قاڭتاردىڭ سوڭعى كۇنى «باتىس قىتاي – باتىس ەۋروپا» اۆتوجولىنىڭ 567-شاقىرىمىندا بولعان جول-كولىك وقيعاسى جۇرتتى الاڭداتىپ قويدى. مالىمەتكە سەنسەك, بوراندى كۇنى 26 كولىك سوقتىعىسقان. ونىڭ تورتەۋى جولاۋشىلار اۆتوبۋسى بولسا, قالعانى – جۇك كولىگى جانە جەڭىل اۆتوكولىكتەر. نۇرلىكەنت اۋىلىنىڭ ماڭىندا بولعان اپات سالدارىنان 31 قاڭتار كۇنى 26 ادام جۋالى اۋداندىق ورتالىق اۋرۋحاناسىنا جەتكىزىلگەن. ولاردىڭ اراسىندا نارەستە دە بار.
مامانداردىڭ ايتۋىنشا, ءتۇرلى دارەجەدە جاراقات العانداردىڭ ىشىندە ءتورت ازاماتتىڭ جاعدايى اۋىر. ولار مامانداردىڭ جەدەل ىسكە كىرىسۋىمەن جانساقتاۋ بولىمىنە جاتقىزىلعان. ال ءبىر ازامات ساناۆياتسيا ارقىلى وبلىس ورتالىعىنا جەتكىزىلگەن.
«بالانىڭ جاعدايى ورتاشا, ال ءتورت ادام جانساقتاۋ بولىمىنە ورنالاستىرىلدى. ون بەس ازامات اياق-قولى, كەۋدەسىنەن جاراقات العان. ولاردىڭ دا جاعدايى ورتاشا. جول-كولىك وقيعاسى سالدارىنان جاراقات العان ازاماتتارعا ءتيىستى مەديتسينالىق كومەك دەر كەزىندە كورسەتىلدى», دەيدى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى تولقىن ومىرباەۆا.
بەت قاراتپايتىن بوران كەزىندە اپاتقا ۇشىراعان اۆتوبۋستا ەلۋگە جۋىق جولاۋشى بولعان. ولار جەرگىلىكتى اتقارۋشى بيلىكتىڭ جاۋاپتى مامانداردى شۇعىل جۇمىلدىرۋىنىڭ ارقاسىندا جاقىن ماڭداعى جىلىتۋ پۋنكتىنە ورنالاستىرىلعان.
ال وبلىستىق توتەنشە جاعدايلار دەپارتامەنتى باسشىسىنىڭ ورىنباسارى رۋسلان ورىنبەكوۆتىڭ ايتۋىنشا, تجد ازاماتتىق قورعاۋ قىزمەتىن جەدەل جۇمىلدىرعان. اۋا رايىنىڭ الداعى كۇندەرى مىڭ قۇبىلۋى مۇمكىن ەكەنىن ەسكە سالعان ول ازاماتتاردىڭ الىس جولعا شىقپاعانىن ماقۇل كورىپ وتىر.
«بالالارىمىزبەن كەلە جاتقان ەدىك. مىنا جول اپاتى ەسىمىزدى شىعاردى. كەلىنىمىز باسىن ۇرىپ الدى, قالعانىمىز نە بولعانىن تۇسىنبەي داعدارىپ قالدىق. «جول ازابىن جۇرگەن بىلەر» دەگەن وسى شىعار. باستىسى, دىتتەگەن جەرىمىزگە ءدىن امان جەتسەك بولعانى. بۇل دا ءبىر بىزگە بەرىلگەن سىناق شىعار», دەيدى شىمكەنتتىك ازاماتشا اينۇر وسپانوۆا.
وبلىستىق پوليتسيا دەپارتامەنتىنىڭ قىزمەتكەرلەرى جول قوزعالىسى ەرەجەلەرىن ساقتاۋ, قولايسىز اۋا رايىندا جولعا شىقپاۋ تۋرالى بىرنەشە مارتە ەسكەرتۋ جولداعاندارىنا قاراماستان, جۇرگىزۋشىلەر ەرەجەنى بۇزۋدى توقتاتار ەمەس. جىلدامدىقتى اسىرىپ, قاشىقتىقتى ساقتامايتىن, جازعى دوڭعالاقتارمەن جۇرەتىن اۆتوكولىك يەلەرى ءالى كۇنگە دەيىن ازايار ەمەس.
نۇرلىكەنت اۋىلىنداعى جول-كولىك وقيعاسىنا كىم كىنالى؟ بۇل ماسەلەنى ءتيىستى ورگاندار زەردەلەيتىنى انىق. الداعى كۇندەرى قورىتىندىسى بەلگىلى بولادى. جول-كولىك وقيعاسىنا ايىپتى بىرنەشە ادام بولۋى دا مۇمكىن. ويتكەنى ءبىر ەمەس, 26 اۆتوكولىك اپاتقا ۇشىراپ وتىر. قالاي بولعان كۇندە دە ماسەلەنىڭ ءمان-جايىن قۇقىق قورعاۋ ورگاندارى انىقتايدى.
قىستىڭ كوزى قىراۋدا اۆتوكولىك جۇرگىزۋشىلەرى ساۋىسقانداي ساق بولعانى ءجون. جۇرت اراسىندا «بوراندى بەكەت» اتانىپ كەتكەن جۋالى اۋدانىنىڭ اۋماعىمەن جۇرمەس بۇرىن اۆتوكولىك يەلەرى جولدىڭ جاعدايى مەن اۋا رايى تۋرالى مالىمەتتى ءبىلىپ وتىرسا قۇبا-قۇپ. ەڭ دۇرىسى, قاراپايىم حابارلاماعا قۇلاق اسقان ءجون.
جامبىل وبلىسى,
جۋالى اۋدانى
