فوتو: وقۋ-اعارتۋ مينيسترلىگى
جىل اياعىنا دەيىن تاعى 132 مىڭ ورىنعا ارنالعان 154 مەكتەپ پايدالانۋعا بەرىلمەك. ونىڭ 62-ءسى ءبىلىم بەرۋ ينفراقۇرىلىمىن قولداۋ قورى ەسەبىنەن سالىنىپ جاتىر. بۇل 12 اپاتتى جانە 29 ءۇش اۋىسىمدى مەكتەپتىڭ ماسەلەسىن, 113 ەلدى مەكەندەگى وقۋشى ورىندارىنىڭ تاپشىلىعىن شەشەدى.
«سونداي-اق «جايلى مەكتەپ» ۇلتتىق جوباسى ىسكە اسۋدا. بيىل 217 مەكتەپتىڭ قۇرىلىسى باستالدى, ولار 2024 جىلدىڭ سوڭىنا دەيىن پايدالانۋعا بەرىلەدى. ۇلتتىق جوبا ەڭ الدىمەن قالالار مەن كەلەشەگى بار ەلدى مەكەندەردە جاڭا ۇلگىدەگى مەكتەپتەردى سالۋعا, وقۋشىلار مەن پەداگوگتەرگە جايلى ءارى قاۋىپسىز ورتا قالىپتاستىرۋعا, ءبىلىم بەرۋ قىزمەتىنىڭ ساپاسىن ارتتىرۋعا باعىتتالعان», دەلىنگەن حابارلامادا.
جالپى, مەملەكەت باسشىسىنىڭ تاپسىرماسى بويىنشا ەلىمىزدە 740 مىڭ وقۋشىعا ارنالعان 369 «جايلى مەكتەپ» سالۋ جوسپارلانعان.
