تۇركىستاندا وتكەن ۇلتتىق قۇرىلتايدا ەلدە قىزۋ تالقىلانىپ, كوكەيدە جۇرگەن ماسەلەلەر كوتەرىلىپ, ماڭىزدى شەشىمدەر قابىلداندى. مەملەكەت باسشىسىنىڭ بايانداماسىندا ناقتى يدەولوگيالىق باسىمدىقتار انىقتالىپ, تىڭ يدەيالار ايتىلدى.
جاساندى ينتەللەكت, تسيفرلاندىرۋ, جاھاندانۋ كەزەڭىندە كەز كەلگەن مەملەكەتتىڭ باسەكەگە قابىلەتتى بولۋى – ءبىرىنشى كەزەكتە قوعامدىق ينستيتۋتتاردىڭ وزگەرۋىنە, بەيىمدەلۋىنە, ۇلتتىڭ بىرەگەيلىگىنە, قۇندىلىقتار قالىپتاستىرۋىنا, عىلىم مەن ءبىلىمنىڭ دامۋى مەن زاماناۋي قوعام قۇرۋ ماسەلەلەرىنە تىكەلەي بايلانىستى. قاي مەملەكەت وسى سۇراقتارعا جاۋاپ بەرسە, قوعامىن جاڭعىرتۋعا تىرىسسا, سول مەمەلەكەتتىڭ بولاشاعى زور. «ايتپەسە, باسقا رەفورمانىڭ ءبارى بەكەر. ءبىر سوزبەن ايتساق, پيعىل وزگەرمەسە, ەشتەڭە دە وزگەرمەيدى», دەپ پرەزيدەنت قاسىم-جومارت توقاەۆ ايتقانداي, ونىڭ ماڭىزى ءدال وسىندا.
بايانداماداعى ەرەكشە ۇناعانى «ادال ادام» تۇجىرىمداماسى پرەزيدەنتتىڭ قايتا-قايتا ايتىپ جۇرگەن ابايدىڭ «تولىق ادام» تۇجىرىمداماسىمەن ۇندەسكەن, رۋحاني جەتىلگەن, كەمەلىنە كەلگەن, جان-جاقتى دامىعان, ادىلەتتى قازاقستان ازاماتىنىڭ وبرازى جانە جالعاسى دەپ ايتۋعا بولادى. ءبىلىم سالاسى ءۇشىن دە بۇل – تەمىرقازىق يدەيا.
مەملەكەتتىك ناگرادالاردى ەلىمىزدىڭ تاريحىندا ەرەكشە ورىن العان, سۇيىكتى ۇلدارىنىڭ اتىمەن اتاۋ كوپ مەملەكەتتەردىڭ تاجىربيەسىندە بار ەكەنى بەلگىلى. ەندى ءبىزدىڭ ەلدە بايبارىس سۇلتان, ءابۋ ناسىر ءال-فارابي, اباي, احمەت بايتۇرسىن ۇلى اتىنداعى ماراپاتتاردىڭ بولۋى وتە ءتيىمدى شەشىم دەپ سانايمىن.
بالالاردى كىتاپ وقۋعا باۋلۋ تۋرالى پرەزيدەنت مۇنىڭ الدىندا دا تاپسىرما بەرگەن ەدى. ءبىز 2020 جىلدان باستاپ «وقۋعا قۇشتار مەكتەپ» جوباسىن باستاپ, مەكتەپتەرىمىزدى 3 ميلليوننان استام ادەبيەتپەن قامتاماسىز ەتتىك. «بالالار كىتاپحاناسى» اتتى جاڭا باعدارلاما بۇل سالاعا جاڭا سەرپىن بەرەدى. قازىر «مازمۇنداما», «Daryn Books», «Steppe & World Publishing» سياقتى باسپالار وسى جۇمىسپەن اينالىسۋدا. ەندى مەملەكەتتىڭ قولداۋىنىڭ ارقاسىندا بۇل جۇمىس ءتيىمدى ىسكە اسادى.
