ءماجىلىس دەپۋتاتتارى اينا ءمۇسىرالىموۆا, يۋليا كۋچينسكايا اقمولا وبلىسىنداعى قوياندى كەنتى مەن كوكشەتاۋ قالاسىندا بولىپ, سۋ تاسقىنى جاعدايىمەن تانىستى, جەدەل شتابتاردى ارالاپ, ءوڭىر تۇرعىندارىمەن كەزدەستى.
«ارينە, قازىر باستى مىندەت – ادامداردىڭ قاۋىپسىزدىگىن قامتاماسىز ەتۋ. ازاماتتاردىڭ ماتەريالدىق شىعىنىن مۇمكىندىگىنشە ازايتۋ. ول ءۇشىن توتەنشە جاعداي, قورعانىس, ىشكى ىستەر مينيسترلىكتەرى مەن اكىمدىكتەردىڭ كۇشتەرى جۇمىلدىرىلىپ, ەلدى مەكەندەردىڭ تۇرعىندارىنان قۇرالعان ەرىكتىلەر جۇمىس ىستەپ جاتىر. جەدەل شتابتار, اقپارات الماسۋ ءۇشىن جانە قاجەتتىلىكتەر تۋرالى وتىنىشتەر جىبەرۋ ءۇشىن ارنايى چاتتار قۇرىلدى», دەدى يۋليا كۋچينسكايا.
جۇما كۇنى ءماجىلىس دەپۋتاتتارى ماقسات تولىقباي, قازىبەك الىشەۆ پەن اسقار سادىقوۆ اقتوبە وبلىسىنا باردى. ولار قوبدا اۋدانىنىڭ تۇرعىندارىمەن كەزدەستى. ماقسات تولىقباي اۋىلدى سۋ باسۋ جىل سايىن قايتالاناتىنىن اتاپ ءوتتى.
«وتكەن جىلى دا اۋىلدى سۋ باسقان. ول كەزدە ءبىز وسىندا كەلگەن ەدىك, مەملەكەتتىڭ كومەگىمەن زارداپ شەككەندەرگە ارنالعان بىرنەشە ءۇيدى قالپىنا كەلتىردىك. بىراق ءتيىستى قورىتىندى جاسالعان جوق. بيىل سول ۇيلەردىڭ شاتىرى عانا كورىنەدى. بارلىعى سۋ استىندا قالدى», دەدى ماقسات تولىقباي.
سونىمەن قاتار دەپۋتاتتار اقتوبە قالاسىنداعى جاعدايىمەن دە تانىستى.
سەنبى كۇنى ءماجىلىس دەپۋتاتتارى امانجول ءالتاي مەن ەربولات ساتىبالدين ۇلىتاۋ وبلىسىنىڭ جەزدى اۋىلىنا باردى. ماجىلىسمەندەر سۋ تاسقىنىنان زارداپ شەككەن تۇرعىندارمەن كەزدەسىپ, جەرگىلىكتى جەردەگى احۋالمەن تانىستى, سونداي-اق زارداپ شەككەن ۇيلەردى ارالادى. ۇيلەردىڭ كوبى قالپىنا كەلتىرۋگە كەلمەيدى.
«سۋ استىنا كەتكەن ۇيلەر مەن اۋلالاردى ارالادىق. زالالدىڭ ورنىن تولتىرۋ جانە سالدارىن جويۋ ءۇشىن قاجەتتى قاراجات بولىنەدى. جارامسىز بولىپ قالعانداردىڭ ورنىنا جاڭا ۇيلەر سالۋ ماسەلەسىن قاراستىرامىز», دەدى امانجول ءالتاي.
سەنبى كۇنى ءماجىلىس دەپۋتاتتارى نارتاي سارسەنعاليەۆ پەن سەرگەي پونومارەۆ باتىس قازاقستان وبلىسىندا بولىپ, سۋ تاسقىنىنان زارداپ شەككەن تەرەكتى اۋدانى اڭقاتى اۋىلىنىڭ تۇرعىندارىمەن كەزدەستى.
ء«بىز اۋداندىق اكىمدىكپەن بىرلەسىپ جۇمىس ىستەيمىز. كوميسسيا مۇشەلەرى ۇيلەردىڭ ءبارىن سۋ باسقاننان كەيىن ەمەس, قازىرگى جاعدايىن باعالايدى. احۋال تولىعىمەن تۇراقتانعانشا ءبىز اۋىل تۇرعىندارىنىڭ قاسىندا بولىپ, جاعدايدى باقىلاۋدا ۇستايمىز», دەدى نارتاي سارسەنعاليەۆ.
ءماجىلىس دەپۋتاتى ەركىن ءابىل ارقالىق قالاسىنىڭ تۇرعىندارىمەن كەزدەستى. ماجىلىسمەن سۋ تاسقىنىنىڭ سالدارىن جويۋ جۇمىستارى ءالى دە جالعاسىپ جاتقانىن اتاپ ءوتتى.
«جاعداي مەملەكەت باقىلاۋىندا, قازىر احۋال تۇراقتاندى, بىراق ۇيلەر سۋ استىندا قالدى. سالدارىن جويۋ بويىنشا جۇمىس جالعاسۋدا. بارلىق زالال وتەلەتىن بولادى», دەدى دەپۋتات.
سونداي-اق ەركىن ءابىل قوستاناي وبلىسىنىڭ امانگەلدى جانە جانگەلدين اۋداندارىندا بولىپ, جەرگىلىكتى تۇرعىندارمەن كەزدەسىپ, زارداپ شەككەن ۇيلەردى ارالادى. ودان ءارى دەپۋتاتتار وبلىس ورتالىقتارىنا بارۋدى جوسپارلاپ وتىر.
