانە بولاشاق عالىمدار ءۇشىن قىزمەت ەتە بەرەدى», دەدى ەل پرەزيدەنتى.
سونىمەن قاتار پرەزيەنت بۇل جەردە حالقىمىزدىڭ كوپتەگەن كورنەكتى عالىمدارى ەڭبەك ەتكەنىن اتاپ ءوتتى.
«عىلىم ورداسىندا ەسىمى ەل تاريحىنا جازىلعان ءبىرتۋار تۇلعالارىمىزدىڭ ءىزى قالعان. سونداي ۇلت پەرزەنتتەرىنىڭ ءبىرى ءارى بىرەگەيى – اكادەميك قانىش ساتباەۆ. بيىل عالىمنىڭ تۋعانىنا 125 جىل تولدى. اكادەميك قانىش ساتباەۆ ەلىمىزدى وركەندەتۋگە وراسان زور ۇلەس قوستى. «عالىمنىڭ حاتى ولمەيدى» دەگەن. حالقىمىز ءالى كۇنگە دەيىن ونىڭ اشقان جاڭالىقتارىنىڭ يگىلىگىن كورىپ وتىر. قازىر – عىلىم مەن ءبىلىمنىڭ زامانى. وتانىمىزدى كوركەيتەمىز دەسەك, ەڭ الدىمەن, وسى ەكى سالانى دامىتۋىمىز كەرەك. بۇدان باسقا جول جوق», دەدى مەملەكەت باسشىسى.