دەپۋتاتتار وسى تۇرعىدا ارنايى زاڭ جوباسىن دايىنداپ جاتىر. جاقىندا ۇكىمەتكە قورىتىندى الۋعا جىبەرەمىز. سول زاڭدا پرەزيدەنتتىڭ تاپسىرمالارىن قامتيمىز. قوسىمشا كىتاپ دۇكەندەرىندە بەلگىلى مولشەردە قازاق تىلىندەگى كىتاپتارعا مىندەتتى تۇردە ورىن ءبولۋ تۋرالى ۇسىنىس تا قارالىپ جاتىر. كەزىندە «تەلەۆيدەنيە حابارلارى 50 پايىز مەملەكەتتىك تىلدە بولۋ كەرەك» دەگەن نورما ەنگەندە, تالاي ديسكۋسسيا بولدى. بىراق بۇگىندە بۇل شەشىمنىڭ دۇرىس ەكەنىنە كوزىمىز جەتتى.
تاربيە – تال بەسىكتەن. مەكتەپتەردەگى تاربيە جۇمىسىن جەتىلدىرۋ ماسەلەسى بويىنشا كەشەندى تۇجىرىمداما بەكىتۋ ماڭىزدى. بۇل قۇجاتتى ءبىر جىل بويى عالىمدار مەن ماماندار دايىندادى, ەندى بەكىتۋ عانا قالدى. وسى شەشىم پرەزيدەنتتىڭ بۇگىنگى ۇسىنىستارىمەن تولىعىمەن ۇندەسەدى دەپ سانايمىن.
وقۋشىلاردى ەڭبەككە باۋلۋ ماسەلەسى دە كوتەرىلدى. 2022 جىلى ەڭبەك ءپانى 1-سىنىپتاردا بولەك ءپان رەتىندە قايتا ەنگىزىلگەن بولاتىن. بۇل جۇمىستى پرەزيدەنتتىڭ باستاماسىمەن ۇشتاستىرىپ, ءتيىمدى ىسكە اسىرۋ ءۇشىن مەكتەپتەردە قاجەتتى ماتەريالدى بازامەن قامتاماسىز ەتۋ كەرەك. بۇل – ەڭبەك قوعامىن قۇرۋداعى ماڭىزدى باستاما.
تاعى ءبىر ماڭىزدى ماسەلە – بالالاردىڭ تەاتر, مۇراجايلارعا بارىپ, مادەني دامۋى. مەملەكەت باسشىسىنىڭ تاپسىرماسىنىڭ شەڭبەرىندە ءتيىستى مينيسترلىكتەر وسى ماسەلەنى قولعا الادى دەپ سەنەمىز. اتالعان يدەيانى ءتيىمدى ىسكە اسىرۋدىڭ ءبىر جولى – بيۋدجەتتەن ارنايى مەملەكەتتىك تاپسىرىس ەنگىزۋ.
شەكارالاس اۋدانداردى قايتا اشۋ – ۇلتتىق قاۋىپسىزدىكتىڭ ماسەلەسى.سوندىقتان جاڭا كاتونقاراعاي, مارقاكول جانە ماقانشى اۋداندارىنىڭ قالىپتى دامۋى ءۇشىن مەكتەپتەر ءجىلىسىنىڭ نورماتيۆىنە دە وزگەرىستەر ەنگىزۋ كەرەك.
ناشاقورلىقپەن كۇرەس, قۇمار ويىنداردان ساقتاندىرۋ, ۆەيپ ماسەلەسىمەن اينالىسۋ سياقتى قوعامدا قىزۋ تالقىلانىپ جۇرگەن پروبلەمالار بويىنشا دا تاپسىرمالار بەرىلدى.
عالىمدارىمىزدىڭ كوتەرىپ جۇرگەن تاعى ءبىر ماسەلەسى بار ەدى. ول – بەلگىلى ءبىر شەشىم قابىلداعاندا, رەفورمالار جۇرگىزگەندە كاسىبي زەرتتەۋلەرگە سۇيەنۋ. پرەزيدەنت بۇگىن وسى ماسەلەگە دە بولەك توقتالدى. «عىلىم مەن زەرتتەۋگە نەگىزدەلگەن ساياسات تابىستى بولادى».
شىنى كەرەك, مەملەكەتتىك ورگانداردىڭ ءبىراز باستامالارىنىڭ ءساتسىز ىسكە اسىرىلۋىنىڭ بىردەن-ءبىر سەبەبى دە – الدىن الا زەرتتەۋلەردىڭ بولماۋىندا. وسى قابىلدانعان شەشىمدەردى ىسكە اسىرۋ ءۇشىن زاڭنامالىق وزگەرىستەر دە قاجەت بولادى.
اسحات ايماعامبەتوۆ,
ءماجىلىس دەپۋتاتى
