كتك تەلەارناسىنىڭ جازۋىنشا, جارنا بەس ەسەلەپ وسەدى دەگەن اقپاراتتى قورداعىلار جوققا شىعارىپ وتىر. قوردىڭ مالىمەتىنشە, تولەمنىڭ شەكتى مولشەرى 10 ەڭ تومەنگى جالاقىدان 50-گە كوتەرىلگەن.
- جارنا تولەۋ بەس ەسەگە ارتادى دەگەن جوق, ولاي ەمەس. ءمامس-ءتىڭ جارناسى وزگەرگەن جوق. قازىرگى قولدانىستاعى زاڭدا ءمامس-ءتىڭ جارناسىن تولەۋ ءۇشىن جوعارعى دەڭگەي 10 ەڭ تومەنگى جالاقىنى قۇرايدى. ول دەگەن بيىل 850 مىڭ. سول دەڭگەي بەس ەسەگە كوبەيتىلەدى. ياعني 4 ميلليون 250 مىڭ تەڭگەگە كوتەرىلەدى, – دەدى مىندەتتى الەۋمەتتىك مەديتسينالىق ساقتاندىرۋدى ۇيلەستىرۋ دەپارتامەنتىنىڭ ديرەكتورى ايان مۇحامەتقاليەۆا.
ەلىمىزدە 850 مىڭ تەڭگەدەن كوپ جالاقى الاتىندار سانى 500 مىڭنان ءسال اسادى ەكەن. ياعني اتالمىش وزگەرىس حالىقتىڭ تەك 9 پايىزىنا عانا قاتىستى. قالعانى سول باياعىداي تابىسىنىڭ ەكى پايىزىن تولەي بەرمەك.
مىسالى, 850 مىڭ تەڭگە جالاقى الاتىن ءبىرىنشى قىزمەتكەر ايىنا مەديتسينالىق ساقتاندىرۋعا تابىسىنىڭ 2 پايىزىن, ياعني 17 مىڭ تەڭگە تولەيدى. ال ايىنا 3 ميلليون تەڭگە جالاقى الاتىن ەكىنشى قىزمەتكەر دە 17 مىڭ تەڭگە تولەيدى. ويتكەنى ەڭ جوعارعى سوما وسىنداي. ەندى كەلەسى جىلدان باستاپ وزگەرىسكە ساي, ايىنا 3 ميلليون تەڭگە تاباتىن قىزمەتكەر تابىسىنىڭ 2 پايىزىن, ياعني 60 مىڭ تەڭگە تولەيتىن بولادى. مىسالى, 4 ميلليون تەڭگە تاپساڭىز, 80 مىڭ تەڭگە تولەيسىز.
قورداعىلار مۇنى ادىلەتتى دەيدى. ويتكەنى كوبىرەك اقشا تاباتىن ادام ايلىعى تومەندەرمەن بىردەي جارنامەن قۇتىلماۋى ءتيىس. ال قارجى سالاسىنىڭ كەيبىر ساراپشىلارى باسقا پىكىردە. قازىر تابىسى ءتاۋىر ادام اۋىرسا, ءمامس ارقىلى ەمەس, جەكەمەنشىك ەمحانالارعا بارىپ ەمدەلەدى دەگەن ءۋاج كەلتىردى.
- ءمامس-كە كوبىرەك تولەيتىن ادامدارعا ەشقانداي پايداسى جوق. جالاقىڭ كوپ پە, كوبىرەك تولەيسىڭ دەگەن قاعيدات ادىلەتسىز. قورعا قاراجات قاجەت بولسا, نەگە ونى حالىق تولەۋ كەرەك؟ سونداي-اق قور ءوزىنىڭ جيناقتارىمەن دۇرىس جۇمىس ىستەمەيدى. ونداعى اقشانىڭ قايدا جۇمسالىپ, قايدا كەتىپ جاتقانىن ءبىز بىلمەيمىز. مەن ءوزىم, مىسالى, مىندەتتى الەۋمەتتىك مەديتسينالىق ساقتاندىرۋعا جۇگىنبەيمىن. بىراق جالاقىمنان اي سايىنعى تولەم ۇستالىپ وتىرادى. نە ءۇشىن تولەپ جۇرگەنىم تۇسىنىكسىز, – دەيدى قارجى ساراپشىسى اندرەي چەبوتارەۆ.
دەنساۋلىق ساقتاۋ مينيسترلىگى وسى جاڭاشىلدىقتى ەنگىزۋ ارقىلى قورعا جەتپەي جاتقان 243 ميلليارد تەڭگەنى تولتىرامىز دەپ ايتقان ەدى. ەكونوميستەر مەديتسينالىق ساقتاندىرۋداعى قارجى تاپشىلىعىن جويعان كۇننىڭ وزىندە دە, اسا ءبىر وزگەرىسكە اكەلمەيدى دەپ وتىر.
