تۇراقتى وكىلدەردىڭ كوشپەلى كەڭەسى

كەشە الماتىدا تەڭىزگە شىعۋ مۇمكىندىگى جوق دامۋشى ەلدەردىڭ بىرىككەن ۇلتتار ۇيىمىنداعى تۇراقتى وكىلدەرىنىڭ كوشپەلى ءماجىلىسى ءوز جۇمىسىن باستادى. كوشپەلى كەڭەستى كىرىسسوزبەن اشقان قازاقستاننىڭ بۇۇ-داعى تۇراقتى وكىلى ك.ابدراحمانوۆ قۇتتىقتاۋ ءۇشىن ءسوزدى قازاقستان رەسپۋبليكاسىنىڭ سىرتقى ىستەر ءمينيسترى ە.ىدىرىسوۆقا بەردى. مينيستر ءوزىنىڭ كىرىسسوزىندە كوشپەلى ماجىلىسكە قاتىسۋشىلاردى قۇتتىقتاي وتىرىپ, ونىڭ جۇمىسىنا تابىس تىلەدى. كوشپەلى ءماجىلىستىڭ ماقساتى الماتى باعدارلاماسىن جۇزەگە اسىرۋ ارەكەتتەرىن تالقىلاۋ بولىپ تابىلادى. 2003 جىلدىڭ 28-29 تامىزىندا الماتىدا دامۋشى ەلدەر سىرتقى ىستەر مينيسترلەرىنىڭ حالىقارالىق كونفەرەتسياسى ءوتىپ, الماتى باعدارلاماسى قابىلدانعان بولاتىن. الماتى باعدارلاماسى – تەڭىزگە شىعۋ مۇمكىندىگى جوق دامۋشى ەلدەردىڭ «جول كارتاسى» سياقتى تالابىن قامتاماسىز ەتەتىن ەرەكشە قۇجات. ول ترانزيتتىك تاسىمال مەن كولىكتىك ينفراقۇرىلىمدى دامىتۋداعى ناقتى شارالاردان تۇرادى. سونداي-اق, بۇل قۇجات بويىنشا اتالعان توپتاعى ەلدەرگە قارجىلىق جانە تەحنيكالىق كومەك كورسەتۋ دە قاراستىرىلعان. قازاقستان تەڭىزگە شىعۋ مۇمكىندىگى جوق ەڭ ءىرى ەلدەردىڭ قاتارىنا جاتادى. الماتى باعدارلاماسى قابىلدانعاننان كەيىن قازاقستان تەڭىز جاعالاۋلارىنىڭ بولماۋىنا قاراماستان, تۇراقتى دامۋدىڭ جولىنا ءتۇستى. سوندىقتان بۇل تاقىرىپقا بايلانىستى الماتىدا كوشپەلى ءماجىلىستى وتكىزۋ قازاقستان تاراپىنىڭ ۆەنا كونفەرەنتسياسىنا دايىندىققا ۇلەس قوسۋى, تەڭىزگە شىعۋ مۇمكىندىگى جوق ەلدەردىڭ مۇددەلەرىن بايقاۋ بولىپ تابىلادى. كوشپەلى كەڭەسكە قازاقستان رەسپۋبليكاسىنىڭ سىرتقى ىستەر ءمينيسترى ە.ىدىرىسوۆ, بىرىككەن ۇلتتار ۇيىمى باس حاتشىسىنىڭ ورىنباسارى – تەڭىزگە شىعۋ مۇمكىندىگى جوق دامۋشى ەلدەردىڭ بىرىككەن ۇلتتار ۇيىمىنداعى جوعارى وكىلى گيان چاندرا اچاريا جانە قازاقستان رەسپۋبليكاسى كولىك جانە كوممۋنيكاتسيا مينيسترلىگىنىڭ جاۋاپتى حاتشىسى ز.ساعىنوۆ, سونداي-اق, حالىقارالىق ۇيىمدار وكىلدەرى قاتىسۋدا. كوشپەلى ءماجىلىس ەرتەڭ ءوز جۇمىسىن جالعاستىرادى. شارافاددين ءامىروۆ, «ەگەمەن قازاقستان». الماتى. سۋرەتتى تۇسىرگەن بەرسىنبەك سارسەنوۆ.