تۇركىستان وبلىسىندا ءجاسوسپىرىمدى اۋىلداستارى اياۋسىز سوققىعا جىققان

Tengrinews.kz وقيعا ءۇش كۇن بۇرىن بولعانىن جازدى. توبەلەسكەندەر 7-9 سىنىپ وقۋشىلارى بولىپ شىقتى. بەينەجازبادا ءبىر ءجاسوسپىرىمنىڭ كەلەسى بالانى اياۋسىز ۇرىپ, تەپكىلەگەنى تۇسىرىلگەن. ال ءۇشىنشى بالا جاعدايدى بايانداعان. 

بەينەجازبا قۇزىرلى ورگاننىڭ نازارىنا ىلىككەن.

تۇركىستان وبلىستىق پوليتسيا دەپارتامەنتى بەينەجازباداعى جاسوسپىرىمدەردىڭ جەكە باسى انىقتالىپ, پوليتسيا بولىمشەسىنە جەتكىزىلگەنىن حابارلادى. سونداي-اق قاجەتتى ساراپتامالار تاعايىندالىپ, جانجالدىڭ سەبەپتەرى انىقتالىپ جاتىر. «بۇزاقىلىق» بابى بويىنشا قىلمىستىق ءىس قوزعالىپ, تەرگەۋ باستالدى.

«جابىرلەنۋشى بالا اناسىمەن بىرگە تۇرادى. اتا-اناسى اجىراسقان. كۇدىكتىلەر سول اۋىلدىڭ تۇرعىندارى, 7-9-سىنىپ وقيدى. جانجالعا قاتىسۋشىلاردىڭ اتا-انالارى بالا تاربيەلەۋدەگى مىندەتتەرىن ورىنداماعانى ءۇشىن جاۋاپقا تارتىلادى. اۋدان اكىمدىگى جانىنداعى ارنايى كوميسسيا وتىرىسىندا ءبىلىم بەرۋ مەكەمەلەرىنىڭ باسشىلارى مەن مۇعالىمدەردىڭ جاۋاپكەرشىلىگى قارالادى. ءىس وبلىستىق ىشكى ىستەر دەپارتامەنتى باستىعىنىڭ باقىلاۋىندا», دەلىنگەن تۇركىستان وبلىستىق پوليتسيا دەپارتامەنتىنىڭ ءباسپاسوز قىزمەتى تاراتقان حابارلامادا.