قازاقستان ەاەو-عا مۇشە مەملەكەتتەردىڭ مەملەكەتتىك ساتىپ الۋلارى اياسىندا الىناتىن تاۋارلاردىڭ تىزبەسىن كەزەڭ-كەزەڭمەن كەڭەيتىپ جاتىر. ءتىزىم تاعى ءبىر پوزيتسياعا كەڭەيدى, بۇل – كيىم-كەشەك پەن كەرەك-جاراقتار, ونىڭ ىشىندە قولعاپتار, رەزەڭكە قولعاپتار بار. ەسكە سالا كەتەيىك, بيىل وتاندىق كاسىپكەرلەردىڭ ەاەو-عا مۇشە باسقا مەملەكەتتەردىڭ 63 تاۋار ءتۇرى بويىنشا مەملەكەتتىك ساتىپ الۋلارىنا قولجەتىمدىلىگى قامتاماسىز ەتىلدى. بۇدان باسقا وندىرىستىك جانە تەحنولوگيالىق وپەراتسيالاردىڭ بىرىڭعاي شارتتارى كوزدەلمەگەن 276 تاۋار پوزيتسياسى بويىنشا ست-1 سەرتيفيكاتىن پايدالانۋ مۇمكىندىگى 1 جىلعا ۇزارتىلدى.
ەاەو-عا مۇشە مەملەكەتتەردىڭ كەدەندىك شەكاراسى مەن اۋماقتارىندا ۆەتەريناريالىق باقىلاۋدى جۇزەگە اسىرۋدىڭ بىرىڭعاي تارتىبىنە وزگەرىستەر ەنگىزىلدى. اتاپ ايتقاندا, بىرقاتار تەرمين تۇزەتىلدى, ۆەتەريناريالىق, دارىلىك, دياگنوستيكالىق, دەزينفەكتسيالىق جانە باسقا دا قۇرالداردى, سونداي-اق جەمشوپ قوسپالارىن اكەلۋ جانە اۋىستىرۋ شارتتارى, ۆەتەريناريالىق سەرتيفيكاتتاردىڭ نىساندارى انىقتالدى. ۆەتەريناريالىق باقىلاۋ كەزىندە زەرتحانالىق سىناقتار جۇرگىزۋدى ۇيىمداستىرۋ بولىگىندەگى نورمالار دا تولىقتىرىلدى.
ەەك كەڭەسى 2024 جىلعا ارنالعان ەاەو ەلدەرىنە سيىر ەتىن باجسىز وتكىزۋ كۆوتالارىن بەكىتتى. قازاقستاندا ەتتىڭ وسى ءتۇرىنىڭ ءوندىرىسى ىشكى قاجەتتىلىكتى ءىس جۇزىندە تولىعىمەن جاباتىنىن ەسكەرە وتىرىپ, ەلىمىز ءۇشىن كۆوتا مولشەرى ەڭ تومەنگى 5 مىڭ توننا كولەمىندە ايقىندالدى (رەسەي – 100 مىڭ تونناعا دەيىن, ارمەنيا – 8,5 مىڭ تونناعا دەيىن, بەلارۋس – 7,5 مىڭ تونناعا دەيىن, قىرعىزستان – 3,5 مىڭ تونناعا دەيىن). يمپورتتالعان سيىر ەتىنىڭ قوسىمشا كولەمى وڭدەۋگە باعىتتالادى. بۇل شارا ەلىمىزدەگى شۇجىقتار مەن باسقا دا ەت ونىمدەرىنىڭ قۇنىن ارزانداتۋعا مۇمكىندىك بەرەدى دەپ كۇتىلىپ وتىر.
ەكى جىلعا (2025 جىلعى 31 جەلتوقسانعا دەيىن) ەاەو-عا مۇشە مەملەكەتتەرگە ەلەكترموبيلدەردى باجسىز وتكىزۋ ۇزارتىلدى. بۇل ەلەكترموبيلدەر نارىعىن ودان ءارى دامىتۋعا, زاريادتاۋ ينفراقۇرىلىمىن دامىتۋعا جانە ءىرى قالالارداعى ەكولوگيالىق جاعدايدى جاقسارتۋعا ىقپال ەتەدى.
جوعارى ەۋرازيالىق ەكونوميكالىق كەڭەستىڭ كەلەسى جىلى «ەۋرازيالىق ەكونوميكالىق جول» دەكلاراتسياسىن ىسكە اسىرۋ جونىندەگى جول كارتاسىن دايىنداۋ تۋرالى وكىمىنىڭ جوباسى كەلىسىلدى, ونى جوعارى كەڭەس بيىلعى جەلتوقسان ايىنىڭ سوڭىندا بەكىتۋدى جوسپارلاپ وتىر. جوبانى بيىلعى قازان ايىندا بىشكەكتە ەاەو-عا مۇشە مەملەكەتتەردىڭ ۇكىمەت باسشىلارى ماقۇلدادى. بۇل قۇجات قاۋىپسىز جانە باسەكەگە قابىلەتتى ءونىم شىعارۋعا ۇمتىلۋعا باعىتتالعان ەاەو قۇقىعى اياسىندا تەحنيكالىق رەتتەۋ جانە ستاندارتتاۋ سالاسىن ودان ءارى دامىتۋدى دەكلاراتسيالايدى. تۇجىرىمداما ستاندارتتاردى بىرىزدەندىرۋدى نە ۇيلەستىرۋدى جانە ساپا ماسەلەلەرىن ۇلتتىق دەڭگەيدەن جوعارى دەڭگەيگە بەرۋدى كوزدەمەيدى.
سونىمەن قاتار قاراشادا وتكەن ەەك كەڭەسىندە ءۇشىنشى ەلدەرمەن ساۋدا جاساۋ كەزىندە تاريفتىك ەمەس رەتتەۋ شارالارى قولدانىلاتىن تاۋارلاردىڭ ەكسپورتى مەن يمپورتىنا ليتسەنزيالار مەن رۇقساتتار بەرۋ قاعيدالارىنىڭ جاڭا رەداكتسياسى بەكىتىلدى. وزگەرىستەر اۆتوماتتاندىرىلعان رەجىمدە ەلەكتروندىق قۇجات اينالىمىنا كوشۋگە دايىن ەلدەرگە ليتسەنزيالاردى اۆتوماتتى تۇردە بەرۋگە مۇمكىندىك بەرەدى.
ەەك كەڭەسىنىڭ كەلەسى وتىرىسى 12 جەلتوقساندا ونلاين رەجىمدە وتەدى.
