ۆەدومستۆو وكىلدەرى ءمالىم ەتكەندەي, گاز-مەتان قوسپاسىنىڭ جارىلۋىنىڭ سەبەپتەرى مەن جاعدايلارىن انىقتاۋ ماقساتىندا شاحتاعا ءتۇسۋ ارقىلى وقيعا ورنىن العاشقى تەكسەرۋ جۇرگىزىلدى.
وسى ورايدا اۋىسىم قىزمەتكەرلەرىنەن, «امت» كومىر دەپارتامەنتىنىڭ باسشىلارى مەن جاۋاپتى قىزمەتكەرلەرىنەن جاۋاپ الىنىپ, بىرقاتار سوت ساراپتامالارى تاعايىندالدى. دالىرەك ايتقاندا, جارىلىس-تەحنيكالىق, بيولوگيالىق, گەنومدىق-مولەكۋلالىق زەرتتەۋلەر جۇرگىزىلەدى.
«كەنشىلەر ەڭبەگىنىڭ قورعالۋىنىڭ ماتەريالدىق قامتاماسىز ەتىلۋ تالاپتارىنا سايكەستىگىن تەكسەرۋ جانە قورىتىندى بەرۋ ءۇشىن مەملەكەتتىك اۋديت ماماندارى مەن باسقا دا ساراپشىلار تارتىلدى. شاحتادا جۇمىستاردى ۇيىمداستىرۋعا جانە قاۋىپسىزدىك تەحنيكاسىن قامتاماسىز ەتۋگە ارنالعان قۇجاتتامالار الىنىپ, تالدانىپ جاتىر. وزگە دە قاجەتتى ءىس-شارالار پىسىقتالدى», دەلىنگەن رەسمي اقپاراتتا.
بۇل رەتتە كىنالى تۇلعالاردىڭ ءىس-ارەكەتتەرىنە ءتيىستى قۇقىقتىق باعا بەرىلەتىنى دە حابارلاندى.
«تەرگەۋ جالعاسىپ جاتىر. قىلمىستىق ءىس باس پروكۋروردىڭ جەكە باقىلاۋىندا. وزگە اقپارات قازاقستان رەسپۋبليكاسى قىلمىستىق پروتسەستىك كودەكسىنىڭ 201-بابىنا سايكەس جاريا ەتۋگە جاتپايدى», دەلىنگەن حابارلامادا.
