كەزدەسۋ بارىسىندا حالىقارالىق كۇن تارتىبىندەگى كوپتەگەن ماسەلە بويىنشا قازاقستان مەن بىرىككەن اراب امىرلىكتەرىنىڭ ستراتەگيالىق ۇستانىمدارى ءبىر-بىرىنە وتە جاقىن ەكەنى اتاپ ءوتىلدى. ناقتى ايتقاندا, بەيبىت قاتار ءومىر سۇرۋگە ۇمتىلۋ جانە تولەرانتتىلىق يدەيالارىن دارىپتەۋ, بۇگىنگى سىن-قاتەرلەر مەن جاھاندىق ماسەلەلەرگە قارسى تۇرۋ جولىندا كۇش جۇمىلدىرۋ باعىتىنداعى ورتاق كوزقاراستار ءسوز بولدى. ابۋ-دابيدە وتكەن حالىقارالىق كونفەرەنتسيادا ءدىن كوشباسشىلارىنىڭ ەكولوگيالىق ماسەلەلەردى شەشۋگە قاتىسۋ ماسەلەسى دە نازاردان تىس قالعان جوق.
ماۋلەن اشىمباەۆ كليماتتىڭ وزگەرۋى جاھاندىق دەڭگەيدە, ونىڭ ىشىندە قازاقستان ءۇشىن دە ەڭ وزەكتى ماسەلەلەردىڭ ءبىرى ەكەنىن اتاپ ءوتتى. وسىعان بايلانىستى ول الەمدىك جانە ءداستۇرلى دىندەر كوشباسشىلارى سەزىنىڭ تۇجىرىمداماسىن ىسكە اسىرۋ اياسىندا اتالعان ماسەلەلەردى شەشۋگە ىقپال ەتۋگە دايىن ەكەنىن جەتكىزدى.
«كليماتتىڭ جاھاندىق وزگەرۋى ءبىزدىڭ وڭىردە سۋ تاپشىلىعىنا جانە اگروونەركاسىپتىك كەشەندى دامىتۋدا ءتۇرلى پروبلەماعا الىپ كەلەدى. بۇل ماسەلە بۇكىل الەمگە دە قاۋىپ توندىرەتىنى انىق. سوندىقتان وسى باعىتتاعى بارلىق سىندارلى كۇشتىڭ بىرلەسىپ ارەكەت ەتۋى ماڭىزدى. وسىنداي كۇردەلى كەزەڭدە ءوزارا تۇسىنىستىك پەن سىيلاستىقتى دامىتۋ ەرەكشە مانگە يە. جاھاندىق پروبلەمالاردى, ونىڭ ىشىندە ەكولوگيالىق ماسەلەلەردى شەشۋدە ءدىن قايراتكەرلەرىنىڭ دە الەۋەتىن ءتيىمدى پايدالانۋ كەرەك دەپ ەسەپتەيمىز», دەگەن سەنات سپيكەرى الداعى سور28 كليمات كونفەرەنتسياسىنىڭ ءساتتى وتۋىنە تىلەكتەستىك ءبىلدىردى.
وسى كۇنى ماۋلەن اشىمباەۆ بىرىككەن اراب امىرلىكتەرىنىڭ پرەزيدەنتى شەيح مۇحاممەد بين زايد ءال-ناحايانمەن كەزدەستى. كەزدەسۋدە ءدىن ليدەرلەرىنىڭ جوعارى ءرولى ءسوز بولدى. سونداي-اق رۋحاني ديپلوماتيانىڭ جاھاندىق ماسەلەلەردى جانە وزەكتى ماسەلەلەردى بەيبىت جولمەن شەشۋگە ىقپال ەتۋى ماڭىزدى ەكەنى اتاپ ءوتىلدى.
سونىمەن قاتار ماۋلەن اشىمباەۆ يسلام, حريستيان, ءيۋدايزمنىڭ ءدىني عيباداتحانالارىن بىرىكتىرگەن كەشەنگە باردى.
ساپار كەزىندە قازاقستاندىق دەلەگاتسيا مۇشەلەرى «Abu Dhabi Global Market» حالىقارالىق قارجى ورتالىعىنىڭ قىزمەتىمەن تانىستى. ايتا كەتەيىك, جاھاندىق قارجى ورتالىقتارىنىڭ رەيتينگىندە 32-ورىندا تۇرعان بۇل ۇيىم استانا حالىقارالىق قارجى ورتالىعىمەن دە بەلسەندى ىنتىماقتاستىق ورناتىپ وتىر. اتالعان ەكى ۇيىم اراسىندا 3 ءتيىستى مەموراندۋمعا قول قويىلعان.
قازاقستان سەناتورلارى «Hub71» تەحنولوگيالىق ەكوجۇيە ورتالىعىندا ءباا-ءنىڭ ستارتاپتاردى قولداۋ جۇمىسىمەن تانىستى. ونىڭ نەگىزگى مىندەتى – اقپاراتتىق تەحنولوگيالار مەن يننوۆاتسيالار سالاسىنداعى ستارتاپتار مەن كومپانيالاردى قولداۋ جانە ىنتالاندىرۋ. ورتالىق ستارتاپتاردى كاپيتالمەن, ساراپشىلاردى قولجەتىمدىلىكپەن قامتاماسىز ەتە وتىرىپ, ولارعا جاساندى ينتەللەكت, كيبەرقاۋىپسىزدىك, قارجىلىق تەحنولوگيالار جانە دەنساۋلىق ساقتاۋ سالالارىندا قولداۋ كورسەتەدى.
