ەرەكشە پويىز جولاۋشىلارعا مەرەكەلىك اتموسفەرا سىيلاۋ ءۇشىن جاڭا جىلعا ساي بەزەندىرىلگەن. ۆاگون جولسەرىكتەرى ءبىر ۋاقىت اياز اتا مەن اقشاقار كەيپىنە ەنىپ, جولاۋشىلاردى كەلە جاتقان مەرەكەمەن قۇتتىقتاپ, سىيلىقتار تابىستايدى. مەرەكەلىك بەزەندىرىلگەن پويىز قۇرامى جاڭاجىلدىق دەمالىس ماۋسىمى اياقتالعانعا دەيىن قاتىنايدى.
«بيىل ەكىنشى جىل قاتارىنان جاڭا جىل قارساڭىندا قتج-مەن بىرلەسىپ برەندتەلگەن تۋريستىك پويىزدى ىسكە قوسىپ وتىرمىز. مۇنداي پويىز جولاۋشىلارعا مەرەكەلىك اتموسفەرانى سىيلاپ قانا قويماي, تۋريستەردى دە تارتۋعا مۇمكىندىك بەرەدى», دەدى تۋريزم جانە سپورت ءمينيسترىنىڭ ورىنباسارى ەرجان ەركىنباەۆ.
ايتا كەتەيىك, بىلتىرعى جاڭاجىلدىق ەلەكتر پويىزىمەن 16 مىڭنان استام جولاۋشى تاسىمالدانعان.
مەرەكەلىك پويىز قۇرامى 28 جەلتوقساننان باستاپ اپتاسىنا بەس رەت قاتىنايدى. ەلوردادان بۋراباي كۋرورتىنا پويىز نۇرلى جول ۆوكزالىنان تاڭعى ساعات 06:12-دە جونەلتىلەدى. سونىمەن قاتار ەلوردا تۇرعىندارى مەن قالا قوناقتارىنا ىڭعايلى بولۋ ءۇشىن پويىزعا استانا-1 ۆوكزالىنان دا وتىرعىزۋ قاراستىرىلعان. بۇل جەرگە ەكسپرەسس پويىز تاڭعى ساعات 06:37-دە كەلىپ, 07:00-دە ءجۇرىپ كەتەدى.
تۋريستىك پويىزدى ىسكە قوسۋ اياسىندا قر ءپىب «بۋراباي دامۋ» جشس ەرەكشە رەيستىڭ كەستەسىنە سايكەس قىسقا تۋر ۇيىمداستىردى. جاڭاجىلدىق تاقىرىپتى جالعاستىرۋ ماقساتىندا بۋرابايداعى سانتا رەزيدەنتسياسىنا بارىپ, بۋرابايلاندتا تاڭعاجايىپ كۇن وتكىزۋ ۇسىنىلادى. مۇندا بۇعى نەمەسە يت جەگىلگەن اربامەن, كۆادروتسيكلمەن, قاردا جۇرەتىن كولىكتەرمەن سەرۋەندەۋگە, اتقا مىنۋگە بولادى.
