كۇشىمىز – بىرلىكتە! جەتىسۋدىڭ جاردەمى

وسىنداي كۇردەلى كەزەڭدە ءۇي-كۇيسىز قالعان حالىققا كومەكتەسپەۋ – ەلدىگىمىزگە سىن. سوندىقتان وبلىس تۇرعىندارى زارداپ شەككەن وڭىرلەردىڭ حالقىنا جان-جاقتى كومەك كورسەتۋگە كىرىستى. كەشە جەتىسۋدان باتىس قازاقستان وبلىسىنا الەۋمەتتىك-گۋمانيتارلىق كومەك جىبەرىلدى. ءۇش جۇك كولىگىنە تيەلگەن 85 توننا ۇن, ماكارون, قانت جانە كۇندەلىكتى قاجەتتى زاتتار, توسەك-ورىن الىستاعى اعايىنعا جولداندى.

وبلىستىڭ مەملەكەتتىك قىزمەتكەرلەرى ءبىر كۇندىك جالاقىلارىن اۋدارسا, كاسىپكەرلەر دە اتىمتاي جومارتتىق تانىتىپ جاتىر. وبلىستىق قوعامدىق دامۋ باسقارماسىنىڭ باسشىسى باۋىرجان ابيبەكوۆ: «باتىس قازاقستان وبلىسىنا كاسىپكەرلەر 150 ملن تەڭگەگە جۋىق قارجىلاي كومەك جىبەردى. كەربۇلاق تسەمەنت زاۋىتى مىڭ توننا تسەمەنت جىبەرەتىنىن ايتتى. «مەيىرىمدى جەتىسۋ» ۆولونتەرلىك فرونت ءوفيسى مەن Amanat پارتياسىنىڭ جەتىسۋ وبلىستىق فيليالى 10 اۋداندا كومەك-پۋنكتتىڭ اشىلۋىنا ۇيىتقى بولىپ, ازىق-ت ۇلىك, كيىم-كەشەك جونەلتتى. جالپى, جەتىسۋ جۇرتشىلىعى تاسقىننان زارداپ شەككەن وبلىستارعا 200 ملن تەڭگەگە جۋىق قارجى اۋداردى», دەدى.

ەلىمىزدە بولىپ جاتقان سۋ تاسقىنىنان زارداپ شەككەن وبلىستارعا رەسپۋبليكا بويىنشا تۇرعىندار مەن كاسىپكەرلەر جان-جاقتى قولداۋ كورسەتىپ, قولۇشىن سوزىپ جاتىر. وسىعان وراي پانفيلوۆ اۋدانىنىڭ تۇرعىندارى مەن كاسىپكەرلەرى بىرلەسە جيناعان 25 تونناعا جۋىق الەۋمەتتىك ماڭىزى بار ازىق-ت ۇلىك پەن تۇرمىستىق زاتتار, ءدارى-دارمەك, ەلەكتر قۋاتىن بەرەتىن گەنەراتور سىندى اسا قاجەتتى قۇرال جابدىقتاردى جونەلتتى.

«وسى باستامامىزدى قولداپ, گۋمانيتارلىق كومەككە اتسالىسقان كاسىپكەرلەر مەن تۇرعىندارعا زور العىسىمدى بىلدىرەمىن. جازيرالى جاركەنت ءوڭىرىنىڭ تۇرعىندارى مەن كاسىپكەرلەرى ەلىمىزدەگى بارلىق جاعدايعا بەي-جاي قارامايتىنىن كورسەتىپ, بەرەكە-ىنتىماعىنىڭ ارقا­سىندا قولداۋ كورسەتتى», دەيدى اۋدان باسشىسى مارات ساعىمبەك.

بۇل قاتاردان كوكسۋلىق اقجۇرەك ازاماتتار دا تابىلدى. ولار جالپى كولەمى 5 162 600 تەڭگەنى قۇرايتىن 5 توننا قانت, 5 توننا كارتوپ, 6 توننا ازىق-ت ۇلىك سەبەتتەرىن جيناعان. سونىمەن قاتار 560 مىڭ تەڭگە قارجىلاي كومەك تە بەرگەن.

جەتىسۋ وبلىسى